Read Maasai Bible – Biblia Sinyati Iasat 10 Bible Online

Iasat 10 - Maasai Bible – Biblia Sinyati bible

Iasat 10

¹Etii apa Kaisaria, oltung'ani oji Kornelio, laa osajini kitok te sirit oo sikarini oo Roma naji, “Esirit oo Ltalian.”

²Oltung'ani apa aseremani neure Enkai ninye o enkaji enye pooki, naa aminin naleng too ltung'ana aisinak loo Lyahudi, neomon ninye Enkai anaa ake.

³Ore nabo olong noo saa naaudo e ndama, nedol te nduaata eibale olmalaika le Enkai elotu enetii, nejoki, “Kornelio!”

⁴Ore ninye, nekurraki nkonyek te nkirutoto nejoki, “kainyoo lo Kitok?” Nejoki olmalaika ninye, “Etadamua Enkai enkomono ino o eleng'on ino o lng'ur.

⁵Irriwai naa taata ltung'ana meshomo Yopa, aariku Simon oji Petero,

⁶laa olomoni te nkaji e likae oji Simon, olaitobirani loo lonito, omanya embata e naiposha.”

⁷Ore pee elo ilo malaika aing'uaa ninye, neipot ilaisiaayiak aare le nkaji enye, o sikari obo oserem Enkai, oisiritore ninye anaa ake.

⁸Ore pee einosaki nena pooki naataasate neirriwaa ninche Yopa.

⁹Ore enkolong natusujua ina, etii lelo enkoitoi, etinyikakita ina anasa, nelo Petero aomon te shumata enkaji, etaa enaipirie enkolong.

¹⁰Netir Petero esumash oleng, neyieu endaa. Kake ore eton eitobiritai, neimug neidetidet.

¹¹Nedol shumata etabole nedou entoki naaijo olkarasha oililio too lcholo pokira oong'uan eililiunye adoiki enkop;

¹²nebore ng'uesi pooki oo nkejek maa ong'uan o naaikurtutari te nkop o motonyi e shumata.

¹³Nelotu oltoilo ojoki ninye, “Inyo Petero, teyiang'a nosa.”

¹⁴Kake etiaaka Petero, “Mme nejia Olaitoriani; amu eitu ai kata anya nanu entoki naiduruk anaa enturuj.”

¹⁵Neigil ake oltoilo alotu enetii nejoki, “Ore entoki naa Enkai naitukuo, nimintaa iyie enturuj.”

¹⁶Neigilieki ina bae katitin uni: neito ilo karasha Keper.

¹⁷Ore enoshi kata eing'asie ninye Petero oleng eiguana makewan aing'oru enajoki ina duaata natupukoko, nemaniki lang'ole tung'ana ooirriwua Kornelio, ooikilikuanu enkaji e Simon ooitashe te kishomi.

¹⁸Neipotisho aaikilikuanu te naa ketii Simon oji Petero ina aji.

¹⁹Ore eton egira Petero aibirribir ina natamanikia, nejoki Enkiyang'et ninye, Ng'ura, “Nelelo ltung'ana okuni liking'oru.

²⁰Kake inyo tadoi shomo, naa iriamariyie, nimitum ake olng'ash, amu nanu oirriwua ninche.”

²¹Nedoyio Petero alo enetii lelo tung'ana, nejoki, Ng'ura, “Nanu doi ele ling'oruru; kainyoo nayawua intae?”

²²Nejoki ninche ninye, “Kornelio, osajini kitok, oltung'ani supat oserem Enkai naa yioloti eyanyit olorere pooki loo Lyahudi, eirriwaka Enkai olmalaika neirorie ajoki mikirriwaki olkilikuai wou shomo enkaji enye, meshomo ninye aning irorei lijoki.”

²³Nepuonu aji neisho Petero ninche enkirragata. Ore pee ekenyu neinyototo airiamariyie ninche, nerik kulikae alashera ooing'uaa Yopa aitaa encholiek.

²⁴Ore te nkolong nasujita ina nejing Kaisaria. Neanyita Kornelio ninche, neipoto aiturrur olmarei lenye pooki o lchoreta le latia enye.

²⁵Ore pee elotu Petero ajing ine, nenang'are Kornelio ninye nebatata te nkalo oo nkejek enyena aserem.

