Read Maasai Bible – Biblia Sinyati 1 Ilkorinto 2 Bible Online

1 Ilkorinto 2 - Maasai Bible – Biblia Sinyati bible

1 Ilkorinto 2

¹Ore naa etiu nejia, lalashera laainei o nkanashera, eitu alotu enitii te nkarriyiano oo nkirorot aashu te ng'eno, apa pee alotu aliki intae ina sipata naisudoro e Nkai.

²Atumuta apa ajo mayieu nayiolou toki tiatua intae neme Yesu Kristo ake, naa ilo otashoki.

³Ore ina kata pooki atii atua intae kashal apa, naureisho naikirikira.

⁴Neitu aasishore irorei oomelok le ng'eno airorita o te likioroto ai, kake aataasishore enkitoduaaroto e Nkiyang'et o engolon,

⁵pee meaku eng'eno e tung'ani eitasheyie enkirukoto inyi kake te ngolon e Nkai eitashe.

⁶Nikiaasishore ake sii irorei le ng'eno te lelo ootubulutua, kake mme eng'eno ele porror neme ene lelo ooitoreisho tele porror amu eidipa ninche aataa keish.

⁷Aa eng'eno e Nkai naisudoro kilimu, eng'eno naisudoro apake, naa Enkai naiguanua te nkiterunoto, te nkaraki enkitoo ang.

⁸Nemeetae hoo obo le lelo aitoriak lena kop otoning'uo ina, amu tenaa ketoning'utuo, anaata eitu epuo aashe Olaitoriani le nkitoo;

⁹kake, ore anaa enajo ilkigerot, “Eneitu hoo edol enkong'u neitu hoo ening enkiok, neitu hoo ejing oltau lo ltung'ani, ninye eitobiraka Enkai lelo oonyor ninye.”

¹⁰Iyiook etaboloko Enkai kuna baa te Nkiyang'et. Enkiyang'et najur pooki toki, o metabaiki enguton e Nkai.

¹¹Aing'ae nayiolo inaatii oltau lo ltung'ani neme enkiyang'et natii atua ilo tung'ani? Nejia naa etiu, Enkiyang'et e Nkai ake nayiolo inaatii oltau le Nkai.

¹²Mme nkiyang'et e na kop kitang'amutua iyiook kake enkiyang'et naing'uaa Enkai kitang'amutua, pee kitum aatayiolo nena kishoorot naaishoo Enkai iyiook.

¹³Ninye ena nikilimu, neme too rorei oolimu eng'eno e tung'ani kake too rorei ootuutaka iyiook Enkiyang'et neibalakinye nena e nkiyang'et lelo tung'ana le nkiyang'et.

¹⁴Menyorraa oltung'ani ake le nkop inkishorunot e Nkiyang'et e Nkai; emodai nena te ninye; nemening'u nena amu te nkiyang'et ake eidimi aatujur.

¹⁵Nejur ninye oltung'ani le nkiyang'et pooki toki, hoo nemeetae olojur ninye.

¹⁶Ae ng'ae doi, otayiolo indamunot o Laitoriani metaa keutaa ninye? Kake kiata endamunoto e Kristo.