Read Maasai Bible – Biblia Sinyati 1 Ilkorinto 6 Bible Online

1 Ilkorinto 6 - Maasai Bible – Biblia Sinyati bible

1 Ilkorinto 6

¹Keetae pasa obo linyi, laa te neetakinore olikae, neitieu ashomo kotini e lelo leitu eiruk lemelo dukuya iltung'ana le Nkai?

²Aimiyiololo aajo iltung'ana le Nkai ooyooki aaiguanare enkop? Amaa te naa intae ooyooki aaiguanare enkop, keaku mindimidimi aaiguanare nkunyinyi baa?

³Aimiyiololo aajo iyiook ooyooki aaiguanare ilmalaika, tapala duoo iyie noshi ake baa pooki e nkishon?

⁴Amaa ti niaata noshi ake baa pooki e nkishon, ei lelo tung'ana leme le toki tiatua esirit igelulu meiguanare?

⁵Kairo pee aitukurru intae. Ketaa doi meetae oltung'ani ng'en tiatua intae ooidim atirisha oltung'ani o lalashe lenye?

⁶Ketaa doi kerik olalashe olikae alashe enkiguana naa enoo leitu eiruk?

⁷Etaa ina naibalie nchere eturua intae tukul ena te neton ake iatata nkiguanat e kotini olikae o likae. Aime enaikash ti ning'iri mikintaasi enemetii esipata? Oo doi pee mincho kisimarieki?

⁸Neaku, intae ooinyalisho, ninyalinyala sii ilalashera o nkanashera!

⁹Anaa aimiyiololo aajo mejung ileme supati enkitoria e Nkai? Emilej ate, ore lelo tung'ana ooibor onyek o loomon nkitanyaanyukot naaitaae nkaitin o loololoito, iloosokori o loosokorisho,

¹⁰ilapurrok, ilooata olorok, ilamerak, iloomorisho, ilaisimak, meetae hoo obo le lelo ojung enkitoria e Nkai.

¹¹Naa nejia apa etiu kulikae linyi, kake eitukuoki intae, neitisinyaki intae, neikenakakaki intae esipata, te nkarna o Laitoriani lang Yesu Kristo, o te Nkiyang'et e Nkai ang.

¹²“Keishoruno pooki toki te nanu”, kake meretisho ntokitin pooki, “Kaaishoro nanu pooki toki” — kake mayieu naaitore engolon e ae toki.

¹³“Ene nkoshoke endaa, naa ene ndaa enkoshoke” — kake keiwuang'ie kenya ake Enkai pokira are. Ore osesen pee eetae mme ole nkiborra oo nkonyek kake olo Laitoriani: naa olo sesen Olaitoriani;

¹⁴Enkai naas pokira are eitopiwuo Olaitoriani naa keitopiu sii iyiook te ngolon enye.

¹⁵Aimiyiololo aajo ore iseseni linyi naa irubat o sesen le Kristo? Paa kalo nanu aya rubat o sesen le Kristo aitaa rubat o sesen le mulayoi? Maiko aikata nejia!

¹⁶Aimiyiololo aajo ore oloibung'are emulayoi netaa osesen obo o ninye? Amu ejo Lkigerot: “Keaku pokira are osesen obo.”

¹⁷Kake ore ilo oibung'are Olaitoriani netaa enkiyang'et nabo o ninye.

¹⁸Elanya enkiborra oo nkonyek. Ore enkae ng'oki ake pooki naas oltung'ani naa oriong osesen lenye etii kake ore ilo orubare eloloito naa osesen lenye epik eng'oki.

¹⁹Amaa, aimiyiolo ajo ore osesen lino naa enkaji e Nkai namany Enkiyang'et Sinyati natii atua iyie, naa Enkai eing'uaa ina pee iata, nemeekure ira ole kewan ino?

²⁰Kinyiang'uaki te nkinyang'a. Nchoo naa Enkai enkitoo tiatua osesen lino.