Read Maasai Bible – Biblia Sinyati Iasat 27 Bible Online

Iasat 27 - Maasai Bible – Biblia Sinyati bible

Iasat 27

¹Ore pee edung'i aajo kiked emeli aapuo Italia, neitarasakini Paulo o kulikae ooteenaki olkitok loo sikarini oji Yulio, lo ltim le Augusto.

²Nikiked emeli e Adramitio nairoto pee edumunye alo nena ang'itie e mbata e naiposha te Asia, nikipuo, neiriamariyie iyiook Aristako Olmakedoniai le Sesalonike.

³Ore te nkolong nasujita ina niking'eliki Sidon; neing'urrie Yulio Paulo, neisho meshomo abaiki lchoreta lenyena aitanapare.

⁴Ore kitii enaiposha neigara iyiook Kupro, amu etaa keibooyo iyiook olkutati.

⁵Ore kitalang'a enaiposha naipirare Kilikia o Pamfilia, nikibau Mira, enkanasa e Likia.

⁶Ore teine netum ilo sikari kitok emeli e Aleksantria nalang alo Italia neitaked iyiook ina.

⁷Nikipuo maakutiti too nkolong'i kumok naa te ngoloto kitabautua enetaaniki Nido. Ore amu meisho iyiook olkutati kipuo, nikiporoo king'ura Krete o maipirare Salmone.

⁸Nikipuo te ngoloto kingara ine, o maetu ewueji neji Enkutoto Sidai, nenyikita enkanasa naji Lasea.

⁹Ore amu kinturraitie erishata naado, netasuro elototo amu eidipa atulusoi enkata e mpukoroto, neiguan Paulo ninche,

¹⁰nejoki, “Lo kituaak, kadol ajo keaku kearisho ena lototo e meli neimin intokitin kumok nikipik sii enkishui ang bata iyiook maate.”

¹¹Kake etoning'o olkitok le ina meli loo sikarini olarewani le meli nening sii olopeny ina meli aitalang ina natejo Paulo.

¹²Naa ore amu mme sidai ina kutoto oo melin tenebikieki te nkata e nkirobi, nejo lkumok lenye ai sidai te neporoo aapuo teine, ejo te neidimayu nebaya Foinike, naa enkutoto ina oo melin te Krete, naipirta enkalo e nkilepunoto e kopikop o erishata e nkilepunoto e moikuape, peyie ebik teine te nkata e nkirobi.

¹³Ore pee ekutu maa kutiti olkutati le moikuape, nejo ninche kenoto ina nayieu, nedotu oenet le meli neporoo aashep Krete, enyikita embata e ina kop.

¹⁴Kake ore te nkiti kata nelotu osiwuo oji ole rishata e nkilepunoto e kopikop, adoku teinakop.

¹⁵Ore pee eibung osiwuo ina meli nelaikino emeli aitoriokinore, nikipalaa meterewa iyiook.

¹⁶Ore ekuetie yiook kigira aagiroo enkiti lemankale naji Kauda, te ngoloto kinotokito eenata e mpeut;

¹⁷ore ina kata pee eyietu emeli, etureita aajo ebaiki nepuoi aaitar isinya le Sirti, neitadou olkarasha kitok oreu emeli, nerei etiu nejia.

¹⁸Ore eiposhita iyiook olkutati, neiteru te nkolong nasuju ina aaitadooyo ilolan oonapita emeli.

¹⁹Ore te nkolong e uni, neitadooyo ntokitin naagolieki emeli too nkaik enye maate.

²⁰Ore etulusoitie nkolong'i kumok eitu aekata eliooyu enkolong anaa lakir, neme kiti olkutati okutita iyiook, neish iyiook osiligi nikijo ebaiki ake neitajeuni iyiook.

²¹Ore amu etupukoitie kata naado, neipang'u Paulo tiatua ninche nejo, “Lo lewa, keishiaakino apa te naa eikitoning'o naa anaata eitu idumunyenye te Krete nipuonunu metobori intae aaiko nji neimina imasaa naaba nji.

