Read Maasai Bible – Biblia Sinyati Iasat 20 Bible Online

Iasat 20 - Maasai Bible – Biblia Sinyati bible

Iasat 20

¹Ore pee eishunye ina liman, neipotisho Paulo aiturrur ilairukok neikok, neitanapare, nelo aing'uaa eyieu Makedonia.

²Ore pee eimaa nene wuejitin, neikok ilairukok oleng nelotu enkop oo Lyunani.

³Ore etobiko lapaitin okuni teine, neiguanare Lyahudi ejo pee ear metua, enoshi kata ejo pee elo aked emeli alo Siria, nerrinyo etumuta ajo keimaa ake pookata Makedonia.

⁴Neiriamariyie Sopater olayioni le Pirro, le Berea o meitabaiki Asia; o kulo le Sesalonike, Aristako o Sekunto; o Gayo le Derbe, o Timoteo. Ore ile Asia naa Tikikos o Trifimo.

⁵Kake eituruko apa kulo, nepuo aanyu iyiook te Troas.

⁶Nikiked emeli te Filipi eishari osirua loo Mukateni Nemeisuishieki, nikibau Troas too nkolong'i miet; nikibik nkolong'i naapishana teine.

⁷Ore te nkolong e dukuya e wiki, kitoni te nebo aabel emukate, neikok Paulo ninche ejo pee eyooki alo te ntaaisere; neitoodor ororei o meitoritoyu enkewarie.

⁸Naa kumok ilkilang'ilang'eta te ilo gilata le shumata, likitumore.

⁹Neton oloti barnoti oji Yutikas te lusie, neimug eiroshiutuo njo. Ore eton ake eitoodorita Paulo ororei, neidimutua olbarnoti njio nesulunye te nkaji e uni e shumata, nedumuni eji ketua.

¹⁰Nedou Paulo, nepetaa nedumu amuataki nkaik nejo, “Emimputukuny amu eton eishu.”

¹¹Ore pee eilep, nebel emukate, nedaa, neitoki ake airorie kata naado, o mekenyu, nelo taa aing'uaa.

¹²Nerikuni oladuoo barnoti eishu neme kiti enkilejilejata nanoto ninche.

¹³Kake kinturuko iyiook aapuo enetii emeli, nikiked nikilang aapuo Aso, kijo pee kipuo aang'amu Paulo teine, amu ninye otejo nejia eyieu ninye nelo aimaa enkop natoyio.

¹⁴Ore pee elotu anang'are iyiook te Aso, nikintaked emeli, nikipuo mitelene.

¹⁵Ore pee kidumunye teine, nikiyiooki aapuonu te ntaaisere o maipirare Kios, ore te nkolong nasuju nikintashe peno te Samo, ore te nkae olong nikipuonu Mileto.

¹⁶Amu etumuta Paulo ajo kegiroo Efeso te meli, pee meya erishata te Asia; eyieu nesiooyo, ejo te neidimayu neyieu netii Yerusalem te nkolong e Pentekoste.

¹⁷Ore kitii Mileto, neirriwaa Paulo olkilikuai Efeso, aipot ilpayiani le ina sirit.

¹⁸Ore pee epuonu enetii ninye nejoki ninche: “Iyiololo maate ebaiki enapa olong nang'as are Asia, eneikununo entonata ai tiatua intae teina kata pooki;

¹⁹aisiaaita Olaitoriani te mborron pooki o te ng'eno, o too lkiyio, o toongololikinot nanoto te nkaraki losekin loo Lyahudi.

²⁰Niyiololo aajo eitu ae kata aing'ash aibalakinye intae embae ake pooki naret intae, naiteng'en intae te dukuya ltung'ana, naruk inkajijik

²¹aishakenoki ndung'ot pokira aa Lyahudi o aa Lyunani meirridu tialo Enkai, neiruk Olaitoriani lang Yesu Kristo.

²²Ore naa taata, ng'ura, Yerusalem aloito te nkanyit e nkiyang'et sinyati nemayiolo mbaa naapuo aatum teine.

²³Aaishakenoko nanu Enkiyang'et Sinyati nchere, ore te pooki anasa nalo naa inkeenta o nkitamiot naanyita.

²⁴Kake maikenaa enkishui ai ajo keeta tipat, anaa keeta dupoto te nanu, kake kajo pee aitabaya elototo ai, o esiaai natang'amua to Laitoriani Yesu, aishakenoki ororei supat le mpiris e Nkai.

²⁵Ore naa taata kayiolo ajo meekure intokiki ai kata aadol enkomom ai, intae kulo laisiritore alikioo enkitoria e Nkai.

²⁶Ore te nkaraki ina, kaishakenoki taata intae ajoki tenetii olotapong'ori, nemaata nanu entiyoto

²⁷amu maata enatelekua eitu aibalakinye intae te lulung'ata e nkikoo e Nkai neitu aliki intae.

²⁸Entagolie ate maate o ina luaata pooki naitaa intae Enkiyang'et Sinyati ilaing'urak lenyena, aaitoti esirit e Nkai nainyiang'aka ninye kewan to sarge lenye.

²⁹Kayiolo ajo nanu ake olo, nejing atua intae isuyian ooata enkarri, lemeing'urrie ena luaata;

³⁰naa keinyototo ltung'ana tiatua intae, oojo mbaa e nkiushoto pee eyiataa lkipaareta laa ninche esujaa.

³¹Entashololoto naa nidamumu aajo ore te rishata oo larin okuni eitu agira aikokito intae pooki dama o kewarie too lkiyio.

³²Ore naa taata inkaik e Nkai aitarasaki intae o ele rorei le mpiris ooidim atesheta intae neisho intae enjung'ore te nebo lelo pooki ooiteng'elaki.

³³Eitu ang'uar enkosholai aashu saabu o enkila e likae tung'ani.

³⁴Iyiololo maate aajo kuna aik naaisiaayiakita nkolati aainei makewan o ne lelo laisiritore.

³⁵Aitoduaa intae pooki toki, nchere ti nisiaaishosho aaiko nejia niretirete ilooshal idamumu irorei lo Laitoriani Yesu anaa enatejo openy inchere, ‘Enkishooroto namayiana alang eng'amaroto.’ ”

³⁶Ore pee eidip Paulo atejo nejia, negil kung neomon te nebo ninche pooki.

³⁷Neishiraki ninche pooki ninye oleng, nemuataki Paulo nkaik neng'utut ninye,

³⁸neisina oleng te nkaraki ilo rorei otejo eji, meitoki aekata aadol enkomom enye. Neitarioo ninche ninye aaitabaiki enetii emeli.