Read Maasai Bible – Biblia Sinyati 1 Ilkorinto 7 Bible Online

1 Ilkorinto 7 - Maasai Bible – Biblia Sinyati bible

1 Ilkorinto 7

¹Naa ore taata, te nkaraki nena baa nikingerokito, ee, aisidai te nemeboitare olee enkitok,

²kake ore te nkaraki natasapuka oleng enkiborra oo nkonyek, enchoo ake olee eeta enkitok enye, neeta enkitok olpayian lenye.

³Neisho olpayian enkitok ina naishiaakino; neiko sii ninye enkitok nejia olpayian lenye.

⁴Meitore enkitok osesen lenye, kake keitore olpayian lenye; nemeitore sii ninye olpayian osesen lenye, kake enkitok naitore.

⁵Emimitikino naa, meteleku ti nining'okinono te rishata naje pee itumokiki enkomono nintokiki ake aatumo. Emincho ake Sheitani erishata meyaki intae intemat te nkaraki nemeidim oltung'ani aitoria kewan.

⁶Kajo nejia aa intae aiteleliaki, mme kaitoriaki intae.

⁷Kayieu naaji netiu ilewa pooki anaa nanu; kake keeta ake oltung'ani enkishooroto enye naing'uaa Enkai, neisho likae te na oitoi, neisho likae te nkae.

⁸Ajoki lelo leitu eyamisho o nkolia eji, eisidai te netoni etiu ninche anaa nanu.

⁹Kake te nemeidim aaitoria ate, enchoo eyamisho ashu eyami ninche; enaikash ti niyamisho ashu kiyami alang ti nikipejito ake eyieunoto.

¹⁰Kake aitanap lelo ooyamishote, naa Olaitoriani oitanap mme nanu, pee meorore ake enkitok olpayian lenye,

¹¹nemeiturraa sii ninye olpayian enkitok enye. Naa te neorore enkitok olpayian, neton meyama aashu eshuko aning'ore olpayian lenye.

¹²Ore te lelo kulikae pooki najo nanu, neme Olaitoriani ojo, te neeta olalashe enkitok neitu eiruk, netonyorrayie metotona ninche te nebo, nemeitoki ilo aituraa ina;

¹³naa te neeta enkitok olpayian leitu eiruk, netonyorrayie metotona te nebo, nemeorore sii ninye olpayian lenye.

¹⁴Ore ilo payian leitu eiruk naa ole Nkai te nkaraki ina kitok enye, naa ene Nkai enkitok te nkaraki ilo payian oiruko. Naa te neme nejia neaku mme ine Nkai nkera inyi; kake ore enatiu, ine Nkai ninche.

¹⁵Kake te neyieu ilo leitu eiruk, neorori, ore ilo alashe aashu ina anashe, nelakuno te nena pukunot. Kake eipoto Enkai intae ilooiruko entotoni to sotua.

¹⁶Na kitok, ai ti aji iyiolo te naa aiyie naitajeu olpayian lino? Lo payian, ai ti aji iyiolo te naa iyie oitajeu enkitok ino?

¹⁷Ore ake etiu nejia, enchoo oltung'ani eunokino enkishon enye te risioroto oo nkishoorot naaishoo Olaitoriani o te nkipototo natang'amayie te Nkai. Ena kitanapata aitanap isirito pooki.

¹⁸Keipotoki oltung'ani eidipaki aatumurat? Emincho etem ajo aisudoo lmonek le murata. Keipotoki oltung'ani memurata? Emijo metumurati.

¹⁹Mme emurata toki, neme toki te nememurata oltung'ani, kake enkitabaroto oo nkitanapat e Nkai naata tipat.

²⁰Enchoo eton pooki tung'ani etiu anaa pee eipoti.

²¹Ira orrindik pee kimpoti? Mme toki ina. Tinikitalakuaki taasishore ake iyie ina sinkaisho ino.

²²Ore oloipot Olaitoriani aa orrindik netaa ilo ololakuno lo Laitoriani; ore sii ninye ilo oipotoki elakuno netaa orrindik le Kristo.

²³Einyang'uaki intae te nkinyang'a. Emiaku irrindiki loo ltung'ana.

²⁴Neaku lalashera laainei, totona ake pooki tung'ani te nebo Enkai te mpukunoto apake niaata pee kimpoti.

²⁵Ore too naaipirta lelo leitu eyamisho nemaata nkitanapat naaing'uaa Olaitoriani kake aliki intae enajo nanu anaa ina naaitaa olng'ur lo Laitoriani oloisiligayu.

²⁶Kajo nanu, ore te nkaraki nena baa taata naaitanyamalita intae, sidai te naa keton oltung'ani etiu anaa enatiu ninye.

²⁷Iyamishe aata enkitok? Mijo oi alakuno pee maata. Ira ilo lemeeta enkitok naenikino? Ming'oru naa enkitok.

²⁸Kake ti niyamisho, neitu ias eng'oki. Naa teneyami entito neitu eas eng'oki, kake ore lelo ooyamisho ketum osina te nkop, naa ilo ajo pee arishie intae.

²⁹Kajo nanu nji, lalashera laainei, eidorrop erishata; enchoo lelo ooata nkituaak etiu anaa aimeeta,

³⁰ore lelo ooishir netiu anaa ilemeishir, netiu lelo oong'ida anaa lemeng'ida, netiu lelo ooinyang'isho anaa ilemeeta toki.

³¹Ore lelo ooatayie tipat enkop netiu anaa ilemeetayie tipat; amu kelusoo empukunoto ena kop o mbaa enyena pooki.

³²Kayieu nimiaatata osina. Ore oltung'ani leitu eyamisho naa mbaa o Laitoriani enyamaliki, neyieu neitiship Olaitoriani.

³³Ore oltung'ani oyamishe naa mbaa e nkop enyamaliki, neyieu neitiship enkitok enye,

³⁴naa keoro ndamunot enyena. Ore enkitok nemeyama, anaa enemeyiolo olee naa mbaa o Laitoriani enyamaliki; pee etum ataa sinyati to sesen o to ltau. Kake ore enkitok nayama naa mbaa e nkop enyamaliki; naa olpayian lenye eyieu neitiship.

³⁵Ntae ayieu naret pee ajoito kuna baa; neme kajo pee aibooyo intae, kake te nkaraki barare nauno o ndamunot naasho naanyor Olaitoriani.

³⁶Te nedol oltung'ani ajo keitanyamalita entito shoruet enye nemeyiolo likae lee, naa te nerrish naleng eyieunoto, nchoo eyama; eitu eas eng'oki.

³⁷Kake te neitashe oltung'ani auno to ltau lenye, nemeeta ae naitirrishita, neidim ninye aitoria enkorrok enye makewan, netaasa esidai te neitu eyam ina tito neisho eton meyama.

³⁸Neaku ore ilo oyam entito shoruet enye netaasa esidai, ore ilo leitu eyamisho, ninye oikash to likae.

³⁹Eteenikiaki enkitok olpayian lenye anaa neishu; kake te neye olpayian lenye nelakuno neidim ayama likae oyieu, kake tenaa kolairukoni.

⁴⁰Kake keshipa neikash te neton etiu nejia. Nejia ajo nanu, naa kajo sii kaata Enkiyang'et e Nkai.