Read Maasai Bible – Biblia Sinyati Iasat 2 Bible Online

Iasat 2 - Maasai Bible – Biblia Sinyati bible

Iasat 2

¹Ore pee ebau enkolong e Pentekoste, netii apa ilairukok pooki ewueji nebo.

²Ore nabo kata nelotu enkikurrukur naing'uaa Keper naaijo eno lkutati, neiput ina aji pooki natii ninche.

³Nedol ninche entoki naaijo lng'ejepa le nkima eisuaari: neiseyie ake ina ng'ejep naaijo enkima o lng'ejep le pooki tung'ani otii ine.

⁴Neigany Enkiyang'et Sinyati ninche pooki neiteru aairo kulie kutukie, anaa enaidimie Enkiyang'et Sinyati meiroro.

⁵Nemanya Yerusalem Ilyahudi laa iltung'ana ooserem e Nkai, ooetuo ninche eing'uaa nkuapi pooki e nkop.

⁶Ore pee ening ina kikurrukur neiturrurro olorora kitok. Neiputukuny neing'asia pooki amu meetae ake oleitu ening lelo airukok eiro enkutuk naikini ninye.

⁷Neiputukuny neing'asia nejo, “Amaa kulo tung'ana aime Lgalilaya pooki!

⁸Kainyoo naa pee kining'ito iyiook pooki eiro nkutukie ang naaikini iyiook?

⁹King'uaa iyiook Partia o Midia o Elam; niking'uaa Mesopotamia o Yudea, o Kapodokia; niking'uaa Ponto o Asia,

¹⁰niking'uaa Frigia o Pamfiliam. Niking'uaa Misiri o lkirinen le Libya o Kirene, neing'uaa kulikae lang Roma,

¹¹ndung'ot pokira, Lyahudi o Loreren ooibelekenyate aaku Lyahudi; niking'uaa kulikae lang Krete o Arabia kake eji nikining pooki eiro ninche nkutukie ang eimaki mbaa kituaak naataasa Enkai!”

¹²Ore eing'asiate pooki nemilo neikilikuana taa ake aajo, “Kainyoo eutu ena bae?”

¹³Kake etii ilootakueniyie ilairukok ejo, “Etemerate kulo tung'ana!”

¹⁴Kake neinyototo Petero eboitare ninye lelo kulikae tomon o obo, neiteru airorie olorere to ltoilo sapuk ajoki, “Lo lewa lang loo Lyahudi, o intae pooki oomanya Yerusalem, entoning enajo, matoliki intae enautu ena bae.

¹⁵Eitu emera kulo tung'ana anaa ina nijoitoto, saa uni e ntadekenya tena kata.

¹⁶Maa, enapa bae ena natolimuo oloiboni le Nkai oji Yoel pee ejo,

¹⁷‘Kaas ena bae te nena olong'i naabayie, Enkai najo, kabukoki ltung'ana pooki Enkiyang'et ai. Keyooki aaibonisho layiok linyi o ntoyie inyi; nedol ilbarnot linyi nduaat, netum ilpayiani linyi nkidetidetat.

¹⁸Ee, o metabaiki sii ninche sinkan laainei, loo lewa o loo ng'oruo, kabukoki Enkiyang'et ai te nena olong'i, naa keibonisho kenya ninche.

¹⁹Naa kaitodolu ine nking'asia te ntaiya e shumata, o sapiipiyieti ti abori te nkop. Nedoli osarge o enkima, o empuruo nairrusha:

²⁰neitomisimisi enkolong, nedoru olapa atiu anaa osarge, eton etiooyo ina olong o Laitoriani, enkolong kitok e nkisisa.

²¹Ore teina kata, ore pooki ng'ae oipot enkarna o Laitoriani neitajeuni.’

²²“Lo lewa loo Siraeli! Entoning kulo rorei. Ore Yesu le Nasaret, oltung'ani otisirua Enkai abaraki te intae too mbaa e ngolon o ine nking'asia o nkitoduaat o lmonek ooitaasa intae Enkai te nkaina enye. Niyiololo intae ina amu atua intae etaasieki.

²³Enkai openy natudutayie te yieunoto o te ng'eno enye makewan apake nchere, keitarasari Yesu, nitara intae ninye, aaisho ltung'ana arruok metasho.

