Read Maasai Bible – Biblia Sinyati 2 Ilkorinto 7 Bible Online

2 Ilkorinto 7 - Maasai Bible – Biblia Sinyati bible

2 Ilkorinto 7

¹Ore te nkaraki nikiaata iyiook kuna kisiligat, ilanyor laainei, emaitukuoi enkiduruk pooki o sesen aashu ene nkiyang'et, nikintabaya esinyatisho te uriata e Nkai.

²Enchoo iyiook erishata tiatua ltauja linyi. Mikiata iyiook olikintaasa enemesipa, nimikiata olikiminie, nimikiata olikimaga.

³Nemajo nejia aa intae adung'oki enkiguana; aidipa atiaaki intae nchere eikinyor intae enaa eikiyieu ake niking'arie intae embae pooki nalotu, nara keeya aashu puaan.

⁴Kaitieu nanu airorie intae; ekawuasare intae. Kaabore enkilejilejata; ore too sinaitin lang pooki kaadooyo nanu eng'ida.

⁵Ekesipa nchere ore pee kipuonu Makedonia neitu eishori iyiook mayagie. Kinoto osina too nkaloli pooki: kitaarate iyiook o lkulikae nikiata sii enkuretisho too ltauja.

⁶Kake ore Enkai, naa ninye naitagol ilooata osina, neitagol iyiook te mbaunoto e Tito;

⁷neme te mbaunoto enye ake, kake o te nkitagolo nanoto tiatua intae. Etolikio iyiook ina niyieuu intae naleng nidolidolo, neliki iyiook olkiyioi linyi, nitaa intae ilaamitu nanu. Ina bae naaitishipa oleng.

⁸Amu tenaa kaitamio intae te mpalai ai, nemairridu (hoo naainosua) amu adol ajo eitamio intae ina palai, hoo te naa te nkiti rishata ake.

⁹Kashipa taata, neme te nkaraki naitamio intae, kake te nkaraki nayawua enkilishoto inyi enkirridunoto, iwaita ina mion inyi anaa enayieu apa Enkai, neaku meetae hoo enatalang'a intae neitu itumutumu te nkaraki iyiook.

¹⁰Ore emion nainyiaaya oltung'ani enkalo nanyor Enkai naa keyau enkirridunoto nabaiki enjeunoto nemeitoki aata enkusaka[3], kake ore emion e nkop keeya eyau.

¹¹Eng'ura enaba enayaka intae ena sipata niwaita ina mion to rrekie onyor Enkai: eng'ura entejo kebaa enkisosion, kebaa eyieunoto niyieuu nimbalielie sipat inyi; kebaa engoro, kebaa enkuretisho, kebaa yieuna, kebaa enyuaata, kebaa enkitamioto! Ore too nkoitoi pooki nintoduaaitie intae nchere miatata entiyoto teina bae.

¹²Neaku taa, ore hoo naigeroko nanu intae, eitu aigeroki intae te nkaraki ilo oinyalishe, neme sii te nkaraki ilo oinyalaki, kake te nkaraki pee aitodol intae te dukuya Enkai nchere irowuarere ijing'ijing'i enkalo ang.

¹³Te nkaraki ena pee eitagoloki iltauja lang. Neme ilkulalang ake eilejilejaki kake eikiting'idate naleng te nchipai e Tito. Iyeng'iyeng'ie intae pooki indamunot enyena.

¹⁴Tenaa taa oshi katawuasare nanu intae te Tito, eitu kintukurrurru intae nanu. Mikiaata ai nikitejo te dukuya Tito neitu esipayu.

¹⁵Enyaaka aponari enyorrata nanyor ninye intae to ltau lenye te nedamu ina nitoning'o intae ninye, nintoomono intae ninye te uriata sapuk o lokirikiri.

¹⁶Kang'ida nanu oleng amu kaidim aisiliga intae katukul.