Read Maasai Bible – Biblia Sinyati Iasat 21 Bible Online

Iasat 21 - Maasai Bible – Biblia Sinyati bible

Iasat 21

¹Ore kitung'uaitie ninche nikiked emeli, nikintoriounye aapuonu Kos, ore te nkolong nasuju ina nikibau Rodos, nikidumunye teine nikipuonu Patara.

²Ore pee kitum emeli nalang alo Foinike, nikiked aapuo.

³Ore pee kidol Kupro, nikincho kedianye aaporoo aapuo Siria o maetu Tiro, amu teine eitadou emeli lolan.

⁴Ore pee kitum ilairukok, nikibik inkolong'i naapishana teine. Nejoki lelo Paulo te Nkiyang'et nchere pee melo ake Yerusalem.

⁵Ore pee kiishu nena olong'i, nikidumunye aapuo enapake lototo ang; neitarioo iyiook ninche pooki o nkituaak o nkera, o maetu auluo e ina anasa, nikigil kung te mbata e naiposha nikiomon nikinchoro ole sere.

⁶Nikintoki aaked emeli, nerrinyo ninche aapuo ang.

⁷Ore kindipa elototo ang king'uaa Tiro, nikibau Tolemai; nikiroroki ilalashera nikibik nabo olong te nebo ninche.

⁸Ore pee ekenyu nikidumunye o maetu Kaisaria; nikijing enkaji o lalikioroni Filipo, obo loo lapa oopishana, nikitoni te nkaji enye.

⁹Neeta ninye ntoyie ong'uan nemeyama, naaishoro enaibon e Nkai.

¹⁰Ore kitobiko nkuti olong'i, nelotu oloiboni le Nkai oing'uaa Yudea oji Agabo.

¹¹Nelotu ine nikitii nedumu enkeene e mpolos e Paulo neen kewan inkejek o nkaik, nejo, “Inji ejo Enkiyang'et Sinyati, ‘Inji epuo aaiko Lyahudi te Yerusalem aaen olopeny ena keene neitarasaki nkaik oo Loreren.’ ”

¹²Ore pee kining ina nikisai iyiook o lelo tung'ana Paulo pee meilep alo Yerusalem.

¹³Newaliki Paulo ajoki, “Kaa ena niaasitata, kinchirakiki nikintashalishala oltau? Mme doi enkeene ake aitieu naaeni kake te naa kaye te Yerusalem naye te nkaraki enkarna o Laitoriani Yesu.”

¹⁴Ore pee kilaikino aaiboo, nikigira nikijo, “Metotiwuo naa anaa enayieu Olaitoriani.”

¹⁵Ore pee eishunye nena olong'i nikinapa pee kilep aapuo Yerusalem.

¹⁶Neiriamariyie iyiook kulikae ooiteng'eni oing'uaa Kaisaria, nerik iyiook enkaji e likae oji Mnason le Kupro, olaa oloiteng'eni musana ninye, paa ninye kirragaitie.

¹⁷Ore pee kipuonu Yerusalem, neng'amu iyiook ilalashera te nchipai.

¹⁸Ore te nkolong natusujua ina, neiriamunore iyiook Paulo kipuoito enetii Yakobo; nelulung'a ilpayiani pooki teine.

¹⁹Ore pee eidip airoroki ninche, neinosaki maa nabo nena baa pooki naataasa Enkai tiatua Loreren ooisiaaishore ninye.

²⁰Ore pee ening ninche, neisis Enkai. Nejoki ninche ninye, “Olalashe, idolita eneba nkalifuni oo Lyahudi ooiruko; neeta pooki olokiyo too nkitanapat.

²¹Nikietuoki aakur te ninche nchere ishomo aiteng'en Ilyahudi pooki ootii Loreren metung'uai nkitanapat e Musa, eji nepal memurat inkera enye nemesuj lkerreti lang.

²²Kaa naa easi? Nemeeta nchere eitu ening aajo iewuo.