²⁴Kake eitopiwuo Enkai ninye aitung'uaa ilootuata: nelaku aoru emion e keeya amu meidimayu apa neenikino keeya ninye.

²⁵Amu eimaka Daudi ninye nejo, ‘Atoduaa Olaitoriani etii dukuya nanu nkatitin pooki: aatii te tatene, metaa maaigusugusieki.

²⁶Amu ore te nkaraki ena keng'ida oltau lai, nebore irorei laainei enchipai; ore nanu, nara ake olenye, nayeng'iyeng'a aanyisho to siligi,

²⁷amu ming'uaa iyie oltau lai te nemeneng'a, nimincho osinka lino sinyati metupurdayu ang'uoyu.

²⁸Kituutaka iyie nanu inkoitoi enkishui, ore amu itii iyie, eikilo aiput enchipai.’

²⁹“Ilalashera laainei, enchooki maibalakinye intae ashirraki too mbaa e papa lang Daudi, Etua ninye, nenukari, netii enkurare enye atua iyiook o tene.

³⁰Oloiboni le Nkai apa metaa ketayiolo ina naisiligie Enkai ajoki, ore eishoi enye keikini likae aiguanani kitok oitoreisho anaa apa Daudi.

³¹Ina etodolua Daudi naas kenya ake Enkai, pee eiroro aimaki empiunoto e Kristo pee ejo: ‘Eitu eing'uari ninye te nemeneng'a. Neitu epurda osesen lenye ang'uoyu.’

³²“Ele Yesu likiimaki eitopiwuo Enkai aitung'uaa ilootuata, nikira iyiook lchakenini le ina bae.

³³Ore pee eilepieki nepiki tatene e Nkai, neng'amu Enkiyang'et Sinyati te Menye anaa enatejo apake; naa ore ena nidolitata nining'itoto, ina kishorunoto enye etubukoko iyiook.

³⁴Amu eitu elo Daudi makewan keper; kake etejo ninye makewan, ‘Etiaka Olaitoriani, Olaitoriani lai: Totona te tatene ai,

³⁵pee aitadou ilmang'ati linono metotiutu anaa olorika loo nkejek inono.’

³⁶Entayioloito naa taata enkaji pooki oo Siraeli ena nadede nchere, ele Yesu, lishomo intae aashe to salaba, eitaa Enkai Olaitoriani o Kristo.”

³⁷Kuna ake etoning'o ninche nerem ilo rorei iltauja, nejoki Petero o lkulikae kipaareta, “Kaa naa kiaas, ilalashera lang?”

³⁸Nejoki Petero ninche, “Erridutu pooki tung'ani, neibatisae pooki linyi te nkarna e Yesu Kristo, pee epalakini intae ng'ok inyi; naa ing'amumu enkishorunoto e Enkiyang'et Sinyati.

³⁹Amu ore ena kisiligata naa eninyi apa o nkera inyi, o lelo pooki oolakua, lelo pooki ooipotoki Enkai kewan.”

⁴⁰Neitirrishaki Petero aitadedeyie kulo omon te kulie baa kumok, nejoki, “Entajeu ate teina nainepu kulo tung'ana arruok.”

⁴¹Neiruk ilkumok nena baa naainosua ninye, neibatisae; neponikini ilo turrur iltung'ana oobaya nkalifuni uni teina olong.

⁴²Neaku ketumo ninche anaa ake te nkiteng'enare oo lkipaareta, neshulare aaisiritore, neng'arie endaa, neshula te nkomono.

⁴³Nejing aiput enkuretisho pooki ng'ae; neasi inenking'asia, o lmonek eimu lkipaareta.

⁴⁴Nebik ilairukok pooki te nebo te nchula neyau masaa enye aang'ar.

⁴⁵Neaku kemir masaa enye o ntokitin naata neorikino pooki mpisai, anaa enaatayie oltung'ani enkolat.

⁴⁶Netumo anaa ake ilo turrur te nkaji e Nkai, neng'ar ndaiki too nkajijik enye, neng'ida edaa to ltau obo.

⁴⁷Neisis Enkai, neshipakino iltung'ana pooki ninche. Neponaa Olaitoriani ilo turrur lenye anaa ake te lelo ooitajeuni.