Read Maasai Bible – Biblia Sinyati Iasat 19 Bible Online

Iasat 19 - Maasai Bible – Biblia Sinyati bible

Iasat 19

¹Neaku ore etii ninye Apolo Korinto, neimaa Paulo ina kop oo ldoinyo nelotu Efeso, neinepu kulikae ooiteng'eni teine.

²Nejoki lelo, “Itang'amaitie apa Enkiyang'et Sinyati pee irukuruku?” Nejoki ninche ninye, “A'a, keitu ninye ai kata kining aajo keetae Enkiyang'et Sinyati.”

³Nejoki Paulo ninche, “Kaa kibatisa naa apa eibatisaki intae?” Nejoki ninche, “Enkibatisa e Yohana.”

⁴Nejoki Paulo, “Eibatisishe Yohana enkibatisa e nkirridunoto, nejoki olorere, meiruko ilo olotu te siadi ninye, naa, Yesu taa ilo.”

⁵Ore pee ening ina, neibatisae te nkarna o Laitoriani Yesu.

⁶Ore pee eiteleiki Paulo nkaik enyena, nedoiki Enkiyang'et Sinyati ninche: neiro kulie kutukie neibonisho.

⁷Nera lelo tung'ana pooki tomon o aare.

⁸Nejing Paulo enkaji e ntumo neshirraki airo te rishata oo lapaitin okuni, neishankarrarre nesayiaki ninche mbaa naaipirta enkitoria e Nkai.

⁹Kake ore pee eikirnyanya kulikae neitagol onyek, nemor ena oitoi te dukuya olorere, nelo Paulo aing'uaa ninche, negelu lkipaareta, nelo aiteng'enisho anaa ake te nkaji naisumareki.

¹⁰Neidikidik aas ina te rishata oo larin aare; o metaa ore lelo pooki oomanya Asia aa Lyahudi o Lyunani, nening ororei lo Laitoriani.

¹¹Neas Enkai e nking'asia too nkaik e Paulo:

¹²o metaa kenapakini iltamuoyia ilkarash, o nkitampaani o nkarash o sesen le Paulo o nkarash naaisiaaishore. Nepuo nkeyaitin aaing'uaa iltamuoyia, nepuku nkiyang'eta torrok aaing'ua.

¹³Kake enotoki sii kulikae Yahudi oopuaya, ooaraa nkiyang'eta torrok, nedumunye aaku enkarna o Laitoriani Yesu ejokinye nena kiyang'eta, “Aainosie olmumai te nkarna e ilo oji Yesu olikioo Paulo.”

¹⁴Neetae ilayiok oopishana le likae, apolosani kitok, oji Skewa ooikuna ninche nejia.

¹⁵Newaliki enkiyange't torrono ajoki ninche, “Kayiolo Yesu, nayiolo Paulo; kake airara doi intae iloo ng'ae?”

¹⁶Neipidoki ilo apa tung'ani oata enkiyang'et torrono lelo pooki, neidimu ninche aarare, negilu aar, neisikie teina aji meishopo neeta lbaa.

¹⁷Neyiolou pooki ng'ae ina ebaiki Lyahudi o Lyunani oomanya Efeso; nedoiki enkuretisho ninche pooki nerrepi enkarna o Laitoriani Yesu.

¹⁸Nepuonu sii lkumok le lelo ooiruko, neirridu, neibalunye nkiaasin enye.

¹⁹Ore esiana e lelo apa ooasishore ilosekin le naibon neyau mbukui enye aaiturrur: nepejoo edolita pooki ng'ae: neikeni esiana oo mpisai naainosieki neaku ropiyiani naaibor naabaya inkalusuni onom.

²⁰Nejia eikuna ororei lo Laitoriani te magilanisho neponari te ngolon.

²¹Ore pee eiting kuna baa, nemut Paulo openy te Nkiyang'et Sinyati ajo, ore pee eidip aimai Makedonia o Akaia, neitoki alo Yerusalem, nejo, “Ore pee aidip ashomo ine, meeta nchere pee eitu alo Roma.”

