Read Maasai Bible – Biblia Sinyati 2 Ilkorinto 11 Bible Online

2 Ilkorinto 11 - Maasai Bible – Biblia Sinyati bible

2 Ilkorinto 11

¹Enting'iria peno emodai ai, aomon ntae enting'iria.

²Kalom nanu intae to lom le Nkai kewan. Aishoo intae Kristo anaa entito naishoori meyiolo likae lee, naishoo intae ninye metaa ninye ake openy olpayian linyi.

³Kake osunkuroi apake Sheitani oteleja Hawa, naure ake pee meinyali ndamunot inyi neaku mirukurukorere Kristo te nyorrata naitoriori nemetii eleyiata.

⁴Amaa te nelotu likae aliki intae likae Yesu leme olikitolikitio intae aashu ti nitang'amutua ae kiyang'et neme enapa nitang'amutua, keitu pasa doi eaku itasiokito aang'amu?

⁵Kajo nanu madou hoo ti ae bae ake pooki te lelo kipaareta lijojo eikituaak oleng.

⁶Ebaiki nemara arriyia to rorei, kake kajo sii kayiolo naaba anaa naayiolo likae ake pooki. Kimbalakinye intae ina bae too nkoitoi pooki o too ntokitin pooki.

⁷Atolikio intae Ilomon Supati neitu aitalak intae hoo toki. Aiturukie intae hoo naisiadunye kewan. Keng'oki apa ina?

⁸Atang'amayie eretoto e kulie sirito, naasishore nena pisai aisiaai intae. Ke mpurrorre ina?

⁹Ore apa atii atua intae naata nkolati, neitu aitaa kewan olola le likae, amu ore pee ebau ilalashera ooing'uaa Makedonia naaiputakita nkolati aainei neitulusoo. Aing'ura oleng pee maaku hoo olola te intae ti ae oitoi ake pooki, naa nejia eton aikunita o te ne.

¹⁰Ore anaa enatii esipata e Kristo atua nanu, meetae entoki hoo naamitiki awuasare ina tiatua Akaia.

¹¹Aainyoo? Ke nkaraki nemanyor intae? Keyiolo Enkai ajo kanyor intae.

¹²Kake kalotoo ake aasita ena naasita taata, pee maisho erishata lelo ooyieu ina rishata naitoduaarie ate tenaa kerisiore esiaai naishooki ninche enaang.

¹³Ore iltung'ana laaijo lelo naa lkipaareta le lejare, ilaisiaayiak oolejisho, ooitaakuno lkipaareta le Kristo.

¹⁴Neme enking'asia ina amu keitaakuno ninye Sheitani kolmalaika le wang'an.

¹⁵Neme enking'asia naa, te neitaakuno isinkan lenyena eitaa ate isinkan le supatisho; keyooki aaiting'oki enaishiaakino nena naataasa ninche.

¹⁶Kaitoki ake ajo, emincho ake ejo likae kamoda, naa ti nijojo intae kamoda entang'amayioki atiu nejia pee awuasa sii nanu penyo.

¹⁷Ore kuna nawuasare taata neme inkirorot Olaitoriani kake emodai ake abaraki.

¹⁸Kenya iltung'ana kumok kutukie too mbaa enye e nkishon; kainyoo naa pee manya sii nanu kutuk?

¹⁹Ijo ming'idada aa ing'iriri ilmoda! Ijo mirara pasa intae ng'eni maate!

²⁰Ing'iriri te neitaa intae likae irrindiki, nedaare intae likae, nenya likae intae anaa olowuaru, nemenu intae likae, nedam likae intae inkomomi.

²¹Atonyorrayie nanu te nkurruna nchere atashala oshi. Kake te neetae oloyieu nenya kutuk ti ai toki (kairorita taa doi anaa olmodai), kaidim sii nanu ainosa kutuk.

²²Ae Lbrania ninche? Kara sii nanu. Ae Siraeli ninche, kara sii nanu. Ae le ishoi e Abraham ninche, kara sii nanu

²³ae laisiaayiak le Kristo ninche, nanu olusoo airorita anaa oloata oloirirua? Ateeke nanu te siaai nagol, te eenata te jila, te earata oo nkeenta o te batisho e keeya nalang enayiolo ninche.

²⁴Katitin imiet aatipika Ilyahudi noshi oshot tomoni uni o naaudo;

²⁵katitin uni aatooshoki too nkeenta oo sekenke; aairruyaki kata nabo too soito, katitin uni eimiso emeli atii; aawa enkewarie nalulung'a o enkolong nabo tiatua enaiposha.

²⁶Ore too lotot aainei nemayeng'iyeng'a, nanoto batisho too lkejek, batisho too laisimak, batisho to lorere lang, batisho too ltung'ana loo Loreren, batisho tiatua enkanasa, batisho ti ong'ata, batisho tiatua enaiposha, batisho tiatua lelo ooitaakuno ilalashera.

²⁷Ateeke natamio too ngolikinot. Kumok inkatitin natala njio, nalo aata esumash o enkure nkatitin kumok maata endaa nanya, naanya enkijape nkatitin kumok maadupa nkilani.

²⁸Ore metii nena kulie pooki, naata olola laainaur anaake anyamaliki sirito pooki.

²⁹Aing'ae oshal paa nanu lemeshal? Eimang'arie sii nanu ina shalan enye? Amaa te nebatata likae, eimaanya osina?

³⁰Te naa kanya ake kutuk, nanya too mbaa naaipirta enchalan ai.

³¹Enkai naa Papa lo Laitoriani lang Yesu Kristo, laa ninye eisisi ntarasi, nayiolo ajo malejisho nanu.

³²Ore te Dameski naa olbalosi otii ti abori Olaiguanani Aretas otorripo enkanasa e Dameski ejo pee aaibung nanu

³³kake aaitadoyioki aaililioo te nkikapu aaimie elusie e suntai, nailany batisho.