²⁶Kake eitasheyie Petero ninye, nejoki, “Inyo ntasho. Kara sii nanu makewan oltung'ani ake.”

²⁷Ore eirorie, nejing aji, neinepu etasotote ltung'ana kumok:

²⁸nejoki ninche, “Iyiololo intae pooki aajo kemito ena amu meshulare oltung'ani loo Lyahudi ole likae orere, nemejing enkaji enye; paa Enkai naatiaaka nanu mijo ake enturuj likae tung'ani nimijo mesinya;

²⁹naa ina pee aaipotoki nalotu neitu aing'ash. Naikilikuan naa intae ajoki, kainyoo pee kietuo aaipot?”

³⁰Nejoki Kornelio ninye, “Ong'uan ade taata nkolong'i naashomo, ore aomonito anaa oshi ake saa naaudo e ndama te nkaji ai; ng'ura, neitashe oltung'ani oimerlel nkilani te dukuya nanu,

³¹nejo, ‘Kornelio! Etoning'oki enkomono ino, netadamua Enkai eleng'on ino o lng'ur too laisinak.

³²Irriwai naa lkiliku Yopa, meipoto Simon oji Petero; naa olomoni ninye te nkaji e Simon laa olaitobirani loo lonito, omanya embata e naiposha.’

³³Naairriwaki ltung'ana teina kata ake; nintobira naa iewuo. Ore naa etiu nejia, noolo iyiook pooki ootii ene te dukuya Enkai, pee kining nena pooki nikintanapa ninye tejo.”

³⁴Nebol Petero enkutuk enye nejo, “Kesipa atayiolo nchere ore Enkai, meeta olkep,

³⁵kake ore pooki ng'ae oure ninye aa ololorere ora, neas isupati te Enkai, nenyorraa ninye.

³⁶Iyiololo intae olapa rorei oirriwaka nkera oo Siraeli, otolikioyioki lomon supati lo sotua te Yesu Kristo (olaa ninye Olaitoriani le pooki),

³⁷ilo rorei ilo liyiololo intae maate, oitadarayioki te Yudea pooki, aaiteru te Galilaya, eidipe enkibatisa apa nalikioo Yohana.

³⁸Yesu le Nasaret etuputo Enkai te Nkiyang'et Sinyati o engolon nelotoo aas isupati, neishiunye lelo pooki ooibooko oloirirua enkop, amu ketii apa Enkai te nebo ninye.

³⁹Nikira iyiook shakeni le nena baa pooki naataasa te nkop oo Lyahudi o te Yerusalem. Ninye doi etaara ninche, aashe to lchani.

⁴⁰Neitopiu Enkai ninye te nkolong e uni, neishoru metodoli,

⁴¹neme too ltung'ana pooki, kake te lelo apake ootegelua Enkai te dukuya metaa lchakenini, naa iyiook lelo ootang'arie endaa nikiok te nebo ninye eidipa atopiu too lootuata.

⁴²Ninye oitanapa iyiook matolikioi too ltung'ana pooki, nikinchakenoki nchere ninye osiruno te Enkai metaa oloiguanaki ilooishu o lootuata.

⁴³Ninye eitaikitia iloibonok le Nkai pooki shakenisho, nchere ore pooki oiruk enkarna enye netum empalakinoto oo ng'ok.”

⁴⁴Ore eton ejoito Petero kulo rorei, nedoiki Enkiyang'et Sinyati lelo pooki ootoning'o ilo rorei.

⁴⁵Ore pee edol lelo airukok loo Lyahudi neing'asia, lelo taa ooiriamunore Petero, te nkaraki natubukokoki sii ninche Loreren enkishorunoto e Nkiyang'et Sinyati.

⁴⁶Amu ketoning'o ninche eiro te kulie kutukie aaisis Enkai. Newaliki Petero ajoki,

⁴⁷“Keetae oltung'ani omit ajo meibatisai kulo tung'ana te nkare ootang'amutua Enkiyang'et Sinyati anaa enikitang'amutua apa sii iyiook?”

⁴⁸Neitanapisho meibatisai te nkarna e Yesu Kristo Nesai ninche ninye metobiko nkuti olong'i.