²²Ore pee eirriwaa aare le lelo aretok lenyena Makedonia, aa taa Timoteo o Erasto, neng'as ninye makewan abik te Asia te nkiti rishata.

²³Ore ake te nena katitin nedumunye oloilole leme kiti tialo ena Oitoi.

²⁴Amu eetae oltung'ani oji Demetrus, kunoni oitobir mpisai oo sekenke neidong'u too sekenke oo mpisai Artemis naatudupore oleng lelo kunono.

²⁵Nesotu ilo kulikae kunono ooitobir sii ninche nena tokitin, nejoki, “Lo kituaak, iyiololo aajo ena siaai ang oshi kidupore.

²⁶Nidolitata, nining'itoto aajo mme te Efeso ake, kake etaa ore ninye Asia pooki, eibelekenye eilejileja ilo oji Paulo ltung'ana kumok aitapong'oo, ajoki eji mme hoo nkaitin kuna naa too nkaik eitobiri.

²⁷Mme taa doi ena siaai ang ake etarrikio eyookini aamenaa; kake keyooki doi aaku ore ninye enkaji e nkai ng'oruoi kitok naji Artemis neitaai pesho, nebaiki doi ninye nesuluni te sikar enye, ina naa ninye eserem Asia neserem enkop pooki.”

²⁸Ore ake pee ening ninche ina neiput engoro, nebuak aajo, “Kitok ake Artemis oo Leefeso.”

²⁹Neiput olmilo ina anasa; nekuet pooki te nebo aapuo enkaji e nkiguran neikurtutaa Gayo o Aristako, ltung'ana le Makedonia, ooiriamariyie apa Paulo too lotot enyena.

³⁰Ore pee ejo Paulo ajing atua lelo tung'ana, nemitiki lkipaareta.

³¹Ore sii kulikae loo laitoriak le Asia, laa lchoreta lenyena, neirriwaki olkilikuai aasai pee metem ninye makewan alo ina aji e nkiguana.

³²Nebuaku kulikae ejo ena nebuaku kulikae ejo ae: amu eing'oling'ole ina tumo: naa aimeyiolo esejata sapuk ajo kainyoo pee eiturrurroteki te nebo.

³³Neitupukuni Aleksanta tiatua olorere, naa Lyahudi ooturrumoitie. Neyuk Aleksanta ninche te nkaina, eyieu newaliki olorere.

³⁴Kake ore ake pee eyiolou aajo Olyahudi Aleksanta; nebuaku pooki to ltoilo obo neidikidik aaiko nejia te rishata oo saai are ejoito, “Kitok ake Artemis oo Leefeso.”

³⁵Ore ade pee eitigir olasirani kitok le ina anasa olorora, nejo, “Lo lewa le Efeso, keetae pasa oltung'ani lemeyiolo ajo ena anasa e Efeso oshi enkarriponi e nkaji naseremieki Artemis kitok o ilo soit sinyati apa odou eing'uaa shumata?

³⁶Ore naa amu iyiololo aajo meetae oltung'ani oishankarru kuna baa, keishiaakino naaji nigirara, pee miwuapakinono ake aas ae bae namurtana.

³⁷Amu iyautua kulo tung'ana ene, neme ketupurro nkajijik naaomonishoreki neitu sii emor enkai ang.

³⁸Te neeta Demetrus, aashu kulo kunono ooiriamunore embae naatakinore likae tung'ani, kebolo nkajijik e nkiguana neetae ilbalusuni: enchoo epuonu aaiguana olikae o likae.

³⁹Kake te niaatata kulie ning'oruru, kepuonunui aaiguanare nena te noshi ake kiguana.

⁴⁰Amu kebaiki doi neiguanareki iyiook tele ong'oling'oli le na olong, amu aimeeta duoo tipat nadumunyeki; naa te neikilikuani iyiook nikilau enikijo te nkaraki ele oilole.”

⁴¹Ore pee eidip atejo neijia, neidapasha ina tumo.