Read Maasai Bible – Biblia Sinyati Ilgalatia 1 Bible Online

Ilgalatia 1 - Maasai Bible – Biblia Sinyati bible

Ilgalatia 1

¹Paulo olkipaaret leme iltung'ana ooitaa neme ltung'ana eimua, kake Yesu Kristo eimua o Enkai Papa, oitopiwuo ninye aitung'uaa ilootuata

²o kulo alashera ootii te nebo nanu, kirriwaki empalai e nkirorokino isirito pooki e Galatia.

³Meeu empiris o eseriani atua intae eing'uaa Enkai Papa o Laitoriani lang Yesu Kristo

⁴ilo oishorua kewan te nkaraki ng'ok ang pee esaru iyiook tena rishata torrono te risioroto e yieunoto e Nkai ang naa Papa.

⁵Metaa enenye enkitoo ntarasi o ntarasi. Eesai.

⁶Aing'asia nanu eji intae lelo oosioki aaing'uaa Ilo oipoto intae te mpiris e Kristo aaibelekenyakino kulikae omon oopaashari ooji supati.

⁷Meetae kulikae omon supati. Iltung'ana ooetuo aaliman intae eyieu neitapong'oo Lomon Supati le Kristo.

⁸Kake te naa doi naaji iyiook aashu olmalaika ooing'uaa keper olotu aaliki intae kulikae “Omon supati” leme lapa likitolikitio intae, enchoo ilo metaa kediaa.

⁹Kindipa apa aatejo naa kaitoki ake nanu ajo, te naa keetae oltung'ani olikioo kulikae “Omon supati” leme lapa litang'amutua, nchoo ilo metaa kediaa.

¹⁰Ketiu pasa ena anaa enkisisa oo ltung'ana aing'oru ana kene Nkai? Katiu pasa anaa ke ltung'ana ayieu naitiship? Te naa ltung'ana naaji ayieu naitiship, nemaitoki aaku olaisiaayiani le Kristo.

¹¹Lalashera laainei o nkanashera kayieu niyiolouu nchere, ore lelo Omon Supati latolikio intae neme oltung'ani eing'uaa.

¹²Eitu ang'amu te likae tung'ani, neitu aautaki likae tung'ani. Yesu Kristo laataboloko makewan.

¹³Itoning'o intae empukunoto ai apa eton aa lkerreti loo lyahudi aishuyie. Iyiololo enaikuna ainosie osina esirit e Nkai maibooroyu aa kajo aidaikie.

¹⁴Niyiololo aajo ore te sujata oo lkerreti lang nanu oisul to lporror lang aitirrish inkoon oo loo papa.

¹⁵Kake Enkai naategelua apa eton maino naaipot te empiris enye. Neaku ore pee edutaa ninye

¹⁶ajo kaaboloki ilo Inoti lenye peyie atum atolikioi Lomon Supati tiatua Loreren, eitu aikilikuanishore likae tung'ani loo nkiri o sarge.

¹⁷Keitu doi ninye alo Yerusalem enetii lelo apa otaa ilkipaareta eitu aaku nanu. A'a, Arabia atang'asa alo naitoki ashukunye alotu Dameski.

¹⁸Ore etulusoitie ilarin okuni, nashomo Yerusalem peyie alo abaiki Kefa. Atobiko nkolong'i tomon o miet kiboita o ninye.

¹⁹Kake maata likae kipaaret laatoduaa meteleku Yakobo, olalashe Olaitoriani.

²⁰Kanya olmumai ajo kesipa kulo rorei pooki laigerito malejisho te dukuya Enkai.

²¹Anyaaka alo ilkirinen le Siria o Kilikia.

²²Kake ore te nena sirito e Kristo naatii Yudea, eton apa maayiolo ninche enkorrok ai.

²³Ketoning'o ake eji, “Ore olapa tung'ani oinosie iyiook osina, nele taata olikioo enapa kirukoto natang'asa ajo aidaikie.”

²⁴Neisis ninche Enkai te nkaraki nanu.