Read Maasai Bible – Biblia Sinyati Yohana 3 Bible Online

Yohana 3 - Maasai Bible – Biblia Sinyati bible

Yohana 3

¹Etii apa oltung'ani loo Lfarisayo oji enkarna Nikodemo, aitoriani loo Lyahudi.

²Nelotu ele tung'ani enetii Yesu kewarie, nejoki ninye, “Rabi, kiyiolo aajo ira iyie olaiteng'enani oing'uaa Enkai; amu meetae oltung'ani oidim ataasa kuna kitoduaat nias iyie te nemeboitare Enkai ninye.”

³Newaliki Yesu ninye ajoki, “Esipa, esipa, aajoki iyie, te neitu eini oltung'ani aaigil te inoto naing'uaa keper, nemeidim atoduaa Enkitoria e Nkai.”

⁴Nejoki Nikodemo ninye, “Kaji eiko pee eidimi aatoiu oltung'ani etaa moruo? Keidim ninye atushukokinoyu eniare enkoshoke e ng'otonye metoini?”

⁵Newaliki Yesu ajoki, “Esipa, esipa, aajoki iyie, te neitu eini oltung'ani te nkare o te Nkiyang'et, nemeidim atijing'a Enkitoria e Nkai.

⁶Ore ina natoiwuoki to sesen, naa osesen, ore enatoiwuoki te Nkiyang'et naa enkiyang'et.

⁷Ming'asia te naajoki iyie, ‘Meeta nchere pee mikingili aaiu.’

⁸Eisiusiu osiwuo nelo eneyieu, nining oltoilo lenye, nimiyiolo eneing'uaa, aashu enelo: nejia etiu pooki ng'ae oini te Nkiyang'et.”

⁹Newaliki Nikodemo ajoki ninye, “Kaji eiko pee eidim aataa kuna baa?”

¹⁰Newaliki Yesu ajoki ninye, “Amaa, aa ira iyie olaiteng'enani loo Siraeli nimiyiolo kuna baa?

¹¹Esipa, esipa, aajoki iyie, inikiyiolo kilimu, nikinchakenoki inikitoduaa niming'amaa intae shakenisho ang.

¹²Amaa te natolikio intae mbaa e nkop nimirukuruku, kaji nkoko pee irukuruku te naliki intae mbaa e Keper?

¹³Meetae oloilepa alo keper, leme ilo otadowuo eing'uaa keper, Enkerai e Tung'ani.”

¹⁴Ore anaa enailepie Musa olasurai ti ong'ata meeta nchere pee eitu eilepieki Enkerai e Tung'ani aaiko nejia,

¹⁵paa ore pooki ng'ae oiruk ninye netum enkishui nemeish.

¹⁶Amu etonyorra Enkai enkop aiko nji o meishoru Enkerai enye nabo, paa ore pooki ng'ae oiruk nemeimin kake netum enkishui nemeish.

¹⁷Amu eitu eirriu Enkai Enkerai enye enkop, meeu aiguanare enkop, kake pee etum enkop atajeu te ninye.

¹⁸Ore ilo oiruk ninye; nemeiguanareki, ore ilo lemeiruk neidipaki aaiguanare, amu eitu eiruk enkarna e Nkerai inoti nabo e Nkai.

¹⁹Naa ena enkiguana, eewuo ewang'an enkop, kake etonyorra iltung'ana enaimin aaitalang ewang'an amu ai torrok iasat enye.

²⁰Ore pooki ng'ae oas ntorrok naa keiba ewang'an, nemelotu enewang pee meibalieki iasat enyena,

²¹kake ore oloas esipata, kelotu enewang pee eibalayu iasat enyena inchere etaasaki tiatua Enkai.

²²Orre te siadi kuna baa nelotu Yesu o lkipaareta lenyena enkop e Yudea, nebik teine te nebo o lorere neibatisa ninche.

²³Eibatisa sii apa ninye Yohana olorere te Enon nataaniki Salim, amu ai sapuk enkare teine; naa kepuonu ninche ine meibatisae;

²⁴amu eton eitu epiki Yohana jila.

²⁵Nepuku enchankar oo lkipaareta le Yohana o Lyahudi obo too mbaa e nkitukuo enkitisinyare.

²⁶Nepuonu enetii Yohana nejoki, “Rabi, ore olapa liboitare te lido kekun le Yordan, liimaka aishakenoki, eibatisisho, neloito pooki ng'ae enetii ninye.”

²⁷Newaliki Yohana ajoki, “Meidim oltung'ani atang'amai hoo toki te neme keishooki eing'uaa keper.

²⁸Kinchakenokiki intae maate nchere atejo, ‘Mara nanu Kristo, kake kaairriwuaki te dukuya ninye.’

²⁹Ore olorikito esiankiki e nkiyama, ninye oyamisho; kake ore olchore lo loyamisho, oitashe ainining, neshipakino oleng oltoilo lo loyamisho. Etaboreyia naa ena shipai ai.

³⁰Meeta nchere pee mebul ninye nang'oroo nanu.”

³¹Ore oloewuo eing'uaa keper netii shumata e pooki; ore oloing'uaa enkop naa enkop eing'uaa neiro ninye ine nkop. Ore ilo oing'uaa keper netii shumata te pooki.

³²Keishakenu ninye ina natoduaa o enatoning'o, ore ake eyia, nemeetae olong'amaa shakenisho enye.

³³Ore olotang'amayie shakenisho enye netipika olmishire lenye ena, nchere kaasipani Enkai.

³⁴Ore ilo oirriwua Enkai ninye oiro ororei le Nkai, amu meishoru Enkai Enkiyang'et te ntemakinoto.

³⁵Kenyor papa Enkerai, neishoo intokitin pooki metijing'a atua enkaina enye.

³⁶Ore oloiruk Enkerai neeta enkishui oo ntarasi; ore ologolong'aki Enkerai nemedol enkishui; kake keipirare ninye enkiguana e Nkai.