Read Maasai Bible – Biblia Sinyati Iasat 6 Bible Online

Iasat 6 - Maasai Bible – Biblia Sinyati bible

Iasat 6

¹Ore apa te nena olong'i, etoponari esiana oo lkipaareta abul, nejing olong'unyung'unyi erishata oo Lyahudi ooiro enkutuk oo Lgiriki o Lyahudi ooikini enkop enye, ejo lelo loo Lgiriki eji eitololoikiaki inkolia enye te ndaa naorikini anaa ake.

²Neipot lelo Tomon oaare esirit nalulung'a o lkipaareta te nebo nejoki, “Meishiaakino te nikipal iyiook elikioroto o rorei le Nkai pee kitumoki aisiaayia ltung'ana too mpisai.

³Ilalashera lang, entegelu intae iltung'ana oopishana liyiololo tiatua ate nchere kebore Enkiyang'et Sinyati nebore eng'eno, pee kincho lelo meitasheiki ena bae.

⁴Kake ore iyiook maate, enkomono kisheikino, o elikioroto e le rorei.”

⁵Neitiship ina walata ilo turrur pooki; negelu Stefano, oltung'ani obore enkirukoto o Enkiyang'et Sinyati o Filipo o Prokora o Nikano o Timos o Parmenas o Nikolao, oltung'ani leme oloo Lyahudi laa Antiok eing'uaa, oibelekenye apa ninye ang'amu enkirukoto oo Lyahudi.

⁶Neriku ilo turrur lelo aarikoki Lkipaareta; neomonoki, neiteleiki nkaik.

⁷Neponari ororei le Nkai, ore esiana oo lkipaareta neponari oleng te Yerusalem, ore ilapolosak kumok neunokino enkirukoto.

⁸Ore Stefano, obore empiris e Nkai o engolon, neas imbaa e nking'asia o olmonek tiatua olorere.

⁹Kake einyioito kulikae le nkaji e ntumo naji enoo Lkilakuno (amu nejia apa eji), o Lkirene, o le Aleksantria o Lkilikia o looing'uaa Asia, aaishankarrarre Stefano.

¹⁰Kake nelaikino aairisha eng'eno o Enkiyang'et nairorie Stefano.

¹¹Nepuo too nkisudorot aarop iltung'ana ooetuo aajo, “Kitoning'o ninye eiro amor Musa, nemor Enkai.”

¹²Neinuaaki olorere, o lpayiani o laiteng'enak loo nkitanapat, nepuonu lelo enetii Stefano, neibung aayaki enkiguana.

¹³Nesotu ltung'ana ooaku lchakenini le lejare, nejo lelo, “Megira ele tung'ani eitu esukeny ene wueji sinyati, nesukeny inkitanapat.

¹⁴Amu kitoning'o iyiook ninye ejo, eji keyooki ilo oji Yesu le Nasaret aar ene wueji, neibelekeny nkoon naaitanapa iyiook Musa.”

¹⁵Ore lelo pooki ootii ina kiguana pee eing'or enkomom e Stefano, nedol eyia anaa enkomom o lmalaika.