Read Maasai Bible – Biblia Sinyati Iasat 25 Bible Online

Iasat 25 - Maasai Bible – Biblia Sinyati bible

Iasat 25

¹Ore pee ebau Festo, ina kop naitore, nkolong'i uni ake naatulusoitie, nedumunye te Kaisaria ailep alo Yerusalem.

²Neitang'or ilapolosak kituaak o larikok loo Lyahudi Paulo te ninye nesai aaitirrishaki,

³aajoki meitobiraki ninche mbaa aisho ilo tung'ani meewai Yerusalem, aa kejo pee erresh aasesekuan te nkoitoi.

⁴Newaliki Festo ajoki te Kaisaria erripi Paulo, netataana pee elo sii ninye ine.

⁵Nejoki, “Enchoo naa iltung'ana ooata enkitoria te intae edou mairiamari, paa te neetae enatapong'e te ilo tung'ani, nepuo aaitang'or.”

⁶Ore etobiko Festo nkolong'i naabaya isiet anaa tomon te nebo ninche, nedoyio alo Kaisaria. Ore te nkolong nasujita ina nelo aton to lorika lenye le nkiguana neitanapisho metorikuni Paulo.

⁷Ore pee elotu Paulo, neisho Lyahudi ootadoutuo eing'uaa Yerusalem neitashe aaman Paulo neitang'or too mbaa kumok torrok kake etalaikinote aaitadedeyie.

⁸Nejo Paulo egira amitu kewan, “Maata tukul enaitorruoyie too Lyahudi, nemaata te nkaji e Nkai aashu te Kaisari.”

⁹Kake eishoo ninye Festo, ejo pee eitiship Ilyahudi, nejoki Paulo, “Iyieu nilep alo Yerusalem, pee kipuoi aaiguanare teine te dukuya nanu te nkaraki kuna baa?”

¹⁰Kake etejo Paulo, “To lorika le Kaisari le nkiguana aitashe, naa tene eishaakino naaiguanareki; maata doi entorrono naitaasa Ilyahudi, naa esipata ina niyiolo iyie aitorioki.

¹¹Te naa kara olkiminchali, aashu te naa kaata enataasa nairirikino keeya, maing'oru ajo ailanyaa keeya; kake te nemeetae esipata te nena naaitang'orieki, nemeetae likae laaidim aitarasaki ninche. Atejo Kaisari eyakini enkiguana ai.”

¹²Ore Festo, etang'asa aikilikuanishore olkiaama lenye newaliki ajoki, “Kaisari itejo meyakini enkiguana ino, ilo naa ake enetii Kaisari.”

¹³Ore etulusoitie nkolong'i kuti, nebau olaiguanani Agripa o Bernike Kaisari aairoroki Festo.

¹⁴Ore etobiko nkolong'i kumok teine, neinosaki Festo olaiguanani enkiguana e Paulo, nejoki, “Eetae oltung'ani otung'uayie Feliks eena.

¹⁵Ore atii Yerusalem naainosaki lapolosak kituaak o lpayiani loo Lyahudi mbaa enyena, eyieu nadung'oki ninye enkiguana.

¹⁶Nawaliki ajoki ninche, mme olkerreti lang Iroma pee kinchooyo oltung'ani eitu etumo nkomomi e lelo ooitang'oro, ooisitaari, netum oloitang'oroki erishata namitunye kewan newalu nena naaisitaarieki.

¹⁷Ore taa pee etumo tene, eitu aimutie, amu ore pee ekenyu naton to lorika le nkiguana naitanapisho metorikuni ilo tung'ani.

¹⁸Ore pee einyiototo aaitashe lelo ooitang'or, eitu eitang'or too mbaa e nkarruoisho anaa apa enajo nanu;

¹⁹kake eji enchankar ake eyautua naipirta nkoon enye neipirta oltung'ani oji Yesu, otua apa, neitadedeyie ninye Paulo ajo keishu.

²⁰Ore amu katala enaikunakino pee atum atujurro kuna baa, naikilikuan ninye tenaa keyieu nelo Yerusalem paa teine epuoi aaiguanare te nena.

²¹Kake ore pee einyaku Paulo ajo metorripi paa Kaisari olo aiguanare, naitanapisho metorripi o manoto enaikunaa airriwaki Kaisari.”

²²Nejoki Agripa Festo, “Kayieu o nanu nainining ilo tung'ani.” Nejoki, “Taisere iyiooki ainining ninye.”

²³Neaku ore te nkolong nasujita ina nelotu Agripa o Bernike eisikarrate, nejing ina aji e nkiguana te nebo lkituaak loo sikarini o ltung'ana kituaak le ina anasa, neitanapisho metorikuni Paulo.

²⁴Nejo Festo, “Olaiguanani Agripa, o intae pooki ootii ene te nebo iyiook; ele tung'ani doi aaetuo olorere pooki loo Lyahudi aaitang'or, te idie te Yerusalem o te ne sii, eilepilep aajo meishiaakino neitoki aishu.

²⁵Ore nanu makewan, natisipua ajo eitu eas ai bae nairirikino keeya, kake ore pee ejo ninye lido Aiguanani Kitok ake olo aiguanare, najo kareu naa.

²⁶Nemaata embae enye nauno najo kaigeroki olaitoriani Kitok. Ina pee atorikuo dukuya iyie, Olaiguanani Agripa, peyie aa ore pee eidipi aatujur natum enaiger ajo.

²⁷Kadol nanu aa kemakua te nairriwaa oloena nemaitoduaaya mbaa naaitang'orieki.”