Read Maasai Bible – Biblia Sinyati Yohana 21 Bible Online

Yohana 21 - Maasai Bible – Biblia Sinyati bible

Yohana 21

¹Ore te siadi kuna baa neitoki Yesu aitoduaaya kewan te lelo ooiteng'eni lenyena te naiposha e Tiberias; neitoduaaya kewan tena oitoi.

²Ore eboita Simon Petero, o Tomas oji Olmaoi, o Natanael le Kana te Galilaya, o layiok le Sebedayo o kulikae ooiteng'eni aare lenyena.

³Nejoki Simon Petero lkulikae, “Kalo arresh isinkir.” Nejoki ninche ninye, “Aikiriamariyie sii iyiook iyie.” Nepuku aapuo nejing nabo kata empeut enye, neitu eibung ninche toki ina kewarie.

⁴Ore enasirie neitashe Yesu te mbata e naiposha, kake eitu eyiolou lelo ooiteng'eni aajo Yesu.

⁵Nejoki ninche, “Oyie ooti, iatata isinkir?” Newaliki aajoki, “Mikiaata.”

⁶Nejoki ninche, “Entanang'aki orreshet tatene e mpeut, naa itumutumu isinkir.” Nenang'aki orreshet enaiposha kake ore te nkaraki enkumoi oo sinkir nelaikino aateyietu.

⁷Nejoki ilo oiteng'eni onyor Yesu Petero, “Olaitoriani doi!” Ore pee ening Simon Petero, neishopo (amu meeta duo nkilani), neidaki atua enaiposha.

⁸Nepuonunye lelo kulikae ooiteng'eni empeut enye, eikurtutu orreshet loo sinkir amu melamita enkop natoyio, keba anaa iroruat iip nabo.

⁹Ore pee epuku aabaiki enkop natoyio nedol teine enkima oo nkuk naiteleikino sinkir, o emukate.

¹⁰Nejoki Yesu ninche, “Eyau ene ematua oo sinkir limbung'a tena kata.”

¹¹Neked Simon Petero empeut neikurtutu orreshet enkop natoyio ebore sinkir sapuki oora iip o onom o okuni; kake ore hoo naa kumok aaba nejia eitu epolosa orreshet.

¹²Nejoki Yesu ninche, “Wootu entadaata.” Nemeetae hoo obo loo lkipaareta oikilikuana ajoki, “Aira iyie ng'ae?” Amu etayioloito aajo Olaitoriani.

¹³Nelotu Yesu nedumu emukate neisho, neikunaki sii nejia sinkir.

¹⁴Ena taa taata enkata e uni pee eipang'aki Yesu lelo ooiteng'eni eidipa atopiu too lootuata.

¹⁵Ore pee eidip aatadaata nejoki Yesu Simon Petero, “Simon olayioni le Yohana, ai kinyor iyie nanu alang kulo?” Nejoki, “Ee Olaitoriani, iyiolo iyie ajo kaanyor.” Nejoki Yesu ninye, “Intotio lkuoo laainei le kerra.”

¹⁶Neitoki ajoki eni are, “Simon olayioni le Yohana, ai kinyor iyie nanu?” Nejoki, “Ee Olaitoriani, iyiolo ajo kaanyor.” Nejoki, “Irrita nkerra aainei.”

¹⁷Neitoki ake ajoki ninye ene uni, “Simon olayioni le Yohana, ai kinyor iyie nanu?” Neisinanuo Petero amu etiaaka ene uni, “Ai kinyor iyie nanu?” Nejoki ninye, “Olaitoriani, iyiolo iyie pooki toki; iyiolo ajo kaanyor.” Nejoki Yesu ninye, “Intotio nkerra aainei.

¹⁸Kesipa, kesipa, aajoki iyie, ore apa ira oti irreten kewan nilo eniyieu, kake ore kenya pee imoruau iyiooki aitorio nkaik inono, nikirreten likae nikiya ewueji nimiyieu nilo.”

¹⁹Etejo Yesu nejia eutu keeya e Petero nayaki Enkai enkitoo. Ore pee eidip atejo nejia nejoki Yesu Petero, “Tusujuaki nanu.”

²⁰Neibelekenya Petero nedol olapa oiteng'eni onyor Yesu esujita, aa ninye olapa oirishakine olgoo lenye te ndaa e teipa nejoki, “Olaitoriani, ai ng'ae ilo likirojaa?”

²¹Ore pee edol Petero ilo nejoki Yesu, “Olaitoriani, oo ninye ele?”

²²Nejoki Yesu, “Amaa tenayieu nebik ninye o maeu, kainyoo nikitii iyie? Tusujuaki iyie nanu.”

²³Neibulaa ilo rorei too lalashera nchere ore ele oiteng'eni nemeye, hoo neitu ejo Yesu, meye ninye, “Kake, Amaa tenaa keyeunoto ai pee eton ninye o matushukunye, kainyoo nikitii iyie?”

²⁴Ilo oiteng'eni ele oishakenu kuna baa neigero ninche, nikiyiolo iyiook aajo kesipa shakenisho enye.

²⁵Netii sii kulie baa kumok naataasa Yesu; naa te neigeri naaji maa naabo, kajo nanu meishaa enkop imbukui naaji naaigeri.