Read Maasai Bible – Biblia Sinyati Yohana 6 Bible Online

Yohana 6 - Maasai Bible – Biblia Sinyati bible

Yohana 6

¹Ore pee eidipayu kuna baa nelo Yesu alang enaiposha e Galilaya, aa taa enaiposha e Tiberia.

²Netii olorere kumok osujita, amu etoduaa ilmonek lenyena ooitaasita iltamuoyia.

³Neilepaki Yesu oldoinyo neton teine te nebo o lkipaareta lenyena.

⁴Netinyikua Pasaka, aa osirua loo Lyahudi.

⁵Ore pee eraposhu Yesu nkonyek enyena nedol esiamo kitok elotu enetii, neikilikuan Yesu Filipo ajoki, “Kaji kinyang'unye mukateni pee etum kulo tung'ana aainosa?”

⁶Ketejo nejia aa ketem, amu keyiolo ninye makewan enaitaas.

⁷Newaliki Filipo ajoki, “Mebaiki ninche inaainosieki dinarii iip are, te neishori pooki ng'ae enkiti.”

⁸Ore Andrea, obo loo lkipaareta lenyena, olalashe le Simon Petero, nejoki ninye,

⁹“Etii enkiti ayioni natii ene naata mukateni imiet e shairi o sinkir aare; kake kainyoo ninche too lkumok ooba inji?”

¹⁰Nejo Yesu, “Entotona ltung'ana.” Etii ine wueji nkujit oleng, netoni taa ltung'ana, nebaya esiana oo lewa nkalifuni miet.

¹¹Nedumu taa Yesu nena mukateni, neishooyo enashe neoriki lelo ootoni; neikunaki sii nejia isinkir anaa enatayieutua ninche.

¹²Ore pee eraposho ninche nejoki ninye lkipaareta lenyena, “Enturrurru ilmong'oishi ootelekutua pee meimin toki.”

¹³Neiturrurru taa ninche, neiput nkikapuni tomon o aare ilmong'oishi loo naduoo mukateni miet e shairi ootelekutua lelo ooinosa.

¹⁴Ore lelo tung'ana ootoduaa ina kitoduaata nataasa Yesu nejo, “Kesipa ele oloiboni olotu enkop.”

¹⁵Ore Yesu, etayiolo ajo kepuonu ninche aaibung ninye te ngolon aaitaa olaiguanani neiwuang ninye openy arrinyokino oldoinyo.

¹⁶Ore pee eaku teipa nedoiyio lkipaareta lenyena aapuo enaiposha.

¹⁷Ore pee ejing atua empeut, neaku kepuo aalang enaiposha aalang'aki Kapernaum. Neidipa atomisimiso, neton eitu elotu Yesu enetii ninche;

¹⁸neiterua enaiposha ailugo, amu etukutua osiwuo kitok.

¹⁹Ore pee eidip aatukurtoi empeut nkilomitani miet aashu ile nedol Yesu eloito te shumata e naiposha elotu anyikaki empeut; neureishoyu ninche.

²⁰Nejoki Yesu ninche, “Nanu ele; emiureishoyu.”

²¹Neyieu taa neng'amu aapik empeut, ore nabo kata nebaiki empeut enkop duoo napuo.

²²Ore te nkolong nasujita ina nedol enang'ole siamo naitashe te lido kekun le naiposha nchere, metii ai peut ine nabo ake, neitu eiriamariyie Yesu lkipaareta lenyena ajing atua empeut amu eshomo lkipaareta lenyena oopeny.

²³Kake ore ake eyia, eetuo mpeuti te Tiberia aanyikaki ine wueji neinosie mukateni eidipa Olaitoriani aishooi enashe.

²⁴Ore te nkaraki ina, ore pee edol esiamo ajo metii Yesu ine anaa lkipaareta lenyena, nejing ninche oopeny atua e mpeut nepuonu Kapernaum aaing'oru Yesu.

²⁵Ore pee etum lelo tung'ana Yesu te lido kekun le naiposha, nejoki ninye, “Rabi kanu iyeuo ene?”

²⁶Newaliki Yesu ninche nejoki, “Kesipa, kesipa ajoki intae, ore pee king'oruru intae nanu, mme te nkaraki nitoduaa ilmonek kake te nkaraki ninosa mukateni niraposhosho.

²⁷Emisiayu endaa narruoyo kake esiaayu idia daa nabikoo nayau enkishui nemeish, naisho intae Enkerai e Tung'ani, amu ninye etipika Enkai Papa olmishire lenye.”

²⁸Nejoki ninche ninye, “Kaji kinko pee kitum aataas isiaaitin e Nkai?”

²⁹Newaliki Yesu ajoki ninche, “Ena esiaai e Nkai, pee irukuruku ilo oirriwua ninye.”

³⁰Nejoki taa ninche ninye, “Kaa kitoduata ias, pee kidol nikiruk iyie? Kaa iasita iyie?

³¹Einosa iloo papa enapa daa naing'uaa keper ti ong'ata, anaa enaigeroki aajo, ‘Eishoo ninche emukate naing'uaa keper meinosa.’ ”

³²Nejoki Yesu ninche, “Esipa, esipa ajoki intae, eitu eisho intae Musa emukate naing'uaa keper. Kake keisho intae Papa lai ina mukate nasipa naing'uaa keper.

³³Ore emukate naishoru Enkai naa ina nadou aing'uaa keper neisho enkop enkishui.”

³⁴Nejoki ninche ninye, “Lo Kitok, inchoo iyiook anaa ake ina mukate.”

