Read Maasai Bible – Biblia Sinyati Iroma 7 Bible Online

Iroma 7 - Maasai Bible – Biblia Sinyati bible

Iroma 7

¹Eimiyiololo intae ilalashera laainei aajo ltung'ana sii doi ooyiolo inkitanapat airorie, nchere eitore ake inkitanapat oltung'ani eton eishu?

²Etiu anaa te neeniki nkitanapat enkitok olpayian lenye eton eishu. Kake ore pee eye olpayian nelakuni enkitok te nena kitanapat te nkaraki keeya o lpayian lenye.

³Ore te nkaraki ina, keji ake keloloito te nelo meewa likae lee eishu olpayian lenye. Kake te neye olpayian netalakuaki teina kitanapata, naa te neyam likae lee nemeji keloloito ninye.

⁴Nejia sii itiuu intae, ilalashera laainei, ituata intae tialo inkitanapat to rrekie lo sesen le Kristo, pee iakuku ile likae, naa ilo oitopiwuoki too lootuata pee kitum iyiook aatoiki Enkai ilng'anayio.

⁵Ore apa aa iseseni kinchuyie, ore ng'uarrat ang oo ng'ok, etupututuo inkitanapat, neasisho tiatua rubat ang neiu ilg'anayio le keeya.

⁶Kake ore taata, netalakuaki iyiook tialo nena kitanapat, nikituata iyiook tialo ina apa nateena iyiook, nemeekure aa nena kitanapat naaigero naaitore iyiook kake ena kishui ng'ejuk e Nkiyang'et kinchuyie.

⁷Kaa naa kijo? Ketaa ng'ok inkitanapat? Mme neijia pae! Kake te neme nena kitanapat, anaata mayiolo nanu ajo ainyoo ing'ok. Anaata mayiolo ng'uarrat ajo ainyoo te neme nena kitanapat naatejo, “Ming'uar.”

⁸Kake ore ng'ok, pee eisho nkitanapat erishata, neputu tiatua nanu impukunot pooki oo ng'uarrat. Ore te nemeetae inkitanapat netuata ing'ok.

⁹Eetae apa enkata naishu ake maata nkitanapat, kake ore pee elotu ina kitanapata, neinyototo ng'ok naye nanu.

¹⁰Ina kitanapata kewan naji apa kaayaki enkishui nataa keeya te nanu.

¹¹Amu ing'ok naatijing'a ina rishata naayautua inkitanapat. Naalej nanu ng'ok naa ore te nkaraki ina kitanapata naar nanu matua.

¹²Neaku sinyat ninche inkitanapat nesinya sii ina kitanapata, nesipa naa supat.

¹³Ketaa ina apa naji kaaret naanyaaka aar matua? Taba mme ninye! Kake ore pee eibalayu eng'oki nchere eng'oki, neiu keeya te nanu tialo ina sidai paa ore te nkitanapata neaku eng'oki entoki torrono oleng.

¹⁴Kiyiolo doi aajo ore Nkitanapat naa ine nkiyang'et, nematiu nanu nejia. Kake kara nanu oltung'ani otimiraki mataa orrindik loo ng'ok.

¹⁵Eimayiolo doi iasat aainei makewan, amu maas enayieu naas, kake ina naiba ninye aas.

¹⁶Neaku tenaas nena nemayieu, netiu anaa nkitanapat ake atonyorrayie ajo aisupati.

¹⁷Kake ore enatii meekure aa nanu oas inaas, kake ina ng'oki natii atua nanu.

¹⁸Amu kayiolo ajo, metii entoki supat namanya atua nanu, aa taa osesen lai, amu ore hoo naata eyiolounoto naasie esupat, maata enkidimata.

¹⁹Kayieu naas isupati kake maas; neaku ntorrok nemayieu ninche aas.

²⁰Ore pee aas enda nemayieu naas nemeekure aa nanu oas kake eng'oki natii atua nanu.

²¹Nena duoo enkewan natayiolo nanu; ekayieu nanu naas isupati kake maaing'uaa ai kata entorroni.

²²Ore tiatua enkorrok ai kewan nashipakino aning'ore nkitanapat e Nkai.

²³Kake nadol ake ae golon naarare ake nena nadamu openy. Ina kitanapata oo ng'ok naasisho tiatua osesen lai aaitaa orrindik.

²⁴Oi ele oibe oji nanu! Kanyioo kenya naakordu nanu tele sesen le keeya!

²⁵Ashe te Nkai, tiatua Olaitoriani lang Yesu Kristo, ore naa, nanu enkorrok ai, naisiai enkitanapata e Nkai te ndamunoto ai, kake ore to sesen lai, naisiai enkitanapata oo ng'ok.