Read Maasai Bible – Biblia Sinyati 2 Ilkorinto 12 Bible Online

2 Ilkorinto 12 - Maasai Bible – Biblia Sinyati bible

2 Ilkorinto 12

¹Kanya ake kutuk hoo naamakua, metaa kalimu taata nduaat o mbolunot naaing'uaa Olaitoriani.

²Kayiolo nanu oltung'ani tiatua Kristo, laa ore apa too larin tomon o ong'uan ooishari neilepieki aaya shumata e uni; naa te naa ei to sesen aashu metii osesen nemayiolo, Enkai nayiolo.

³Kayiolo ajo ore ilo tung'ani (te naa taa to sesen, aashu meeta osesen nemayiolo, Enkai nayiolo) eilepieki aaya Paradiso,

⁴nelo aning imbaa nemelimunoyu, nemeishoro oltung'ani meiroro.

⁵Kawuasare mbaa o ltung'ani laaijo ilo, kake ore tialo kewan ainanu nemanya kutuk, meteleku mbaa e nchalan ai.

⁶Ore hoo te naa kayieu nanya kutuk nemaaku olmodai, amu keaku isipat airo; kake mawuasa, amu ebaiki nejo likae kara kitok alang enaba, negiroo ina mbaa aainei naadolita ninye te nanu o nena naaning aa nanu eing'uaa.

⁷Naa ore pee majo ailepie kewan ajo kara kitok te nkaraki enkumoi oo mbaa naatabolokoki, aaishooki olkikuei to sesen lai, olkipaaret le Sheitani, oirriwuaki maatarasaki, pee maailepieki aaitulusoo oleng.

⁸Katitin uni atasayia Olaitoriani maatooru aya.

⁹Kake aatiaaka ninye, “Eikibaiki iyie empiris ai, amu te wueji neshal eitabari engolon ai katukul.” Neaku kang'idakino oleng awuasare enchalan ai, pee emany engolon e Kristo atua nanu.

¹⁰Te nkaraki ina pee ang'amu enchalan te ng'ida o enkinyala o ngolikinot o sinaitin o nyamalaritin te nkaraki Kristo, amu ore enkata nashal nanu, ina kata agol.

¹¹Atomode! Intae likitaarakita neishiaakino naaji naa intae likirrepirrepe; amu eitu hoo adou ti ai bae te lelo kipaareta lijojo eikituaak oleng, hoo nemara nanu toki.

¹²Aitoduaa intae ilmonek lo lkipaaret osipa, too lmonek o mbaa e nking'asia o nkiaasin e ngolon.

¹³Kainyoo italaita naanoto nkulie sirito, ai neme ena, nchere eitu aaku olola te ntae? Entapalakaki ena kitadiaata!

¹⁴Kayieu taata nalotu enitii te nkata e uni, nemaaku olola, amu mme doi masaa inyi ayieu kake intae ate. Mme nkera oshi naashumaki intoiwuo kake intoiwuo naashumaki inkera.

¹⁵Ore nanu, kaishooyo kewan naleng te ng'ida, naishorua kewan katukul maataasishoreki te nkaraki iltauja linyi. Amaa te naituluso enyorrata nanyor intae, keng'oru enyorrata naanyorri nanu?

¹⁶Inyoraa naa aajo eitu aaku olola te intae. Ijojo pasa kataa osunkuroi opik intae olosek?

¹⁷Ketaa kaesek intae to ltung'ani obo lairriwaki intae?

¹⁸Nanu otiaaka Tito meeu nairriu olalashe obo meiriamunore. Ketudupore pasa intae Tito? Keitu kipuoyie iyiook ina Kiyang'et nabo, nikiimu orrekie obo?

¹⁹Ijojo pasa kaate kirrepaa ena kata pooki? Ijo mme nejia naa ijojo? Itapong'ori! Te dukuya Enkai kirorita, tiatua Kristo. Pooki enikiyieu iyiook nikiaas, lo shoreta lang, eikiyieu nikishetu intae aaitubulu.

²⁰Amu kaure ajo te nalotu, nalotu ainepu intae mitiuu anaa enayieu, nebaiki ninyorrikiki matiu nanu anaa eniyieuu intae. Kaure ajo keidim atupuku enchankar o lom o engoro o lorok o lmarenke o elejare o enking'oling'ol.

²¹Kaure ajo te nalotu naaigil Enkai ai aitukurru te dukuya intae neaku kaishiraki lelo ooidipa aataas intorrok neitu eirridu aapal ilduruki o ng'ok e loloito o ng'uarrat torrok naatamoo apa ninche.