Read Maasai Bible – Biblia Sinyati Ilgalatia 3 Bible Online

Ilgalatia 3 - Maasai Bible – Biblia Sinyati bible

Ilgalatia 3

¹Lo Galatia oomoda, aing'ae natasakuto intae? Amu eibalakinyeki intae tukul aajo etashoki Yesu Kristo metotiwuo anaa itoduaa too nkonyek inyi maate.

²Entolikioki naa ena nabo; ei nena Kitanapat intabaitie pee itang'amutua Enkiyang'et anaa ke nkirukoto niruko Lomon Supati apa pee ining'ining'i?

³Kesipa nchere imodada enaba nji? Te nkaraki Enkiyang'et e Nkai pee interutua enkishui inyi ng'ejuk. Ijojo pasa indimidimi aaitabai mbaa katukul ti ae oitoi neme ene nkiyang'et?

⁴Keton eeta tipat te intae nena baa pooki niimaitie intae? Mme neijia sii ake etiu.

⁵Amaa ilo oisho intae Enkiyang'et enye neas ine nking'asia tiatua intae, ketaasa te nkaraki naa nkitanapat intabaitie ana ke nkaraki niruko Lomon Supati apa pee ining'ining'i?

⁶Ejo Ilkigerot, “Enkai eiruko Abraham; ore te nkaraki ina neikenaki Enkai ninye esipata.”

⁷Neijia sii etiu te intae. Kajo naa sii ake idolidolo aajo lelo ooata enkirukoto oora nkera e Abraham.

⁸Kejo Ilkigerot tialo Abraham, ilo tung'ani oiruko, “Te iyie emayiani Loreren pooki;” naa te lelo rorei etolikioki apa ninye eton etiooyo kulo Omon Supati. Enkata eitodoluaki nayooki Enkai aikenaki Loreren isipat te nkaraki enkirukoto enye.

⁹Neaku ore ilo oiruk pooki nemaiyiana te nebo ilo Abraham oiruko.

¹⁰Ore lelo pooki ooigarakino enkitabaroto oo Nkitanapat naa kediaa, amu kejo Ilkigerot, “Etediaaki pooki ng'ae lemeas nena pooki naaigero too nkitanapat.”

¹¹Neibala nchere meetae hoo obo lemeetakinore Enkai te nkaraki naitabayie ninye Nkitanapat, amu kejo Ilkigerot, “Ore pooki ng'ae lemeetakinore Enkai ninye te nkaraki enkirukoto nepok.”

¹²Kake mme nabo tukul Nkitanapat o enkirukoto, amu ejo Nkitanapat, “Ti niaas nena naajo Nkitanapat nipok.”

¹³Kristo oinyiang'ua iyiook asaru to ldeket loo Nkitanapat, etanapa ninye makewan ilo deket te nkaraki iyiook, amu ejo Ilkigerot, “Kediaa pooki ng'ae oilili to lchani.”

¹⁴Paa te Kristo Yesu ebaiki emayianata e Nkai natamayiana Abraham Iloreren, neaku enkirukoto eimu ina pee king'amu iyiook enkishorunoto e Nkiyang'et natolimuoki apake.

¹⁵Lalashera laainei, aisho intae enkitanyaanyukoto oo ltung'ana. Entadamu embae natoning'okinote ltung'ana aare. Ore pee eaku eidipa nemeitokini aata oloiwuang'ie aashu eponaa, hoo naa olning'o ake otoning'okinote ltung'ana.

¹⁶Ore too Lkigerot naa Abraham eishooki nkisiligat o ilo oiu ninye. Neitu eji, “Ilooiu ninye,” aajo ilkumok, kake obo etoiwuoki. Ore ilo obo naa Kristo.

¹⁷Ena doi ajo nanu; ore nena Kitanapat naaetuo enyaakita aalusoo larin iip ong'uan o tomoni uni, nemeidim ninche aaiwuang'ie osotua oidipa Enkai atuuno, nemeidim aaibooi enkisiligata enye pee meaku.

¹⁸Te naa too Nkitanapat kitum enkishorunoto e Nkai, nemeitoki naa aaku enkisiligata enye eitabayioki; kake ore enkishorunoto e Nkai naishoo Abraham pesho naa enkisiligata enye eitabayie.

¹⁹Kaa tipat naa apake eeta ninche Nkitanapat pee eetae? Eishoruaki pee eyiolouni teneitadiak oltung'ani, kake eishooki metobiko o metabau ilo inoti le Abraham naa ninye apa eipirieki enkisiligata naitayioki. Too lmalaika apa eitarasuaki nkitanapat aaimunye nkaik eilo oitaiki iltung'ana osotua.

²⁰Ore embae naa obo oas nemeetayieki tipat likae tung'ani. Naa nabo sii ninye Enkai.

²¹Kepaashare nena kitanapat enkisiligata e Nkai? Mme neijia pae. Te naa apa kepokie ltung'ana nkitanapat naaishoruaki, naa anaata eikenaka Enkai iyiook isipat te nkaraki nena kitanapat.

²²Kake keuno Ilkigerot nchere keena pooki toki too ng'ok, paa ina kisiligata naa te nkirukoto tiatua Yesu Kristo eitashe, eishori lelo ake ooiruk.

²³Ore apa eton mikiata enkirukoto, nikiena iyiook ti abori nkitanapat o metaba anaa neboluni ina kirukoto naewuo.

²⁴Neaku etotiutuo nena Kitanapat anaa olaramatani lang o metabau Kristo, pee eikenaki Enkai iyiook isipat te nkaraki enkirukoto;

²⁵kake ore taata eewuo enkirukoto nemeekure kitii abori ilo aramatani.

²⁶Amu te nkirukoto irara nkera e Nkai tiatua Yesu Kristo.

²⁷Ore intae lelo pooki ooibatisaki tiatua Kristo ninchopo Kristo.

²⁸Meitokini aata Olyahudi anaa Olyunani, orrindik aashu ololakuno, olee aashu eng'oruoi; irara pooki nabo tiatua Kristo Yesu.

²⁹Naa ti nirara ltung'ana le Kristo, nirara eishoi e Abraham, nirara ilajung'ok le Nkai te risioroto e ina kisiligata.