Read Maasai Bible – Biblia Sinyati Iasat 18 Bible Online

Iasat 18 - Maasai Bible – Biblia Sinyati bible

Iasat 18

¹Ore pee elusoo kuna nedumunye Paulo te Atene, nelotu Korinto.

²Netum Olyahudi obo oji Akuila, laa oinoti le Ponto, naa enalotunye det eing'uaa Italia te nebo o enkitok enye Prisila, te nkaraki naitanapishe olaiguanani kitok Klaudio meshomo Lyahudi pooki aaing'uaa Roma. Nelo Paulo enetii ninche;

³naa ore amu keng'ar enkarriyiano e siaai enye, nebik te nebo ninche, neasisho; amu ilaitobirak loo iimai ninche.

⁴Neiguana anaa ake te nkaji e ntumo too nkolong'i e Sabato ejo ayietu Ilyahudi o Lyunani meiruko.

⁵Ore pee edou Sila o Timoteo te Makedonia, nesheikino ninye Paulo elikioroto o rorei, neishakenoki too Lyahudi nchere Kristo Yesu.

⁶Ore pee egilunore ninche maate ninye nemor, neipiripiroki Paulo ilkilani lenyena nejoki, “Tinimina intae, maata nanu entioto!, Ore ebaiki taata iltung'ana loo Loreren alo enetii.”

⁷Nelo aing'uaa lelo, nejing enkaji o ltung'ani oji Tito Yusto, oserem ninye Enkai, otashare enkaji enye ene ntumo.

⁸Ore Krispas laa ninye oitore ina aji e ntumo, neiruk Olaitoriani, neiruk sii enkaji enye pooki; ore pee ening Ilkorintio kumok neiruk neibatisae.

⁹Nejoki Olaitoriani Paulo nabo olong kewarie eirura, “Miureishoyu, iroro, nimigira;

¹⁰amu atii nanu te nebo iyie. Nemeetae oltung'ani likibaiki aitaas entorrono: amu kumok iltung'ana laainei te na anasa.”

¹¹Nebik Paulo teine olari obo o lapaitin ile, eiteng'enita ninche to rorei le Nkai.

¹²Ore pee eitaai Galio olgafanai loo Roma te Akaia, nedumakino Lyahudi pooki Paulo te nebo, nerik olorika le nkiguana,

¹³ejoito, “Keyiataki ele tung'ani olorere pee eserem Enkai te nkoitoi nemeishoruno too nkitanapat.”

¹⁴Kake ore ejo Paulo abol enkutuk, nejoki Galio Lyahudi, “Te nesipa naaji ajo kembae e ntorroni aashu ene nkarruoisho, lo Yahudi, naa anaata iatata esipata, nang'iri ainining intae.

¹⁵Kake te na kenchankar oo rorei o nkarn o nkitanapat inyi, eng'urai oopeny. Mayieu nanu naaku olarishani loo mbaa naaijo nena.”

¹⁶Nearaa ninche aitung'uaa olorika le nkiguana.

¹⁷Nesar pooki aaibung Sostene, ilo apa oitore enkaji e ntumo oo Lyahudi, neidong te nkalo o lorika le nkiguana. Neitu hoo eshilaa ninye Galio nena baa pooki.

¹⁸Ore te siadi kuna, enyaaka Paulo abik nkolong'i kumok etulusoitie nena, neitanapare lalashera, neked emeli alo Siria, neiriamariyie Prisila o Akuila. Netabarnoki te Kenkrea: amu einosa olmumai.

¹⁹Nepuonu ninche Efeso, neing'uaa Prisila o Akuila teine. Kake eshomo Paulo ajing enkaji e ntumo neishankarrarre Lyahudi.

²⁰Ore pee eji maiboo metobiko oleng, neany;

²¹kake etudumunye nejoki ninche, “Kaitoki ake ashukunye, te neyieu Enkai.” Neked emeli alo Efeso.

²²Ore pee elang'aki Kaisaria, neilep airoroki esirit, neitoki adoyio alo Antiok.

²³Ore pee ebik nkuti olong'i teine, nedumunye alo neimaa olkirine le Galatia, o Prigia aruk nenen, eitagol lkipaareta pooki.

²⁴Neetae Olyahudi oji Apolo, laa te Aleksantria etoiwuoki, nelotu elo Efeso; naa arriyia to rorei naa magilani too lkigerot.

²⁵Neiteng'enaki apa ilo tung'ani te nkoitoi o Laitoriani; naa ore amu oltung'ani oisusunkat oleng, neiro neiteng'enisho abaraki mbaa e Yesu, hoo naa enkibatisa e Yohana ake eyiolo

²⁶neiteru airo te mpijan te nkaji e ntumo. Kake ore pee einining Prisila o Akuila, nerik enkaji enye, neibalakinye Enkoitoi e Nkai aabaraki.

²⁷Ore pee eyieu ninye, nelang alo Akaia, neitagol ilalashera le Efeso ninye nesiraki lkipaareta empalai metang'amu ninye. Ore pee ebaya Akaia neretu naleng lelo laa te nkaraki empiris e Nkai pee eiruko:

²⁸amu etigilunore ninye Ilyahudi te ngolon naa te dukuya ltung'ana eitoduaayie too lkigerot inchere ore Yesu naa ninye Kristo.