Read Maasai Bible – Biblia Sinyati 1 Ilkorinto 15 Bible Online

1 Ilkorinto 15 - Maasai Bible – Biblia Sinyati bible

1 Ilkorinto 15

¹Ore taata, ilalashera o nkanashera aainei, kayieu naitadamu intae lelo Omon Supati latolikio intae natuutaka intae enajo. Nitang'amutua intae, nintasheito tiatua,

²naa ninye pee eitajeuni taata intae, te netaa mbung'itata aakurraki nena apa naitanapa nanu intae, nitisiputua aajo mme ene pesho enkirukoto inyi te ninye.

³Aitarasaka intae naiturukie ina natang'amua sii nanu: nchere etua Kristo te nkaraki ng'ok ang anaa enajo Ilkigerot,

⁴netunukayioki ninye, neitopiwuoki te nkolong e uni anaa enajo Ilkigerot,

⁵neipang'aka Kefa, neitoki lelo Tomon o Aare;

⁶ore te siadi ina neipang'aki nabo kata lalashera oolusoo te iip imiet, neton eishu ilkumok le lelo o taata, kake etuata kulikae.

⁷Ore te siadi ina neipang'aki Yakobo, neitoki ilkipaareta pooki;

⁸ore olobayie te pooki, naaipang'aki sii ninye nanu, atiu anaa ilo oini te nkata neme enenye.

⁹Amu aaipang'aka sii nanu, nanu oloti aisul ilkipaareta, nemaanarikino naaji olkipaaret amu aisilisilo esirit e Nkai.

¹⁰Kake kara toki nara te nkaraki empiris e Nkai, naa ore ina piris naaishoo ninye neitu eaku pesho tiatua nanu. Ore enatiu, nanu otaasishe alang lelo kulikae pooki, kake mme nanu otaasa nena, kake ina piris e Nkai natii atua nanu.

¹¹Neaku, ore etii nena, te nalikioo nanu aashu elikioo ninche ilo ake olkilikuai lang naa ninye iruko intae.

¹²Amaa te naa ketolikioyioki Kristo aajo eitopiwuoki too lootuata, kaji enyaaka atiu pee emanaa kulikae tiatua intae aajo meetae empiunoto oo lootuata?

¹³Te nemeetae empiunoto oo lootuata, netaa naa eitu eitopiuni Kristo kewan;

¹⁴naa te netaa eitu eitopiuni Kristo, naa pesho ele kilikuai likinosu, naa pesho sii ninye enkirukoto inyi.

¹⁵Ore etii nena, keitoki sii aaku kintaikitia iyiook Enkai shakenisho e lejare amu kinchakenikito aajo Enkai naitopiwuo Kristo; kake eitu naa eitopiu ninye te netaa meitopiuni ilootuata.

¹⁶Amu te nemeitopiuni ilootuata, netaa naa eitu sii ninye eitopiuni Kristo;

¹⁷naa te netaa eitu eitopiuni Kristo, naa pesho enkirukoto inyi neton itii atua ing'ok inyi.

¹⁸Netaa sii ore lelo ootuata etii atua Kristo neimina ntarasi.

¹⁹Te nemegiroo osiligi lang likisilig Kristo ena kishui nikiaata taata, nemeetae naa too ltung'ana pooki iltoluti oolang iyiook.

²⁰Kake kesipa tukul nchere eitopiwuoki Kristo too lootuata, olng'anayioi le dukuya te lelo ootuata.

²¹Amu ore te nkaraki naa oltung'ani obo oyaka enkop keeya, oltung'ani obo sii oyawua empiunoto oo lootuata.

²²Ore ake anaa ina naye pooki tiatua Adam, nejia sii etiu keitopiuni kenya pooki tiatua Yesu Kristo.

²³Kake kelotu embae pooki te nkata enye: Kristo oituruko aitadedeyie, ore kenya, te neshukunye, neitoki lelo lenyena;

²⁴neitoki alotu enkiting'oto, ina kata elotu aitarasaki Enkai Papa enkitoria, eidipa ninye aishie nkitoriat pooki, o nkidimat pooki o engolon.

²⁵Amu keng'as ake Kristo aitoreisho o metaba anaa nepik Enkai ilmang'ati lenyena pooki abori inkejek enyena;

²⁶ore olmang'atinta obayie oishieki naa keeya.

²⁷Amu, “Eitadowuo Enkai ntokitin pooki meetu abori inkejek enyena.” Ore taata te nejo Ilkigerot eitadowuoki ntokitin pooki, keibala ajo metii ninye Enkai esiana, amu Enkai naa apa naitadowuo ntokitin pooki aisho Kristo meitoria.

²⁸Kake ore pee eidipi aaitadou ntokitin pooki ti abori ilo Inoti lenye, ina kata kenya eitadouni ninye kewan ti abori enkitoria e Enkai, natipika ntokitin pooki abori ninye, peyie eitore Enkai pooki toki.