²³Taasa ena nikijoki iyie. Kiaata ltung'ana oong'uan ooinosa olmumai;

²⁴tudumu kulo tung'ana pokira oong'uan mikintukui te nebo ninche nilaaki ninche nena tokitin naaitalakishoi, pee ebarni. Ina eyiolounye pooki ng'ae nchere meeta tipat kunda baa naatiaakaki tialo iyie amu isujita iyie makewan nkitanapat e Nkai te nkishon ino.

²⁵Kake ore ltung'ana loo Loreren ooiruko, kirriwakita apa empalai nayakita enkiguana ang nchere pee erishie ate ntokitin naapolosakini nkitanyaanyukot neme Enkai o sarge o ntokitin naagori o eloloito.”

²⁶Nedumu taa Paulo lelo tung'ana pokira oong'uan te nkolong nasuju ina, neitisiny kewan, tenebo ninche nejing atua enkaji e Nkai, alikioo eneiting'ie nkolong'i e ina kitukuoto, neishooyo sii ntokitin naaitukuyieki ninche pooki.

²⁷Ore etaa keishunye nena olong'i pokira naapishana, netii Ilyahudi ooing'uaa Asia, ootoduaa Paulo te nkaji e Nkai, neing'oling'ol esiamo, neitabaiki ninye nkaik aaibung,

²⁸ebuakita aajo, “Lo lewa loo Siraeli, entaret iyiook! Ele tung'ani doi oiteng'enita ltung'ana te pooki wueji meibai ele orere neibayu nkitanapat e Nkai o ena aji Enkai; nenyaaka ayau Iyunani aitijing enkaji e Nkai, neewuo aisarkionie ene wueji sinyati.”

²⁹Naa Trofimo etoduaaki ae olong eiriamariyie Paulo teina anasa, nejo ninche ketoriko Paulo aitijing enkaji e Nkai.

³⁰Neing'oling'ola taa enkanasa pooki, nekuetu ltung'ana aaiturrurro te nebo; neibung'i Paulo neikurtutari aitayu teina aji e Nkai, neikeni kutuk aji nabo kata.

³¹Ore eji matar metua, nebaiki ororei olkitok loo sikarini loo ltimito nchere einyio oloilole te Yerusalem pooki.

³²Nedumu ninye isikarini o lkituaak le lelo timito, nekuetu adoiki ninche: ore pee edoluni ilo kitok o sikarini, nepal eitu eitoki aar Paulo.

³³Nenyikaki ilo kitok loo sikarini Paulo, neibung arik ninye, neitanapisho meteeni too ilpisia aare, neikilikuan ajoki, “Aira ng'ae?” Neikilikuan enataasa.

³⁴Nebuaku kulikae tiatua ilo orora ae bae, nejo kulikae ae; ore pee edol ajo meeta ae naning te nkaraki ilo ololepilepi; neitanapisho meyauni atua emanyata oo sikarini.

³⁵Ore enoshi naitabaikini inkedeta e kishomi, neaku te shumata eya isikarini aaing'atie enkop te nkaraki olong'oling'oli le ilo orora egorokinoi;

³⁶amu esujita ake ilo orere ebuakita aajo, “Ewaita ninye!”

³⁷Ore etaa keitabaikini Paulo ina manyata, nejoki ilo kitok loo sikarini, “Eikincho pasa maairorie?” Nejoki ninye, “Iyiolo doi enkutuk oo Lyunani?

³⁸Metaa mira doi olanaarri Misiri oirrikia olorere meitarrikinore enkitoria nerik ilapa tung'ana asesekuanak nkalifuni ong'uan te ong'ata?”

³⁹Newaliki Paulo ajoki, “Kara nanu Olyahudi, oing'uaa Tarso te Kilikia, metaa mme misil enkanasa naing'uaa; aatoomono naa nchooki mairorie ele orere.”

⁴⁰Ore pee eisho, neitashe Paulo te nena kedeta e kishomi, neyuk olorere te nkaina; ore pee egira aajo tim, neirorie te nkutuk oo Lbrania, nejoki.