Read Maasai Bible – Biblia Sinyati Iasat 26 Bible Online

Iasat 26 - Maasai Bible – Biblia Sinyati bible

Iasat 26

¹Nejoki Agripa Paulo, “Ekinchoro iroro makewan.” Neitorioo Paulo enkaina neiteru airishisho nejo:

²“Kajo nanu kamunyak aa te dukuya iyie Olaiguanani Agripa, airishisho tele kekun te nkaraki nena pooki naaitang'orie Lyahudi,

³amu iyiolo pae iyie lkerreti o enchankar oo Lyahudi; naa ina pee aaomon ting'iria inining'okoki.

⁴“Keyiolo Ilyahudi enkishon ai ebaiki keraisho, neyiolo nkiterunot atii atua ele orere lang te Yerusalem.

⁵Kaayiolo te nkata naado, te naa naaji keyieu neishakenoki, nchere olkerreti orrish aisul te seremata e Nkai ataa Olfarisayoi.

⁶Naa ore pee aitashe taata maaiguanareki tene naa te nkaraki osiligi oishoo Enkai iloo papa,

⁷olaa ninye eisiligita lelo oshon pokira tomon o aare ejo pee etum, naa ina pee eitirrish aaserem Enkai dama o kewarie. Naa te nkaraki ele siligi, Olaiguanani, pee aaitang'oro Lyahudi!

⁸Kainyoo doi pee ijojo meirukoyu te intae nchere keitopiu Enkai ilootuata?

⁹“Kajo apa nanu makewan keishiaakino te naas mbaa kumok agilunore enkarna e Yesu le Nasaret.

¹⁰Naiko doi nejia te Yerusalem; neme taa kaikenoyie ake lelo sinyat kumok te jila, ekaaishoo lapolosak kituaak enkidimata, ore ninye pee eari metuata katii esiana e lelo ooyiewuaki ina.

¹¹Nainosie ninche osina nkatitin kumok too nkajijik pooki e ntumo natem ajo aitamor ninche Enkai; naa teina goro napi, atusujaka nkanas oo loreren.

¹²“Ina pee atudumunye alo Dameski aaitanapa lapolosak kituaak naata sii mpala enye.

¹³Ore enaipirie enkolong, lo aiguanani, nadol te nkoitoi ewang'an naing'uaa Keper, nawang alang enkolong, newang'u aamanita o lelo apa laairiamariyie.

¹⁴Ore pee kibatata te nkop, naning oltoilo laajoki te nkutuk oo Lbrania, ‘Saulo, Saulo, kainyoo pee kisilisil? Iyie doi omeyu te niroro ljipeta!’

¹⁵Najo, ‘Aira ng'ae Lo Kitok?’ Nejo Olaitoriani, ‘Kara Yesu lisilisilito.

¹⁶Kake inyo ntasho too nkejek inono; amu kaatayie enkolat pee aaipang'aka, aategelua iyie taasisho ninchakenoki nena baa nitoduaa o nena naaitoki aitaliorie te iyie.

¹⁷Naa kaaitajeu te kulo tung'ana o too Loreren laa ninche aairriwaki

¹⁸pee ibol inkonyek enye, pee eibelekenya aaing'uaa enaimin aapuonu ewang'an, neing'uaa engolon e Sheitani aapuonu enetii Enkai, pee eng'amu ampalakino oo ng'ok netum ewueji tiatua lelo ooitisinyaki amu nanu eiruko.’

¹⁹“Ore te nkaraki ina, Olaiguanani Agripa, eitu agolong'aki ilo otaliee te Keper,

²⁰kake aibalakinye lelo ootii Dameski, o lootii sii Yerusalem o atua enkop pooki e Yudea, o Loreren sii ninche, nchere pee eirridu neibelekenyakino Enkai neas nkiaasin naairirikino enkirridunoto enye.

²¹Te nkaraki ina pee aaibung'a Ilyahudi te nkaji e Nkai naajo matar matua.

²²Ore ebaiki ena olong kaata eretoto naa Enkai eing'uaa, naa ina pee aitashe aishakenoki too looti o too lkituaak, maata ae najo neme napa naajo iloibonok le Nkai nejo Musa keaku:

²³nchere meeta kata apa nemeitamei Kristo, o sii nchere ninye ong'as apiu to lootuata, pee eibalakinye ewang'an Ilyahudi o loreren.”

²⁴Ore eirishisho Paulo ajo nejia, nejo Festo to ltoilo sapuk, “Paulo, oloirirua iata, eng'eno ino kitok nikioshoo elukunya.”

²⁵Kake etejo Paulo, “Maata nanu oloirirua, Oloyanyiti kitok Festo, isipat naaishiaakino airorita.

²⁶Amu keyiolo ninye olaiguanani kuna baa, naa ninye ashirraki airorie; amu majo keeta hoo embae nabo e kuna nemeyiolo ninye, amu mme too nkurrat etaasaki kuna.

²⁷Olaiguanani Agripa, isiligita doi iyie loibonok le Nkai? Kayiolo ajo isiligita.”

²⁸Nejoki Agripa Paulo, “Ijo sa eikintaa olairukoni le Kristo te nkiti kata.”

²⁹Nejo Paulo, “Te naa ai te nkiti aashu te naado, kayieu naaji te Nkai neme iyie ake kake o kulo pooki laaning'ito te na olong netiu anaa enatiu nanu metii taa kulo pisia.”

³⁰Neinyiototo taa Olaiguanani aitashe, o ilo Gafanai o Bernike o lelo ootoni te nebo ninche,

³¹ore pee epuo, nejokino maate, “Meeta ele tung'ani enataasa nairirikino keeya anaa eenata.”

³²Nejoki Agripa Festo, “Keidimi naaji aatalaku ele tung'ani te neme ketoomonuo meyakini Kaisari enkiguana enye.”