Read Maasai Bible – Biblia Sinyati Iasat 3 Bible Online

Iasat 3 - Maasai Bible – Biblia Sinyati bible

Iasat 3

¹Ore nabo olong, nepuo Petero o Yohana enkaji e Nkai saa naaudo etushuke enkolong, te nkata e nkomono.

²Ore te Kishomi Sidai, amu nejia apa eji, netii oltung'ani laa olmaima eiteru te inoto enye. Naa kenapi anaa ake aaya ina kishomi meshomo aomonu mpisai too ltung'ana oopuo aajing enkaji e Nkai.

³Ore pee edolu Petero o Yohana epuonu aajing enkaji e Nkai, neomon meishoo enkiti toki.

⁴Neipirie ninche nkonyek aaing'or, nejoki Petero, “Ng'ura iyiook!”

⁵Neing'or ninche eisiligu toki te ninche.

⁶Nejoki Petero ninye, “Maata enkosholai o saabu, kake kaaisho enaata, te nkarna e Yesu Kristo le Nasaret, aajoki shomo!”

⁷Neibung enkaina e tatene aitasheyie. Negolu nabo kata ndapi o rubat oo nkejek e ilo tung'ani;

⁸neipid, neitashe too nkejek enyena, neiteru alo amanimanaa. Neitoki airiamariyie ninche ajing atua enkaji e Nkai, eloito neipid eisisita Enkai.

⁹Nedol olorere pooki eloito neisisita Enkai.

¹⁰Ore ade pee epuonu aaiyiolou aajo ninye oloshi aomononi oton te Kishomi Sidai e Nkaji e Nkai, neing'asia pooki, neiputukuny teina naitaasaki ninye.

¹¹Ore eibung'ita ilo tung'ani Petero o Yohana, neing'asia ltung'ana pooki nekuetu enetii ninche to Igoriet[1] le Solomon, amu nejia apa eji ine.

¹²Ore pee edol Petero ina, nejoki ninche, “Lo lewa lang loo Siraeli, kainyoo naing'asiayie intae te ne, naa kaji etiu paa iyiook ing'oring'oro? Ijojo pasa ai te nkaraki engolon ang maate aashu te nkaraki esupatisho ang pee eishiunyeki ele tung'ani meinyo alo?

¹³Enkai e Abraham, o Isaak o Yakobo, Enkai oo loo papa, naishoo Osinka lenye Yesu, enkitoo, Intae ooitarasaitie ninye aaisho lelo ooitoreisho, nitanyaita intae ninye te dukuya Pilato, etejo ninye alaku aisho elo.

¹⁴Kake itanyaita intae Ilo Sinyati naa Supat. Niomonunu olarani meishori intae.

¹⁵Niariara metua ilo aishoroni le nkishui. Kake eitopiwuo Enkai ninye aitung'uaa ilootuata, nikira iyiook lchakenini le ina bae.

¹⁶Enkarna e Yesu o enkirukoto e nkarna enye naitagolo ele tung'ani lidolitata niyiololo, ore enkirukoto tiatua Yesu neishoo ele tung'ani ena biyotisho nalulung'a nidolitata pooki.

¹⁷“Ore naa taata, ilalashera laainei, kayiolo ajo ore intae o lelo aitoriak linyi, te nkaraki emodai pee intaasa Yesu ina.

¹⁸Etolimuo apake Enkai too nkutukie oo loibonok lenyena pooki ajo, meeta nchere pee meitamei Kristo lenye; netaa te kuna naatasate eitabayie.

¹⁹Erridutu naa, embelekenyakinoto Enkai, pee ejutori ng'ok inyi,

²⁰o pee epuonu nkatitin naayagieki enkishui, naaing'uaa enetii Olaitoriani, Enkai, oo sii pee eirriu Yesu, laa ninye ilo Kristo lenye otisiraka apake intae.

²¹Meeta kata nemeng'as ninye abik te Keper o metaba anaa neitang'ejuki pooki toki anaa enatolimuo apake Enkai te dukuya too nkutukie oo loibonok lenyena sinyat.

²²Amu etejo Musa, ‘Keirriwaki intae Olaitoriani Enkai oloiboni anaa apa pee aairriu nanu, olaa olo lorere linyi. Entoning ake mbaa pooki naaliki ninye intae.

²³Ore oltung'ani pooki lemening enajo ilo oiboni le Nkai, neari aaidaikie to lorere.’

²⁴Netolimutuo lelo oibonok le Nkai, pooki ooiroro, ebaiki Samuel o lelo ootusujutua ninye, eibalunye sii apa ninche kuna olong'i.

²⁵Irara intae inkera e lelo oibonok le Nkai, o ne ilo sotua oishoo Enkai iloo minyi, anaa pee ejoki Abraham, ‘Te ishoi ino emayiani iloreren pooki le nkop.’

²⁶Metaa Enkai nailepunye[2] Osinka lenye, naa intae eiterua airriwaki, pee emayian intae pooki aibelekeny entung'uai inkoitoi inyi e nkarruoisho.”