Read Maasai Bible – Biblia Sinyati Yohana 5 Bible Online

Yohana 5 - Maasai Bible – Biblia Sinyati bible

Yohana 5

¹Ore te siadi nena, neetae osirua loo Lyahudi neilep Yesu alo Yerusalem.

²Ore tiatua Yerusalem te mbata kishomi oo nkerra, netii ewueji neji te nkutuk oo Lbrania Betsaida, neeta nchomito imiet.

³Neirrag te nena shomito olorora kitok loo ltamuoyia: ilmodook, ilng'ojiniaa, ilmaiman, eanyu meing'oling'oli enkare.

⁴Amu keeta nkatitin naadoiki olmalaika ilo turoto neing'oling'ol enkare. Ore oloiteru ajing aa enaing'oling'olieki enkare neishiunyeki emuoyian ake ninye pooki naata.

⁵Netii ine oltung'ani otobiko emuoi ilarin tomoni uni o isiet.

⁶Ore pee edol Yesu ninye eirrag, neiyiolou ajo etobiko enkata naado teine, nejoki ninye, “Iyieu nikinchiunyeki?”

⁷Newaliki oltamuoyiai ajoki ninye, “Lo Kitok, maata nanu oltung'ani laaitadoiki olturoto te neing'oling'oli enkare; ore ajo alotu, nedoiki likae te dukuya nanu.”

⁸Nejoki Yesu ninye, “Inyo tudumu erruat ino shomo.”

⁹Neishiu nabo kata ilo tung'ani, nedumu erruat enye nelo. Naa enkolong e Sabato apa ina olong.

¹⁰Ore te nkaraki ina nejoki Lyahudi ilo oishiunyeki, “Sabato taata, nimikinchoro inap erruat ino.”

¹¹Newaliki ninye ninche ajoki, “Ilo laaishiunye nanu laatiaaka, ‘Tudumu erruat ino shomo.’ ”

¹²Neikilikuan ninche ninye aajoki, “Aing'ae ilo likitiaaka, ‘Tudumu erruat ino shomo?’ ”

¹³Nemeyiolo ilo oishiunyeki ajo aing'ae, amu eiwuang'a Yesu etii olorere ine wueji.

¹⁴Ore eidipate nena netum Yesu ninye to nkaji e Nkai, nejoki ninye, “Ing'ura ajo, inchiwuo; mintoki aekata aas ing'ok mikijing entorrono nalang ena.”

¹⁵Nelo ilo tung'ani, neliki Ilyahudi nchere Yesu oishiunye.

¹⁶Ore te nkaraki e ina neiteru Ilyahudi aaing'orunore Yesu te nkaraki nataasa nena baa te enkolong e Sabato.

¹⁷Newaliki Yesu ajoki ninche, “Easisho Papa o tena kata, naa kaasisho sii nanu.”

¹⁸Ore te nkaraki ina, nenyok Ilyahudi aaing'oru enkoitoi naarie metua, neme te nkaraki ake natigila enkolong e Sabato kake te nkaraki sii natejo menye lenye Enkai, aitorisioki kewan Enkai.

¹⁹Newaliki Yesu ajoki ninche, “Esipa, esipa ajoki intae, meidim Enkerai ataasa ae toki openy, te neme naaduaaki menye easita; amu ore pooki naas menye neas sii ninye Enkerai aiko nejia.

²⁰Amu kenyor Papa Enkerai enye, neitodol pooki naas, naa keitodol kulie yasat sapuki naalang kuna, pee ing'asiasia intae.

²¹Ore anaa enaitopiu Papa ilootuata neisho ninche enkishui nejia sii ninye etiu Enkerai enye eisho enkishui, oloyieu neisho.

²²Amu kedede meiguanare hoo Papa oltung'ani, kake eishoo ninye Enkerai enye enkiguana pooki,

²³pee eyanyitu pooki Enkerai anaa enayanyit Papa. Ore pooki ng'ae lemeyanyit Enkerai, nemeyanyit Papa oirriwua ninye.

²⁴Kesipa, kesipa, ajoki intae, ore oloinining'u ororei lai, neiruk ilo laairriwua, keeta enkishui oo ntarasi, nemejing enkiguana, kake etupukuo te keeya ajing atua enkishui.

²⁵“Esipa, esipa, ajoki intae, kelotu enkata, netii taata, naning ilootuata oltoilo le Nkerai e Nkai, ore lelo ootoning'o neishu.

²⁶Amu ore anaa enaata Papa enkishui makewan, nejia sii eikuna aisho Enkerai metaa keeta enkishui makewan;

²⁷enyaaka sii aisho enkitoria pee eiguanare, amu Enkerai e Tung'ani ninye.

²⁸Eming'asia te na, amu kelotu enkata nayooki pooki ootii nkuraren aaning oltoilo lenye.

²⁹Neipang'u; ore ilootaasa isupati nejing empiunoto e nkishui; ore ilootaasa intorrok nejing empiunoto e nkiguana.

³⁰“Maidim ataasa toki te nkitoria ai makewan; aiguanare anaa enaning; naa enoo sipat enkiguana ai, amu mme eyieunoto ai aing'oru, kake eyieunoto e Papa laairriwua.

³¹Te naishakenoki makewan, nemesipa shakenisho ai.

³²Etii likae laaishakenoki, nayiolo ajo ore ilo laaishakenoki kesipa shakenisho enye.

³³Irriwakita Yohana olkilikuai, neishakenoki esipata.

³⁴Kake mang'amaa nanu shakenisho naing'uaa tung'ani, kake kairo nanu kuna baa pee ijeuu.

³⁵Netaa Yohana oltaa oinuaaki newang, nitonyorraitie intae aang'idakino te nkiti kata ewang'an enye.

³⁶Kake ore shakenisho naata nanu naa eikitok alang ina e Yohana; amu ore isiaaitin naaishoo Papa maitabai, nena siaaitin naasita ninche maate naishakenoki nchere, Papa laairriwua.

³⁷Ore Papa laairriwua, ninye makewan laaishakenoko. Eitu aekata ining'ining'i intae oltoilo lenye, neitu idolidolo eneikununo;

³⁸nimiaatata ororei lenye eton tiatua intae, amu ore ilo oirriwua ninye nimirukuruku.

³⁹Ijurrujurru intae ilkigerot amu idamumu aajo ninche itumiemie enkishui oo ntarasi, naa kulo kigerot lelo laaishakenoki nanu.

⁴⁰Niminyorraa intae aapuonu enatii pee itumutumu enkishui.

⁴¹Mang'amu nanu enkitoo te tung'ani,

⁴²kake kayiolo intae ajo, miatata enyorrata e Nkai tiatua ate.

⁴³Aewuo te nkarna e Papa, nimiking'amumu intae nanu. Te nelotu likae te nkarna enye makewan ilo intae ingamumu.

⁴⁴Inyorrinyorro aisisata maate, kake mitemiteme aaing'oru enkisisa te Nkai nara openy; kaji naa inkoko pee kirukuruku nanu?

⁴⁵Emijojo ake kaitang'or intae te Papa. Etii oloitang'or intae naa Musa laa ninye isiligigi.

⁴⁶Te naa iruko Musa, anaata kirukuruku sii nanu, amu imbaa aainei eigero ninye.

⁴⁷Amaa, ti nimirukuruku ilkigerot lenyena, kaji nkoko ti nirukuruku irorei laainei?”