²²Ajoki naa taata intae, entagoluoto; amu meetae hoo obo oye tiatua intae, kake keparipara emeli.

²³Amu ore duoo te na kewarie naipang'aka olmalaika le Nkai, nara nanu olenye naa ninye aserem,

²⁴nejo, ‘Paulo, miureishoyu, amu meeta nchere pee mintashe ake te dukuya Kaisari, naa eikintajeu iyie Enkai o lelo pooki likiriamariyie te meli.’

²⁵Metaa, entagoluoto, lo lewa, amu kaata enkirukoto te Nkai nchere ketiu anaa ina ake naatiaakaki.

²⁶Kake keetae ole mankale likikuetiki aaiponyakino.”

²⁷Ore pee ebau enkewarie e tomon oong'uan, Kipuoito ake te naiposha e Adria, o metaa keitorito enkewarie, nemusu lelo tung'ana arewak le meli aajo kitinyikakita ae kop.

²⁸Neitadooyo entemet netum ntemeta tomon o miet.

²⁹Ore pee eureishoyu ejo ebaiki neitooshi iyiook emarti oo soito, neitadooyo ieneta oong'uan te dukuya emeli, neomon mekenyu.

³⁰Ore eing'oru lelo arewak le meli eneiko pee eluaya aaing'uaa emeli neidipa doi ninye aaitadoiki empeut enaiposha, eitaakuno keeta kulikae eenata ooitadooyo te dukuya e meli,

³¹nejoki Paulo olkitok loo sikarini o sikarini lenyena, “Te neitu etoni ltung'ana tiatua emeli meitajeuni intae.”

³²Nedung'oo sikarini nkeenta e ina peut, neisho meshomie ina.

³³Ore etaa kekenyu, nejoki Paulo ninche pooki meinosa endaa, nejoki, “Ene tomon o oong'uan ade taata ena olong isirng'ang'ate miatata endaa, eitu inyanya toki.

³⁴Asayiaki naa intae ajoki enosa endaa; ekeisho intae engolon amu medoyio hoo ninye olpapita le lukunya e likae obo linyi.”

³⁵Ore pee ejo Paulo nejia nedumu emukate, ore pee eisho Enkai enashe etii pooki, nebel neiter anya.

³⁶Negolu pooki oishuaa nenya sii ninche maate endaa.

³⁷(Nikira pooki iltung'ana oobaya iip are o ntomoni naapishana o ile tiatua ina meli.)

³⁸Ore pee edaa aaraposho, neiteneneng emeli aanang'aki enkano atua enaiposha.

³⁹Ore pee ekenyu, eitu eyiolou ninche ina kop, kake etoduaa enkutoto natii osinyai oisiasha, neiguana te naa keidim aaitabaiki ina meli ina kop natoyio.

⁴⁰Metaa neiturraa ieneta lenyena nelaku nkeenta naaenita lkurteta ooboinieki emeli; neitoki taa alaaki olkarasha kitok osiwuo neitoriokino ilo sinyai oisiasha.

⁴¹Kake neikob likae sinyai oitemoro neing'irtit emeli enkop neuno olkidong'oe le meli metaa meekure edotunoyu, negilita ilopir le naiposha dukuya emeli.

⁴²Neiguanare isikarini pee ear lelo tung'ana ooena metuata, pee meporoo ake enkare neisik aapuo;

⁴³kake ore ilo kitok loo sikarini te nkaraki neyieu neitajeu Paulo, nerishie amitiki ninche eas ina nayieu. Neitanap ilo oba anaa ilo oidim aataporoi enkare meituruko aadoyo te meli neporoo enkare aapuo enkop natoyio,

⁴⁴ore lkulikae ootelekutua nepororie lkeek aashu mbelat e ina meli. Neaku etasarutua pooki enkop natoyio.