Read Maasai Bible – Biblia Sinyati Iroma 9 Bible Online

Iroma 9 - Maasai Bible – Biblia Sinyati bible

Iroma 9

¹Isipat ajoito tiatua Kristo, malejisho nanu; naaishakenoki nanu oltau lai te Nkiyang'et Sinyati,

²nchere kaara sapuk oleng osina o emion tiatua oltau lai.

³Amu kayieu naaji naa nanu makewan edeki naadung'ori aarishie Kristo te nkaraki ilalashera laainei le ntalipa o lorere lai.

⁴Isiraeli ninche, naa ninche eitaa inkera enyena, neisho enkitoo, neitayu osotua o ninche, ninche eishooki Nkitanapat, o esayiata e Nkai o nkisiligat enyena;

⁵ilkulenye iloo nkakuiyiaa, naa ole ilo orere Kristo. Metamayiani Enkai natii keper pooki ntarasi. Eesai.

⁶Kake mme taa doi keetae enaturua ororei le Nkai. Amu mme Siraeli ate lelo pooki le ishoi e Siraeli,

⁷neme inkera e Abraham lelo pooki le ishoi enye; kake, “Ore eishoi ino naa Isaak eimu.”

⁸Nejo ina nchere mme nena kera o sesen naara nne Nkai, kake inkera e nkisiligata enye eikenakini aajo eishoi enye.

⁹Amu inji etejo enkisiligata enye, “Kalotu kenya tena rishata netum Sara enkayioni.”

¹⁰Neme nejia ake, kake ino lpayian obo inkera e Rebeka; papa lang Isaak.

¹¹Kake, ore meino eton eitu eas ninche ae supat aashu ae torrono, ore eji peyie eitobirari eyieunoto e Nkai o engelunoto enye, neme te nkaraki isiaaitin kake te nkaraki e nkipototo enye,

¹²nejokini Rebeka, “Keaku olbotor oisiaai oloti.”

¹³Anaa enatisiraki aajo, “Yakobo atonyorra kake aibayie Esau.”

¹⁴Aikijo aa naa iyiook? Aikijo mme asipani Enkai te nkiguana enye? Mme nejia pae!

¹⁵Amu etiaaka ninye Musa, “Nanu oing'urrie olayieu naing'urrie, naitanana oshoke to layieu naduaaya.”

¹⁶Ore pooki nemeigarakino enayieu oltung'ani, kake keigarakino olng'ur le Nkai.

¹⁷Amu etiaakita Ilkigerot Farao, “Nanu laailepie naa kajo paa te iyie aitoduaaya engolon ai, nelikiori enkarna ai tiatua enkop pooki.”

¹⁸Neaku ninye oing'urrie oloyieu neing'urrie, neitagol oltau lo loyieu neitagol.

¹⁹Naa ore taata nikijoki, “Oo naa pee eitokini ake aajo eitarruoitie ltung'ana?” Ae ng'ae oidim aibooi eyieunoto enye?

²⁰Kake aira ng'ae lo tung'ani owaliki Enkai? Kejoki entoki naitobiruni ilo oitobirita, “Oo pee kintayio aikunuu inji?

²¹Eimeitore esarng'ab oloitobiru motioo e sarng'ab, neitainyie ae entoki sidai nashili, neitobirie ae entoki ake naasishoreki?

²²Oo te naa Enkai nayieu, ejo pee etumoki aitoduaai engoro enye neyiolouni sii engolon enye, netang'asa ang'iriaki oleng lelo oora ile ngoro laa enkitarruorroto ake eitobirakaki,

²³naa ore pee eyiolouni eneba enkarsisisho e nkitoo enye te lelo laa olng'ur eitobirakaki, naa ninye sii oitera aitobiraki ninche te dukuya te nkitoo enye,

²⁴iyiook taa lelo laa ninye oitopiwuo, neme too Lyahudi ake kake too Loreren sii?”

²⁵Nesipa etejo ninye te Hosea, “Iltung'ana apa leme laainei ayooki nanu aipot ajo, ‘ltung'ana laainei’, ore apa ina tinki nayooki nanu ajo, ‘Enkirotet ai.’ ”

²⁶“Ore te napa ake wueji netiaakinyeki ninche, ‘Mirara iltung'ana laainei’ teina eyookini aajo ninche ‘Inkera e Nkai naishu.’ ”

²⁷Netabuaa Isaya ajo tialo Siraeli: “Ore hoo neba nkera e Siraeli anaa osinyai le naiposha, oloti pisiai ake eitajeuni tiatua ninche;

²⁸amu keitabaiki Enkai enkop enkiguana natudung'oko asioki o te ngolon.”

²⁹Naa ore anaa enatoduaa Isaya, “Te neme Olaitoriani loo lororani otelekaka iyiook inkera, anaata kitotiutuo anaa Sodom, neikoni iyiook anaa Gomora.”

³⁰Aikijo aa naa iyiook? Iloreren leitu eing'oru ninche esupatisho, ninche oonoto, naa to rrekie le nkirukoto;

³¹kake eji ore ninche Siraeli ooing'orutua esupatisho aa nekua kitanapat eitasheyie neitu eidim ninche aaitabai nena kitanapat.

³²Aainyoo? Te nkaraki neitu eing'oru to rrekie le nkirukoto, kake ketiu anaa too nkiaasin eing'oru. Etarrorrote te ilo soit orrorrisho,

³³anaa enatisiraki, “Ng'ura, nanu oirragie te Sion osoit orror iltung'ana, osoit kitok obatat ninche, kake ore oloiruk ninye nemeitukurruni.”