³⁵Nejoki Yesu ninche, “Ara nanu emukate e nkishui; ore ololotu enatii metum esumash, naa ore olaairuk nanu meitoki ai kata atir enkure.

³⁶Kake atiaaka intae nchere, kitoduaa kake eton mirukuruku.

³⁷Ore pooki laaisho Papa kelotu enatii, ore ololotu enatii nemanang'aa boo katukul,

³⁸amu atadowuo aing'uaa Keper neme pee alotu aas eyieunoto ai, kake eyieunoto e ilo laairriwua.

³⁹Ena eyieunoto e ilo laairriwua inchere pee maiturraa hoo obo le lelo laaishoo, kake kaitopiu nanu ninche te nkolong e nkiting'oto.

⁴⁰Amu ena eyieunoto e Papa inchere, ore pooki odol Enkerai neiruk ninye, netum enkishui nemeish; naa kaitopiu nanu ninye te nkolong e nkiting'oto.”

⁴¹Neaku keing'unyung'unyaki Lyahudi ninye, te nkaraki netejo, “Kara nanu emukate natadowuo aing'uaa keper.”

⁴²Nejo ninche, “Aime Yesu ele, enkerai e Yosef, likiyiolo menye o ng'otonye? Kaji naa etiu pee etejo, ‘Atadowuo aing'uaa keper?’ ”

⁴³Newaliki Yesu ajoki ninche, “Eming'unyung'uny maate.

⁴⁴Metii oltung'ani oidim aeu enatii, te neme Papa laairriwua oyietu ninye enatii; naa kaitopiu nanu ninye te nkolong e nkiting'oto.

⁴⁵Eigeroki too mbaa oo loibonok le Nkai aajo, ‘Naa keaku Enkai naiteng'en pooki.’ Ore naa pooki ng'ae otoning'o neiteng'ena kewan te papa nelotu enatii.

⁴⁶Mme taa ketoduaa hoo obo Papa, leme ilo oing'uaa Enkai, ninye otoduaa Papa.

⁴⁷“Esipa, esipa ajoki intae, ore olooiruk keeta enkishui nemeish.

⁴⁸Ara nanu emukate e nkishui.

⁴⁹Einosa loo papaai linyi mana ti ong'ata netuata.

⁵⁰Ena mukate nadou aing'uaa keper, ore olonya ninye nemeye.

⁵¹Ara nanu emukate naishu natadowuo aing'uaa keper. Ore pooki ng'ae onya ena mukate neishu intarasi; naa ore emukate naishoru naa osesen lai, te nkaraki enkishui e nkop.”

⁵²Neaku keishankarra Lyahudi aaitirrishakino maate, ejo, “Kaji eiko te neidim aishoo iyiook ele tung'ani osesen lenye mainosa?”

⁵³Nejoki Yesu ninche, “Esipa, esipa ajoki intae, te neitu inyanya osesen le Nkerai e Tung'ani niokioko osarge lenye, miaatata enkishui tiatua intae.

⁵⁴Ore olonya osesen lai neok osarge lai, keeta enkishui nemeish, naa kaitopiu nanu ninye te nkolong e nkiting'oto.

⁵⁵Amu endaa nasipa osesen lai, naa eokoto nasipa osarge lai.

⁵⁶Ore olonya osesen lai neok osarge lai, neton tiatua nanu naton nanu tiatua ninye.

⁵⁷Ore anaa enaairriwua Papa oishu, naishuyie nanu Papa, nejia sii etiu elde laanya nanu, nanu eishuyie.

⁵⁸Ena mukate natadowuo aing'uaa Keper, mme anaa enapa nainosa loo papa, netuata; ore olonya ena mukate neishu ntarasi.”

⁵⁹Etejo Yesu kuna baa tiatua enkaji e ntumo, eiteng'enisho te Kapernaum.

⁶⁰Ore pee ening ilkumok loo lkipaareta lenyena kuna, nejo, “Kegol ele rorei. Aing'ae oidim atoning'o?”

⁶¹Neyiolou Yesu makewan nchere keing'unyung'uny lkipaareta lenyena te nkaraki ina, nejoki ninche, “Amaa keikob intae ena?

⁶²Oo naa ti nidolidolo Enkerai e Tung'ani eilepieki enetii apa te dukuya?

⁶³Enkiyang'et naishoru enkishui; meeta osesen dupoto. Ore lelo rorei latiaaka intae, enkiyang'et naa enkishui.

⁶⁴Kake etii kulikae te intae leton meiruk.” Amu keyiolo apa ake Yesu te nkiterunoto ajo kakua leitu eiruk, naa kalo olo akaldaa ninye.

⁶⁵Nejo ninye, “Te nkaraki ina atiaaka intae nchere meetae oloidim aeu enatii, te neme keishoro te Papa.”

⁶⁶Ore ebaiki ina kata, te nkaraki nena, nerrinyo ilkumok loo lkipaareta lenyena neitu eitoki aairiamariyie ninye.

⁶⁷Nejoki taa Yesu lelo tomon o aare, “Amaa, aiyieuu sii intae nipuopuo?”

⁶⁸Newaliki Simon Petero ajoki ninye, “Lo Kitok, aing'ae kipuo enetii? Iyie oata rorei le nkishui nemeish,

⁶⁹nikiruko iyiook nikitayioloito nchere, ira iyie Ilo Obo Sinyati le Nkai.”

⁷⁰Newaliki Yesu ninche ajoki, “Keitu agelu intae, pokira tomon oaare, ore obo linyi naa oloirirua?”

⁷¹Eimaka Yudas olayioni le Simon Iskariot, amu obo apa ninye te lelo tomon oaare, laa ninye oyooki akaldaa.