Read Maasai Bible – Biblia Sinyati Iasat 5 Bible Online

Iasat 5 - Maasai Bible – Biblia Sinyati bible

Iasat 5

¹Kake etii oltung'ani oji Ananias, o enkitok enye naji Safira, otimira erubata enkurma enye,

²kake neshumaki kewan ematua oo mpisai, eyiolo enkitok enye, neyaki ilkipaareta nkulie naatelekutua.

³Nejoki Petero, “Ananias, kainyoo pee inchoo Sheitani meitoria oltau lino teleja Enkiyang'et Sinyati adung'oo ematua oo mpisai nitimirie te nkurma ino?

⁴Aimme ninono apa eton eitu imir, naa ninono mpisai indipa atimira? Kaji naa etiu pee, itudutayie to ltau lino ajo aas ina? Mme taa oltung'ani iteleja kake Enkai iteleja!”

⁵Ore ake pee ening Ananias ina nebatata neye. Ore lelo pooki ootoning'o neiput enkuretisho.

⁶Nejing'u lbarnot, neirin osesen lenye, neipung'ie, nepuo aanukaa.

⁷Ore etulusoitie saai uni nejing'u enkitok enye nemeyiolo ninye nena naatupukutuo.

⁸Nejoki Petero ninye, “Tolikioki sii iyie, amaa, kena siana inosie enkurma inyi? Ei mpisai esiana naje ake inosie?” Nejoki, “Ee esiana naje ake.”

⁹Nejoki taa Petero, “Kaji etiu pee itoning'okinote intae aatem Enkiyang'et o Laitoriani? Ng'ura ajo nenena nkejek oo laduoo ooshomo aanukaa olpayian lino naatii kutuk aji, naa iyie sii epuonu aaipung'ie aaya.”

¹⁰Nebatata nabo kata te nkalo oo nkejek enyena neye; nejing'u lelo barnot neinepu etua, neipung'ie aaya, nepuoi aanukaa aaitatashaki olpayian lenye.

¹¹Neiput enkuretisho sapuk ina sirit e lelo ooiruko pooki, o lelo pooki ootoning'o kuna baa.

¹²Etaasaki apa ilmonek o mbaa e nking'asia tiatua iltung'ana too nkaik oo lkipaareta. Netii apa pooki tenebo to olgoriet le Solomon.

¹³Nemeetae oltung'ani leme ole ina sirit oitieu atushulare ninche, hoo neimaki ake ltung'ana pooki esupatisho enye,

¹⁴neponari ake sii esiana enye too lewa o nkituaak kumok naairuk Olaitoriani.

¹⁵Ore te nkaraki nena pooki naasita ilkipaareta, neaku kenapuni iltamuoyia mbat oo nkoitoi oo nkaulele, neirragieki too rruatin o too lkarash paa ore eim Petero ine, neporoo oloip lenye kulikae lenye.

¹⁶Neiturrurrunye sii ltung'ana loo nkang'itie naamanita Yerusalem, eyau iltamuoyia lenye o lelo ooata loiriruani; neishiunyeki ninche pooki.

¹⁷Kake einyio Olapolosani Kitok, o lelo pooki ooboitare (oora le sirit oo Sadukayo), eiputa lelo pooki olom,

¹⁸nepik ilkipaareta nkaik, nepuo aaen te jila napiki olorere.

¹⁹Kake etabolo olmalaika lo Laitoriani nchomito e jila kewarie, neitupuku, nejoki,

²⁰“Enchom intae, entasho eroro te nkaji e Nkai entoliki iltung'ana mbaa pooki e na kishui.”

²¹Ore pee ening ninche ina neyooki ajing enkaji e Nkai enasirie neiteng'enisho. Kake eewuo Olapolosani Kitok, o lelo ooboitare, neiturrur enkiguana nalulung'a te nebo, o erikore pooki oo Siraeli, neirriwaa olkilikuai jila metorikuni ilkipaareta.

²²Kake etejo sikarini maetu jila nelau; neitu aalimu,

²³aajo, “Kineputua jila eikeno aitobiraki, neitashoo larripok too nchomito: kake kitejo matabol, metii oltung'ani otii atua.”

²⁴Ore taa pee ening olkitok loo sikarini le nkaji e Nkai o Lapolosak kulo rorei, nemilo oleng etalaita enapukoki ina.

²⁵Nelotu oltung'ani obo nejoki ninche, “Ore lang'ole tung'ana litipika jila, etii enkaji e Nkai eitashe aaiteng'en olorere.”

²⁶Nelo taa olkitok loo sikarini erikito sikarini lenyena neriku lkipaareta, kake eitu earu amu etureita olorere, meari ake ninche too soito.

²⁷Ore pee eriku, neitasheyie te dukuya enkiguana. Neikilikuan Olapolosani Kitok

²⁸ajoki, “Kitutukunyakita apa intae nikintanap intae pee mintokiki ake aiteng'enisho te na arna: naa noolo intae ooibulunye Yerusalem pooki ena kiteng'enare inyi, ijojo pee iyauu osarge lele tung'ani shumata iyiook.”

²⁹Kake etawalikitia Petero o lelo kulikae kipaareta nejoki, “Enkai pae kining iyiook alang te nikining iltung'ana.

³⁰Enkai oo loo papa naitopiwuo Yesu, lishomo intae aar, aashe to lchani.

³¹Ninye eilepie Enkai te nkaina enye e tatene metaa ninye Olaiguanani Kitok, neaku Olaitajeunoni, oisho Siraeli enkirridunoto o empalakinoto oo ng'ok.

³²Nikira iyiook ilchakenini te kuna baa, naa shakeni Enkiyang'et Sinyati, naisho Enkai lelo ooning metoning'o ninche.”

³³Ore pee ening enkiguana ena, nerem iltauja lenye negoro oleng, neyieu near ninche metuata.

³⁴Kake einyo obo le ina kiguana, loo Lfarisayo oji Gamaliel, laa olaiteng'enani kitok loo nkitanapat, oyanyit iltung'ana pooki, nejo meitupukuni lelo lewa te nkiti kata.

³⁵Nejoki ninye ninche, “Lo lewa loo Siraeli, entodol ake ate te kulo tung'ana, te na bae niyieuu nintaasiasa.

³⁶Amu einyio apa ai kata Teudas, neitaa kewan likae tung'ani kitok, nesuj iltung'ana oobaya iip ong'uan. Neari ninye, o lelo pooki ootoning'o ninye, neisardakieki, neaku pesho.

³⁷Ore eshomo ilo neinyototo Yudas le Galilaya, too napa olong'i e nkikenare, nerik sii ninye ltung'ana ootusuja, neidaaya sii ninye; ore lelo pooki ootusuja, neisardaka.

³⁸Najoki naa nanu intae taata, entalam kulo tung'ana, entapal. Amu tenaa kenoo ltung'ana ena kitobirata aashu ena siaai naa kebatata,

³⁹kake te naa kene Nkai, nimindimidimi intae aatabatat ninche; naa entodol ake meaku Enkai iararere!”

⁴⁰Nening ninche ina kikoo e Gamaliel: ore pee eipotu lkipaareta meetu enetii, near, neitanap meitoki ake aairo te nkarna e Yesu, neisho epuo.

⁴¹Nepuo ninche aaing'uaa ine netii enkiguana eng'ida etoduaa aajo keishiaakino ninche enkitamioto te nkaraki ina arna e Yesu.

⁴²Ore too nkolong'i pooki, eitu egira ninche meiteng'enisho te nkaji e Nkai o too nkang'itie enye nchere ore Yesu, ninye Kristo.