Read Maasai Bible – Biblia Sinyati Iasat 28 Bible Online

Iasat 28 - Maasai Bible – Biblia Sinyati bible

Iasat 28

¹[8] Ore kitajeutuo, nikipuonu aayiolou aajo keji ilo lemankale Malta.

²Ore ilopeny ina kop neitoomon iyiook to lng'ur sapuk, amu einuaa enkima neng'amaa iyiook pooki, amu eiterua asha naa keirobi.

³Netasotuo Paulo looti keek nepik enkima, nepuku olasurai te nkaraki enkirowuaj neirinakino enkaina enye.

⁴Ore pee edol lelo oopeny ine eililio ina ng'ues te nkaina e Paulo nejokino maate, “Meeta nchere mme olarani ele tung'ani. Ore hoo netajeuo te naiposha, meeta esipata naishuyie.”

⁵Ore ninye Paulo, neipiripiroki ina ng'ues enkima nemeeta enaitaasa ninye.

⁶Neanyu ninche ejo ebaiki nejeyu aashu ebatata aosh enkop etua; kake ore pee eanyu te nkata naado neitu eduaaki ninye ae apiak, neibelekenya neaku kejo enkai ninye.

⁷Ore embata e ine wueji naa ninye etii olokeri lo laiguanani oitore ilo lemankale, neji ninye Pubilio, neng'amu ninye iyiook aitoomon aitobiraki inkolong'i naara uni.

⁸Neaku kemuoi menye Pubilio eeta oloirobi nerotu sii osarge; nelo Paulo abaiki neomon, neiteleiki nkaik neishiunye ninye.

⁹Ore pee etiu neijia, ore lkulikae tung'ana pooki le ilo lemankale ooata imuoyiaritin, nepuonu sii ninche meishiunyeki.

¹⁰Neisho iyiook nkishoorot kumok; naa ore pee kidumunye, nepikaki iyiook emeli ntokitin pooki nikiaatayie enkolat.

¹¹Ore etulusoitie lapaitin okuni nikiked emeli natobiko te ilo le mankale te nkata e enkirobi. Emeli e Aleksantria, naa nkaitin mao naasirakino elukunya enye.

¹²Nikipuo aang'eliki Sirakusa, nikibik nkolong'i uni teine.

¹³Teine kitudumunye nikimanaa o matabau Regio. Enkolong nabo ake nashomo, nedumunye osiwuo le moikuape, ore te nkolong e are nikipuonu Puteoli.

¹⁴Nikitum lalashera teine, neitoomon iyiook nikibik nkolong'i naapishana. Nikipuonu Roma.

¹⁵Ore ilalashera ootii ine, pee ening'oo iyiook, nepuonu o metabau Sokoni e Apio o Mukaonini Uni aanang'are iyiook. Ninche ake etoduaa Paulo neisho Enkai enashe negolu oshoke.

¹⁶Ore pee kibau Roma, neishori Paulo eton openy, te nebo o ilo sikari orripito ninye.

¹⁷Ore pee elusoo nkolong'i uni neipotu Paulo larikok loo Lyahudi te nebo; ore pee eiturrurro nejoki ninye ninche, “Ilalashera laainei, ore hoo nemaata enaitaasa iltung'ana lang, aashu ilkerreti loo loo papa, kake aaishooyioki aena te Yerusalem aaisho nkaik oo Roma.

¹⁸Ore pee aajur ninche nanu, neyieu naalaku mashomo, amu maata apa ae naaitanang'i pookata.

¹⁹Kake ore pee eany Ilyahudi, naamiraki matasaru Kaisari hoo nemaata ae naaipotoki olorere lang.

²⁰Te nkaraki ina pee atejo kayieu nadol intae nairorie intae, amu te nkaraki ilo ora osiligi loo Siraeli pee aena tele pisiai.”

²¹Nejoki ninche ninye, “Mikiaata iyiook mpala nikitang'amaitie eing'uaa Yudea nikimpirta iyie, nimikiaata too lalashera lang ooetuo ene oloinosua aashu eliki iyiook ae torroni tialo iyie.

²²Kake kiyieu pae nikining enijo iyie te nena nilimu; amu pooki enikiyiolo tialo ena kiteng'enare ng'ejuk napaashari, keimakini te pooki wueji eibae.”

²³Ore pee egelaki ninye olkekun, nepuonu enetii te nkaji natijing'a aa kumok oleng. Neinosaki ena bae te nkakenya o memuto, eishakenoki enkitoria e Nkai netem ajo aitijing'aa ninche mbaa e Yesu too nkitanapat e Musa o too loibonok le Nkai.

²⁴Nejing'aa kulikae nena naatejo ninye kake eitu eiruk kulikae.

²⁵Ore pee egela ninche maate, nepuo pee eidip Paulo atejo ena bae: “Etisipa apa Enkiyang'et Sinyati pee ejoki iloo minyi to loiboni le Nkai oji Isaya,

²⁶‘Shomo enetii kulo tung'ana, tiaaki, ining'ining'i doi kake mejing'aa hoo intae, ning'oring'oro doi kake midolidolo hoo intae,

²⁷amu eikang'ate ltauja le kulo tung'ana, naa ming'anta nkiyiaa mening, neikeno nkonyek enye; pee medol ake too nkonyek enye, nening too nkiyiaa enye, nejing'aa ltauja lenye, neibelekenya maishiunye nanu ninche.’

²⁸Entayioloito naa intae inchere, ore ena jeunoto e Nkai, eirriwakaki Loreren; ekeinining'u ninche.”

²⁹[Ore pee ejo nejia nepuo ninche Ilyahudi eishankarra maate.]

³⁰Nebik ilarin aare oolulung'a teine, te nkaji enye naisilenuo, neng'amu lelo pooki ooetuo enetii ninye.

³¹Nelikioo enkitoria e Nkai neiteng'enisho too mbaa o Laitoriani Yesu Kristo aibalie nemeetae olomitiki.