²⁹Amaa te nemeetae empiunoto kaa retoto etum lelo tung'ana oopuo meibatisai te rishata e lelo ootuata? Amaa te nemeitopiuni tukul ilootuata,

³⁰kainyoo naa pee maserian pooki kata?

³¹Kesipa ajoki intae, ilalashera o nkanashera aainei, ore te nkaraki nawuasare intae Ile Kristo laaijo nanu, kaye nanu anaa ake.

³²Amaa te naa kataarare ng'uesi te Efeso te tung'anisho ai ake duoo, kaa naaji eret ina te nanu? Naa te netaa meitopiuni ilootuata, “Ematadaata naa nikiokisho, amu eikiyiooki aaye taaisere,” anaa enajo Ilkigerot.

³³Emincho eitapong'ori intae: “Ore encholiek oo lkiminchal keinyal olkuaak.”

³⁴Enoto intae olkuaak sidai, emienikino ing'ok. Etii kulikae linyi lemeeta eyiolounoto e Nkai. Najo nejia pee aitukurru intae.

³⁵Kake keikilikuanu likae nejo, “Kaji eikoni te neitopiuni ilootuata? Kaji eikununo osesen otum ninche?”

³⁶Kebaa ena modai ninkilikuanua! Ore ina niun iyie openy nemeeta nchere keitu eng'as aye pee etum atubulu.

³⁷Ore ina niun naa enkantererai ake, aa ene nkano aashu ene ae ake tapa.

³⁸Enkai naishoo mpukunot enye anaa enayiewuaki ninye enkantererai ake pooki.

³⁹Neme ine mpukunoto nabo nkiri pooki. Empukunoto nabo nkiri o ltung'ani, naa ae inoo ng'uesi, naa ae inoo motonyi, naa ae inoo sinkir.

⁴⁰Keetae iseseni le keper neetae iseseni le nkop; kake keeta seseni le keper enkishiaa enye neeta iseseni le nkop enenye.

⁴¹Keeta enkolong enkishiaa enye neeta olapa enenye; keeta doi ninye olakira obo enkishiaa e wang'an nalang eno likae.

⁴²Nejia etiu empiunoto oo lootuata. Etiu anaa enkantererai, kenukari osesen te nkop eidaaya, neitopiuni te mpukunoto nemeidaaya ae kata.

⁴³Kenukari te menatisho, neitopiuni te nkishiaa. Keshal enukari, neitopiuni eiputa engolon.

⁴⁴Kenukari aa osesen le na kishon, neitopiuni aa ole nkiyang'et. Keetae osesen le na kishon, kake keetae sii likae sesen le nkiyang'et.

⁴⁵Ina doi pee ejo Ilkigerot, “Neaku ilo tung'ani oiturukuo, Adam, osesen oishu,” ore Adam obayie, neaku oloishoru enkiyang'et enkishui.

⁴⁶Eng'ura aajo mme ene nkiyang'et naiturukuo, kake ina e na kishon, neitoki taa ina e nkiyang'et.

⁴⁷Enkop apa eing'uaa oltung'ani oiturukuo, too nkulupuok[1] eitobiruaki; naa keper eing'uaa ilo tung'ani li are.

⁴⁸Ore apa anaa enatiu oltung'ani loo nkulupuok nejia sii etiu lelo laa loo nkulupuok, ore anaa enatiu oltung'ani le keper naa nejia sii etiu ile keper.

⁴⁹Ore anaa enikiwaita nyaanyukie e ilo tung'ani loo nkulupuok, aikiya sii nyaanyukie e ilo tung'ani le keper.

⁵⁰Ore enajoito, ilalashera o nkanashera aainei, naa ena; meidim osesen o sarge aatujung enkitoria e Nkai, nemeidim entoki naidaaya atujung'o enkitoria e Nkai, nemeidim entoki naidaaya atujung'o enemeidaaya.

⁵¹Entoning, embae naisudoro aliki intae: mikiiye pooki kake keibelekenyi kenya iyiook pooki

⁵²nabo kata, te nkirriapata e nkong'u; amu keru emowuo, neitopiuni ilootuata nelakuni aaoru keeya ntarasi, neibelekenyi iyiook.

⁵³Amu ore nena pooki naaye neaku ake inemeye.

⁵⁴Ore pee eaku etalakuaki nena naaye aaoru keeya, netaa nena naaye inemeye, neitabari ina kata ina nasira too Lkigerot nesipayu nchere. “Etoijoyioki keeya tiatua olkishuroto.”

⁵⁵“Keeya, koree emirishoi ino? Keeya, koree enoshi bae ino?”

⁵⁶Ore oshi embae nang'orishore keeya naa ng'ok, naa nkitanapat engolon oo ng'ok:

⁵⁷kake ashe te Nkai naishoo yiook matimirisho to Laitoriani lang Yesu Kristo.

⁵⁸Ore te nkaraki nena, ilalashera o nkanashera aainei nanyor, entashoito, entaa ilemeigusugusieki, entaboreyia anaa ake te nkisiayiare o Laitoriani, iyiololo aajo ore tiatua Olaitoriani mme ene pesho esiaai inyi.