Read Maasai Bible – Biblia Sinyati Yohana 8 Bible Online

Yohana 8 - Maasai Bible – Biblia Sinyati bible

Yohana 8

¹Kake eshomo Yesu Oldoinyo loo Loirienito.

²Ore enasirie neitoki Yesu ajing atua enkaji e Nkai, nepuonu ltung'ana pooki enetii ninye; neton neiteru aiteng'en ninche.

³Nerikoki ninye lasirak o Lfarisayo enkitok nairrashaki eloloito. Neitasheyie ninye te mpolos oo ltung'ana.

⁴Nejoki, “Lo Aiteng'enani, eirrashaki ena kitok eloloito.

⁵Ore tiatua nkitanapat e Musa neitanapa iyiook mataar too soito nkituaak naatiu nejia; aijo iyie aa tialo ninye?”

⁶Netejo ninche nji, aa entemata etem, pee etum aaitang'oro Yesu. Kake eirruge Yesu nesir enkop to lkimojino.

⁷Ore pee ekurraki aaikilikuan nedumunye, nejoki ninche, “Enchoo eng'as olinyi lemeeta ng'ok, anang ninye to soit.”

⁸Neitoki aigil airrugo, asir enkop to lkimojino.

⁹Ore pee ening ninche ina, neiteru aapuo moo obo, aiteru too lbotor lenye, neing'uari Yesu aa ninye ake, o enaduoo kitok eitashe te mpolos.

¹⁰Nedumunye Yesu nejoki ninye, “Naa kitok, koree ninche? Aimeetae olikitudung'oko enkiguana?”

¹¹Nejoki, “Metii Lo Kitok.” Nejoki Yesu, “Maaiguanare sii nanu. Shomo, ore ebaiki taata mintoki aas ing'ok.”

¹²Neitoki Yesu airorie Ilfarisayo nejoki, “Kara nanu ewang'an e nkop. Ore olaasuj nanu nemelo ai kata te naimin, kake ketum ewang'an e nkishui.”

¹³Nejoki Lfarisayo ninye, “Iyie oishakenoki kewan. Mesipa shakenisho ino.”

¹⁴Newaliki Yesu nejoki, “Te naa kaishakenoki duoo ninye kewan, kesipa shakenisho ai, amu kayiolo enaing'uaa nayiolo enalo; kake miyiololo intae enaing'uaa, aashu enalo.

¹⁵Inguanarere intae to sesen; maiguanare nanu oltung'ani.

¹⁶Kake te naiguanare, nesipa enkiguana ai, amu mme nanu ake, kake nanu o ilo laairriwua.

¹⁷Etisiraki tiatua nkitanapat inyi nchere, kesipa shakenisho oo ltung'ana aare.

¹⁸Kara nanu ilo olimu shakenisho enye makewan, naa kaaishakenoki nanu Papa laairriwua.”

¹⁹Nejoki taa ninche ninye, “Koree Papaai lino?” Newaliki Yesu ajoki, “Mikiyiololo nanu nimiyiololo sii Papa te naa eikitayioloito nanu, naa anaata iyiololo sii ninye Papa.”

²⁰Eiroro Yesu kulo rorei te wueji nepiki mpisai, eiteng'enisho te Nkaji e Nkai. Nemetii oltung'ani oibung'a ninye, amu eton eitu ebau esaa enye.

²¹Neitoki Yesu ajoki ninche, “Kalo nanu, naa eiking'oruru intae, kake iyeye tiatua ing'ok inyi. Ore enalo mindimidimi aaetu.”

²²Nejo Ilyahudi, “Kear kewan? Amu etejo, ‘Ore enalo nanu nimindimidimi aaetu’?”

²³Nejoki ninye ninche, “Irara intae ile abori; nara nanu ole shumata; nirara intae ile na kop; nemara nanu ole na kop.

²⁴Ore teina atiaaka intae, iyeye tiatua ing'ok inyi amu tinimirukuruku nchere ‘Ara nanu’ niyeye tiatua ing'ok inyi.”

²⁵Nejoki ninche ninye, “Aira iyie ng'ae?” Nejoki Yesu ninche, “Anaa ake ina natolikio intae te nkiterunoto.

²⁶Kaata mbaa kumok naimaki tialo intae, naiguanare; kake olaairriwua ninye osipa, naa inatoning'o te ninye, ninche ajoki enkop.”

²⁷Neitu eyiolou ninche inchere Papa eimaki.

²⁸Nejoki Yesu ninche. “Tinilepiepie intae Enkerai e Tung'ani niyiolouu nchere ‘Kara nanu’, nemeeta nanu enaas te nkitoria ai makewan, kake kairo kuna baa pooki anaa enaatolikio Papa.

²⁹Ore olaairriwua netii te nebo nanu. Eitu aaing'uaa aa nanu ake, amu inaaitiship ninye oshi ake aas.”

