Read Maasai Bible – Biblia Sinyati 1 Ilkorinto 1 Bible Online

1 Ilkorinto 1 - Maasai Bible – Biblia Sinyati bible

1 Ilkorinto 1

¹Paulo eing'uaa ena palai, oloipotoki te yieunoto e Nkai metaa olkipaaret le Kristo Yesu, neing'uaa sii olalashe lang Sostene.

²Aigeroki esirit e Nkai natii Korinto. Etegeluaki intae tiatua Kristo Yesu neipoti intae entaa ltung'ana le Nkai te nebo lelo pooki ootii pooki wueji ooipot enkarna o Laitoriani lang Yesu Kristo, ilo Aitoriani lenye naa olalang.

³Enoto empiris o eseriani naing'uaa Enkai Papa lang o Laitoriani lang Yesu Kristo.

⁴Ashukoki oshi ake Enkai ai enashe te nkaraki intae. Ashukoki ninye enashe te mpiris enye naishooki intae tiatua Kristo Yesu,

⁵amu ore te pooki oitoi itaa intae karsisi too mpukunot pooki o te ng'eno pooki o enkarriyiano oo nkirorot

⁶amu ore shakenisho ang te Kristo neitadedeyieki tiatua intae.

⁷Neaku eitu eng'oriki intae enkishorunoto e nkiyang'et hoo nabo, ianyitata embolunoto o Laitoriani lang Yesu Kristo.

⁸Ninye ake sii oitasheyie intae o metabaiki enkiting'oto miatata entorrono naiguanareki te intae teina olong o Laitoriani lang Yesu Kristo.

⁹Keisiligayu Enkai, naa enchula enye eipotokoki intae te nebo ilo Inoti lenye, Yesu Kristo Olaitoriani lang.

¹⁰Asai intae ilalashera laainei, te nkarna o Laitoriani lang Yesu Kristo; entoning'oto pooki, emincho ejing eoro atua intae, kake enchoo errinyokini intae oltau obo o eyieunoto nabo.

¹¹Amu aatolikioki imbaa inyi, ilalashera laainei iltung'ana oing'uaa enkaji e Kloe nchere ketii enchankar atua intae.

¹²Naa inji etiu: ejo obo linyi, “Kara nanu ole Paulo,” nejo likae, “Kara nanu ole Apolos,” nejo likae, “Kara nanu ole Kefa,” nejo likae, “Kara nanu ole Kristo.”

¹³Ketoore Kristo? Ei Paulo apa etashoki te nkaraki intae? Ei te nkarna e Paulo eibatisaki intae?

¹⁴Kajo ashe amu maata nanu lkulinyi laibatisa leme Krispo o Gayo,

¹⁵pee mejo ake likae eji te nkarna ai eibatisaki intae.

¹⁶Aibatisa sii enkaji e Stefana; ore metii lelo majo kaata likae laibatisa nanu.

¹⁷Eitu aairriwaa Kristo maibatisa, kake pee alikioo lelo Omon Supati naitelelek enkutuk pee ening'unoyu meoruni ake osalaba le Kristo engolon enye.

¹⁸Ore ina likioroto o salaba naa emodai te lelo ootii enkoitoi nalo mutata, kake ore iyiook ilootii enkoitoi e njeunoto naa ninye engolon e Nkai.

¹⁹Amu ejo ilkigerot, “Kaitarruoo nanu eyiolounoto oo lang'eni, naiwuang'ie eng'eno e lelo ng'eni.”

²⁰Koree ilo tung'ani ng'en? Koree ilo asirani. Koree eolaiguanani le na kata? Keitu eitomod Enkai eng'eno ena kop?

²¹Amu ore Enkai te ng'eno enye nagut neitu eisho iltung'ana metayiolo ninye te ng'eno enye. Kake etonyorra Enkai aitajeu lelo ooiruk ninye to rrekie le ilo rorei likilikioo ojo lelo ng'eni emodai te ninche.

²²Olmonekie eikilikuanu Ilyahudi neing'oru Ilyunani eng'eno,

²³kake Kristo otashoki kilikioo iyiook, otaa ninye errorroto too Lyahudi neaku emodai too Loreren;

²⁴kake ore te lelo ooipotoki, aa Ilyahudi aashu aa Ilyunani, Kristo ninye ora engolon e Nkai naa eng'eno e Nkai.

²⁵Amu ng'en emodai e Nkai alang eng'eno o ltung'ani, negol enchalan e Nkai alang engolon o ltung'ani.

²⁶Entadamu enkipototo inyi, ilalashera laainei. Mme kumok ilkulinyi oora apa ng'eni anaa naajo iltung'ana, neme kumok iloogol; neme kumok iloo lmarei kituaak;

²⁷kake etegelua Enkai nena naamoda te nkop pee eitukurru nena naagol, negelu lelo oojo enkop emoda pee eitukurru lelo oogol.

²⁸Etegelua Enkai lelo lemejo enkop keeta tipat nemenari sii, o lelo lemeetae apa pee etum aitaa pesho nena naatae,

²⁹pee metumi oltung'ani hoo owuasa te dukuya Enkai.

³⁰Te nkaraki easata enye pee itii intae atua Kristo Yesu oitaa Enkai te iyiook eng'eno o esupatisho o esinyatisho o elakunoto.

³¹Ore naa anaa enajo lkigerot, “Ore ake oloyieu neng'ida nchoo eng'idare Olaitoriani.”