Read Maasai Bible – Biblia Sinyati Ile Efeso 4 Bible Online

Ile Efeso 4 - Maasai Bible – Biblia Sinyati bible

Ile Efeso 4

¹Ore naa nanu oena te nkaraki Olaitoriani, asai intae entobik te nkishon naishiaakino ina kipototo naipotoki intae,

²te nkanyit pooki o te mborron, te nebo eng'iriata iretokinono olikae o likae tiatua enyorrata.

³Entonyok enoto naboisho e Nkiyang'et tiatua eseriani naitaa ntae nabo.

⁴Eetae osesen obo o Enkiyang'et nabo anaa ina ake naipotokoki intae ilo siligi obo le ina kipototo inyi.

⁵Obo Olaitoriani, nabo enkirukoto, nabo enkibatisa,

⁶nabo Enkai naa Papa lang iyiook pooki, laa ninye otii shumata pooki neasisho tiatua iyiook pooki netii atua pooki.

⁷Kake eishooki ake oltung'ani pooki te iyiook, empiris te risioroto e nkishorunoto e Kristo.

⁸Ina pee etejoki, “Ore pee eilep ninye alo keper nerik olorora loo looena, neisho ltung'ana inkishoorot.”

⁹(Ore pee eji “eilepa” kaa ae naji neme nchere etadoyie sii apa alo wuejitin e abori enkop?

¹⁰Ilo ake otadoyie onyaaka sii ailep agiroo shumata pooki, pee etum ninye aiputa pooki toki).

¹¹Ore too nena kishorunot enyena naa ketejo pee eaku kulikae ilkipaareta, neaku kulikae iloibonok le Nkai, neaku kulikae ilalikiorok, neaku kulikae ilairritak o laiteng'enak.

¹²Etaasa ena peyie erreten lelo sinyat, te nkaraki ina siaai e ramatare o ene nchetata o sesen le Kristo,

¹³o metabaiki pooki naboisho naimu enkirukoto o eyiolounoto e ilo Inoti le Nkai, nikiaku iltung'ana ootubulutua aamitunye aabaiki entemet e mbotoro nalulung'a e Kristo;

¹⁴pee mikintoki aaku inkera, naanang'ari idie o idie to lkutati ake pooki le nkiteng'enare, o losek loo ltung'ana tiatua esunkuroisho o losekin le lejare.

¹⁵Ore enatii, emairoro esipata tiatua enyorrata, nikibulu too nkoitoi pooki aabulaki atua ilo ora elukunya ang; aabulaki atua Kristo,

¹⁶olaa tiatua ninye eruba osesen pooki, neidikokino atua ninye pooki rubata naishoro, easisho nena rubat pooki aaitobiraki, neitubulu osesen neitubulu kewan tiatua enyorrata.

¹⁷Najo taata ena naishakenoki tiatua Olaitoriani nchere emintoki ake aaisho orrekie le nkishon inyi etiu anaa enatiu oloo loreren, too ndamunot enye e pesho.

¹⁸Eitomisiimisoki ening'unoto enye; neaku ina kishui naishoru Enkai eneeiking'a te ninche, te nkaraki nemeyiolo toki; te nkaraki engolon oo ltauja lenye.

¹⁹Eikaolote ninche neishooitie ate aaisho iloirerioni, netum enkului e pooki bae naiduruk.

²⁰Neme nena eiteng'enieki intae tiatua Kristo!

²¹Amu ajo sii indipa aatoning imbaa enyena naaiteng'enieki intae tiatua ninye, anaa enatiu esipata tiatua Yesu.

²²Entuburukushu enkewan inyi musana, enapa kishon inyi musana narruoyo te nkaraki ng'uarrat naalejisho,

²³naa enchoo eitang'ejuki indamunot inyi.

²⁴Enchopo enkewan ng'ejuk, naitayioki enyaanyukie Enkai tiatua esupatisho nasipa o te sinyatisho.

²⁵Ore te nkaraki ina, entapal elejare, eroro isipat pooki ng'ae eirorie ole latia enye, amu kira iyiook irubat olikae o likae.

²⁶Entagoroto kake emiaas ng'ok; emincho edoyio enkolong itagorote.

²⁷Emincho sii Sheitani erishata.

²⁸Nchoo olapurroni metapala empurrorre, enaikash teniasisho aas esiaai e nkanyit too nkaik enyena, pee etum entoki naisho lelo lemeeta toki.

²⁹Emiimunye ilderrat torrok inkutukie inyi, kake eroro nena sidan naaretisho, neishiaakino teina kata pee eshetu te mpiris lelo ooning.

³⁰Emintagor Enkiyang'et Sinyati e Nkai, natipikieki intae olmishire le ina olong e lakunoto.

³¹Enchoo enkiba pooki o engoro o ewuapa o enchankar o esulare metalama intae te nebo o emorore o entorroni pooki.

³²Eng'urrie olikae olikae, entaa iloonana oishuaa, entapalakinoto olikae o likae anaa enatapalaka Enkai intae tiatua Kristo.