Read Maasai Bible – Biblia Sinyati Iasat 16 Bible Online

Iasat 16 - Maasai Bible – Biblia Sinyati bible

Iasat 16

¹Nelotu sii Paulo Derbe o Listra, naa eetae apa oloiteng'eni teine oji Timoteo, olayioni le nkitok Yahudi nairuko, kake Olyunani menye.

²Neimaki lalashera ninye aarrep ilootii Listra o Ikonio.

³Ninye etegelua Paulo pee eiriamariyie; neibung nemurat te nkaraki lelo Yahudi le ilo kirine; amu keyiolo pooki aajo Olyunani apa menye.

⁴Ore epuoito te nkoitoi neimaa nkang'itie, neliki inapa baa meibung'a, naaitanapishote lkipaareta o lpayiani ootii Yerusalem.

⁵Metaa nedupayu nena sirito enkirukoto, neponari esiana oo lairukok anaa ake.

⁶Neimaa olkirine le Frigia o Galatia, etorishie Enkiyang'et Sinyati pee melikioo ilo rorei te Asia.

⁷Ore pee epuonu aaipirare Misia, netem aajo matijing Bitinia; neitu eisho Enkiyang'et e Yesu meshomo;

⁸neim embata e Misia nedou aapuonu Troas.

⁹Neipang'aki Paulo enduaata kewarie o ltung'ani oitashe le Makedonia, osaita ninye ajoki, “Wou talang'u Makedonia, taretu iyiook.”

¹⁰Ore pee edol Paulo ina, neiteru nabo kata aing'oru elototo nalo Makedonia, etumuta ajo Enkai naipoto iyiook maape aaliki ninche ele rorei supat.

¹¹Ore pee kijing empeut te Troas, nikipolos aaitoriokino Samotrake, nikiyiooki te ntaaisere aapuo Neapolis;

¹²nikidumunye teine aapuo Filipi; enkanasa e Makedonia, naa ninye enkanasa kitok te ilo kerenket, naa abori enkitoria oo Roma etii. Nikibik teina anasa nkolong'i kumok.

¹³Ore te nkolong e Sabato nikimpang auluo kishomi e ina anasa, te mbata o lkeju, kijo ebaiki neetae ewueji e nkomono teine; nikitoni, aairorie nkituaak naatoni te nebo.

¹⁴Netii enkitok naji Lidia naa enkamirani oo lkarash oodo, naa ene nkanasa naji Tiatira, naserem ninye Enkai, nening iyiook. Nebol Olaitoriani oltau lenye, metoning'o mbaa naairoro Paulo.

¹⁵Ore pee eibatisai ninye o enkaji enye, nesai iyiook, ajoki, “Te nikitoduaa intae aajo kaisiligayu to Laitoriani, wootu entijing enkaji ai, entotoni.” Neidimu iyiook.

¹⁶Neaku ore kipuoito ine wueji e nkomono, nenang'are iyiook esila naata e nkiyang'et e naibon nadol imbaa, netopokie lkituaak lenyena ninye too masaa naayaki teina aibon.

¹⁷Nesuj ninye Paulo o iyiook nebuaku eishir ajo, “Ore kulo tung'ana ilaisiaayiak le Nkai natii Shumata Aisul te pooki, naa intae eliki enkoitoi e njeunoto.”

¹⁸Neiko nejia nkolong'i kumok. Kake ore Paulo, etanyamala oleng neibelekenya nejoki ilo oirirua, “Aaisikong iyie te nkarna e Yesu Kristo tupuku tung'uai ninye.” Nepuku aing'uaa teina kata ake.

¹⁹Kake ore pee edol ilopeny ina tito aajo eshomo osiligi le ina dupoto enye, neibung Paulo o Sila, neikurtutaa aaya enetii laitoriak te nemirishoreki,

²⁰ore pee eyau enetii iladung'ok le nkiguana, nejo, “Ore kulo tung'ana, loo Lyahudi, eitanyamalita naleng ena anasa ang,

²¹aalimu lkerreti lemeishoruno matang'amai aashu kisuj, kira Iroma.”

²²Nedumakino esiamo pooki te nebo nepolosaki ilkilani lenye aaoru, neitanapisho meidong'i too ng'usidin.

²³Ore eitudupaki ninche iwoshot kumok, nenang'akini jila, neitanapi olarriponi meitirrisha oleng.

²⁴Ore pee eng'amu ilo ina kitanapata, nepik ninche jila e atua, neen nkejek enye akurraki too lgarrameta.

²⁵Kake ore etaa keitorito enkewarie eomonito Paulo o Sila neranyaki Enkai isinkolioitin; neinining'ito ilooena ninche;

²⁶ore nabo kata, neikirikira enkop, neigirigiro lkitamanyunot le ina aji e jila. Nebolo nabo kata nkutukie enyena pooki; nelaa lgarrameta loo looena pooki.

²⁷Ore pee einyiototo olarriponi etuputuoki too njo, nedol inkutukie e jila ebolo, neshutu olalem neaku kejo aar kewan, ejo keisika ilooena aapuo.

²⁸Kake etabuaa Paulo to ltoilo sapuk, nejo, “Miar kewan! Kitii pooki ene!”

²⁹Neipotu lkilang'ilang'eta, neng'orokino atua, eikirikira te nkuretisho, nebatatakino Paulo o Sila,

³⁰neitupuku, nejoki, “Lo kituaak, kaji aiko pee ajeu?”

³¹Nejoki ninche, “Iruko Olaitoriani Yesu, pee ijeu iyie o enkaji ino.”

³²Neinosaki ninye ororei lo Laitoriani, te nebo o lelo pooki ootii enkaji enye.

³³Nedumu ninye ninche teina kata ake e nkewarie, neisuj nena oshot enye, neibatisae ninye nabo kata o lmarei lenye pooki.

³⁴Neriku ninche enkaji enye, neisho endaa, neshipa oleng o enkaji enye pooki, eiruko Enkai.

³⁵Ore pee ekenyu, neirriu iladung'ok le nkiguana lsikarini nejoki, “Enchoo lelo tung'ana epuo.”

³⁶Neyaki olarriponi le jila Paulo ilo kilikuai, ajoki, “Eirriutua iladung'ok le nkiguana olkilikuai meishori intae enchom, enyoito naa taata naa enchom te seriani.”

³⁷Kake etiaaka Paulo ninche, “Etaara iyiook te dukuya olorere, eitu eiguanareki iyiook, nikira sii iyiook Iroma, netanang'akita iyiook jila; neyieu taata neitupuku iyiook too nkurrat? Mme nejia; kake enchoo epuonu ninche maate aaitupuku iyiook.”

³⁸Nepuo lelo sikarini aainosaki iladung'ok le nkiguana lelo rorei, neureishoyu, etoning'o aajo ile Roma ninche.

³⁹Nepuonu aasai ninche; ore pee eitupuku, neikilikuan te naa kepuo aaing'uaa ina anasa.

⁴⁰Nepuku ninche te jila, nepuo enkaji e Lidia: ore pee eidip aatodol ilalashera, neitagol ninche nepuo.