Read Maasai Bible – Biblia Sinyati Iroma 14 Bible Online

Iroma 14 - Maasai Bible – Biblia Sinyati bible

Iroma 14

¹Ore ilo tung'ani omena enkirukoto, entang'amu, kake mme pee eishankarrareki to ltau lenye.

²Keeta likae enkirukoto ajo keidim ainosa pooki toki, ore olomena naa mbenek ake enya ninye.

³Toduaa olonya mimen olemenya, nimidung'oki olemenya enkiguana olonya; amu etang'amua Enkai ninye.

⁴Ira ng'ae pee idung'oki enkiguana osinka le likae? To lkitok lenye makewan eitashe aashu ebatata. Naa keitasheyieki, amu Olkitok lenye oitasheyie ninye.

⁵Keitirrish likae tung'ani enkolong nabo aitulusoo te nkae, neitirrish likae nkolong'i pooki aitoris. Enchoo pooki tung'ani metonyorrai ina te ndamunoto enye makewan.

⁶Ore oloitirrish enkolong nabo neitirrish aa Olaitoriani eyanyit. Ore sii ilo onya endaa nenya aa Olaitoriani eyanyit; amu Enkai eisho enashe; naa ore sii ilo lemenya endaa, nemenya te nkaraki naa Olaitoriani eyanyit neisho Enkai enashe.

⁷Meetae hoo obo lang laa kewan ake eishuyie, nemeetae olalang laa kewan ake enang.

⁸Ti nikinchu, Olaitoriani kinchuyie, naa ti nikiye Olaitoriani kinang metaa ti nikinchu aashu te nikiye kira ake ilo Laitoriani.

⁹Amu te nkaraki e ina pee etua Kristo neitoki apiu, pee etum ataa Olaitoriani loo lootuata o looishu.

¹⁰Oo doi pee idung'oki olalashe lino enkiguana? Oo, pee imen olalashe lino? Entadamu aajo ekintashe ake pooki te dukuya olorika le Nkai le nkiguana;

¹¹amu etisiraki aajo, “Ore anaa pee aishu nanu, Olaitoriani ojo, ‘Kaayooki pooki ng'ae agilaki kung, neyooki pooki ng'ejep aisis Enkai.’ ”

¹²Neaku kiyiooki pooki ng'ae aaikenaki Enkai imbaa ang maate.

¹³Emikintoki naa aadung'okino enkiguana aekata olikae o likae, kake ematumut aajo mikipikaki aekata iyiook likae alashe entoki narror anaa ae bae narruesh ninye.

¹⁴Kayiolo nanu naaitijing'ayioki sii tiatua Olaitoriani Yesu nchere meetae entoki naiduruk te kewan enye; kake keiduruk entoki te pooki ng'ae ojo keiduruk.

¹⁵Te naa keitarru olalashe lino entoki ninosita iyie, nemeekure igira iyie alotie enyorrata. Mincho ake ina toki ninya eaku ninye nabatat obo otanang'a Kristo.

¹⁶Neaku mincho embae supat te iyie eimakini aajo eitorrono.

¹⁷Amu ore enkitoria e Nkai mme endaata o eokore kake esupatisho o eseriani o eng'ida naaing'uaa Enkiyang'et Sinyati.

¹⁸Ore ilo oisiaai Kristo aiko nejia neng'amunoyu te Nkai nenyorrarri sii too ltung'ana.

¹⁹Ematusuj naa ina nayau eseriani o enchetunoto nashetu olikae olikae.

²⁰Emintarruoo esiaai e Nkai te nkaraki endaa. Kesinya pooki toki, kake eitorrono te neaku kebatat oltung'ani ilkulikae te ntoki nanya ninye;

²¹enaikash te nemenya oltung'ani nkiri aashu meok enaisho oo sabibu aashu ae ake bae nabatat likae alashe.

²²Ore enkirukoto niata, tagolie te kewan o te Nkai. Emayiana ilo lemeeta ae naiguanare te kewan te nena naatonyorrayie ninye.

²³Kake ore ilo oata ilng'ashi eidipaki aatudung'oki enkiguana, te nenya, amu mme te nkirukoto etaasa ina; amu ore pooki neme enkirukoto eing'uaa naa eng'oki.