³⁰Ore ejoito kuna baa neiruk ilkumok ninye.

³¹Neitoki Yesu ajoki lelo Yahudi ooiruko ninye, “Tinitonini to rorei lai nirara lkipaareta laainei oosipa;

³²naa iyiolouu esipata; nelaku intae esipata.”

³³Newaliki ninche ninye aajoki, “Kira eishoi e Abraham; neitu ae kata kiaaku isinkan le likae tung'ani; kaji etiu pee ijo iyie, ‘Kelakuni intae?’ ”

³⁴Newaliki Yesu ninche nejoki, “Esipa, esipa, ajoki intae, osinka loo ng'ok pooki ng'ae oas ing'ok.

³⁵Mebik osinka te nkaji o kenya kake kebik enkerai o kenya.

³⁶Te nelaku intae ina Kerai, neaku ilakunono tukul.

³⁷Kayiolo ajo irara eishoi e Abraham; kake king'oruru intae nanu aar, amu metii atua intae ororei lai.

³⁸Kalimu enatoduaa te Papa; niaasiasa intae enitoduakita papaai linyi.”

³⁹Newaliki ninche aajoki ninye, “Abraham papa lang.” Nejoki Yesu ninche, “Tenaa irara nkera e Abraham, anaata iasiasa nena naataasa Abraham;

⁴⁰kake king'oruru taata intae aar matua oltung'ani otolikio intae esipata natoning'o te Nkai. Eitu eas Abraham ena.

⁴¹Iasiasa intae enataasa papaai linyi.” Nejoki ninche ninye, “Mikitaluno[3]; kiaata Papa obo, naa Enkai.”

⁴²Nejoki Yesu ninche, “Te naa Papaai linyi Enkai, anaata kinyorrinyorro, amu enetii Enkai aing'uaa, pee atii ene, Neitu alotu makewan, kake ninye laairriwua.

⁴³Kainyoo pee mining'ung'u intae enajo? Te nkaraki nimindimidimi aatoning ororei lai.

⁴⁴Irara le papaai linyi Sheitani, ore eyieunoto inyi naa easata oo ng'uarrat naaing'uaa papaai linyi. Olarani apa ake ninye te nkiterunoto, meitashe ninye te sipata amu metii esipata atua ninye. Te nejo ninye elejare, nejo te risioroto olkuaak lenye makewan; amu olalejani naa menye le lejare.

⁴⁵Kake ore nanu te nkaraki naa esipata airo, nimikirukuruku.

⁴⁶Kalo linyi laatoduaaka ng'ok? Amaa te nairo esipata kainyoo pee mikirukuruku intae nanu?

⁴⁷Ore ilo le Nkai nening irorei le Nkai. Ore te nkaraki ena nimining'ining'i intae amu mirara le Nkai.”

⁴⁸Newaliki Lyahudi aajoki Yesu, “Keitu kisip ti nikijo aira Osamariai naa iata oloirirua?”

⁴⁹Newaliki Yesu ajoki, “Maata nanu oloirirua, kake Papa ayanyit, nikioruru intae enkanyit ai.

⁵⁰Maing'oru nanu enkitoo ai makewan; kake ketii oloing'oru naa ninye oladung'oni le nkiguana.

⁵¹Esipa, esipa, ajoki intae, te neibung oltung'ani ororei lai nemedol ai kata keeya.”

⁵²Nejoki Ilyahudi ninye, “Kitisiputua taata aajo iata oloirirua. Etua Abraham naa nejia sii etiu iloibonok le Nkai, eji nijo iyie, ‘Ore pooki ng'ae oibung ororei lai meishamisham ai kata keeya?’

⁵³Ai iyie olkitok alang papa lang Abraham, otua? Netuata sii loibonok le Nkai. Aing'ae doi iyie ijo aitaa kewan?”

⁵⁴Newaliki Yesu ajoki, “Te naa ainanu oitaa kewan kitok, neme toki enkitoo ai. Papa doi laaitaa kitok ilo lijojo intae, Enkai ang ninye.

⁵⁵Kake miyiololo doi intae ninye, nayiolo nanu ninye; naa te najo nanu mayiolo ninye, naaku olalejani anaa intae; kake kayiolo doi ninye nasuj ororei lenye.

⁵⁶Eting'ide papaai linyi Abraham pee edol enkolong e lotunoto ai; nedol ninye, neng'ida.”

⁵⁷Nejoki Lyahudi ninye, “Eton eitu intabaya ilarin onom, paa nijo kitoduaa Abraham iyie?”

⁵⁸Nejoki Yesu ninche, “Esipa, esipa, ajoki intae, ore eton meetae Abraham, ‘Atii nanu.’ ”

⁵⁹Nedumu ninche isoito pee ear, kake eisudori Yesu, nepuku te Nkaji e Nkai.