Read Maasai Bible – Biblia Sinyati Ilkolosai 1 Bible Online

Ilkolosai 1 - Maasai Bible – Biblia Sinyati bible

Ilkolosai 1

¹Paulo olkipaaret le Yesu Kristo te yieunoto e Nkai o Timoteo olalashe lang.

²Kingeroki isinyat o lalashera ooisiligayu tiatua Kristo ootii Kolosai. Enoto empiris o eseriani eing'uaa Enkai Papa lang.

³Kishukoki oshi ake Enkai enashe, Papa lo Laitoriani lang Yesu Kristo, too nkatitin pooki kiomonoki intae;

⁴amu kitoning'oitie enkirukoto inyi tiatua Kristo Yesu o enyorrata ninyorrinyorro isinyat.

⁵Ore eneing'uaa nena pokira are naa ilo siligi litoning'o apa pee elotu enitii olkilikuai osipa loo Lomon Supati, naa te keper eiputakini intae ilo siligi.

⁶Nebulita lelo Omon Supati aaiu ilng'anayio te nkop pooki; anaa enaikuna tiatua intae ebaiki ina olong apa nining'ining'i empiris e Nkai niyiolouu te sipata.

⁷Inteng'ena ate te Epafras lanyor naa osinka le ncholiek ai, naa osinka oisiligayu le Kristo ninye te rishata ang,

⁸naa ninye oinosaka iyiook eneba enyorrata naishoo Enkiyang'et intae.

⁹Ore te nkaraki ina, eitu kigira mikiomonoki intae ebaiki ina olong nikitoning'o pee eiput intae eyiolounoto e yieunoto e Nkai tiatua eng'eno pooki e yiolounoto o ltau,

¹⁰nikiomonoki intae pee ipuoyieyie enkishui naishiaa to Laitoriani, naitiship ninye katukul, nitumutumu aatoiu ilng'anayio too mpukunot pooki e supatisho, nitumutumu aatobikoi iponaa oleng oleng aayiolou Enkai.

¹¹Meitagoli intae te ngolon pooki, te risioroto e ngolon kitok e nkisisa enye, te ng'iriata pooki ning'iriri nishipapa,

¹²ninchosho Papa enashe, oisho iyiook esipata neng'arie iyiook enjung'ore oo sinyat tiatua ewang'an.

¹³Ninye otalakua iyiook aitung'uaa enkitoria e naimin neidurrie iyiook maape enkitoria o Inoti lenye kirotet,

¹⁴laa te ninye kiaata elakunoto, aa empalakinoto oo ng'ok ang.

¹⁵Kristo nyaanyukie e ina Ai nemelioo, ninye olkikau le pooki toki naitayioki.

¹⁶Te nkaraki ninye pee eitayioki intokitin pooki, naatii keper o naatii enkop, inaalioo o nemelioo te naa ilorikan loo looitoreisho, aashu inkitoriat, aashu ilooishoro engolon e nkitoria, te ninye eitayioki ntokitin naa ninye eitobirakaki.

¹⁷Ninye otii enkiterunoto oo ntokitin pooki, naa atua ninye eitasheyie aatumokino ntokitin pooki.

¹⁸Kristo elukunya o sesen, aa esirit, ninye enkiterunoto, olkikau otopiwuo aing'uaa ilootuata, peyie eaku ninye oituruk te pooki toki.

¹⁹Amu atua ninye etonyorra Enkai aitamany emborei pooki enye,

²⁰naa te Kristo eitaikinye Enkai osotua ntokitin pooki, te naa inaatii enkop aashu inaatii keper neyau eseriani to sarge lo salaba lenye.

²¹Ore intae, iloora apa aekata ileeiking'a tialo Enkai nirara ilmang'ati tiatua ndamunot inyi o to lbae loo iasat inyi torrok,

²²neitaa intae Enkai nabo to sesen le Kristo eimu keeya enye, pee etum aitarasai intae irara sinyat nimiaatata intiyot nimiaatata entibili naipotokini intae te dukuya ninye,

²³kake nchere pee ipuoyieyie enkirukoto, niunokinono nemeigusugusieki intae, nemeiwuang'ieki intae to siligi loo Lomon Supati litoning'o, ootolikioki pooki oishu te nkop, laa ninye ataa nanu Paulo olaisiaayiani lenye.

²⁴Nang'ida taata nanu tiatua sinaitin laainosieki te nkaraki intae to sesen lai, naitabaya nena naang'or te nkisilisiloto e Kristo to lbae lo sesen lenye, aa esirit.

²⁵Nataa nanu olaisiaayiani lenye te risioroto e siaai naaisho Enkai te nkaraki intae, maitudupai ilo rorei le Nkai katukul,

²⁶naa ninye enkisudoroto naisudoyioki too nkatitin o too lajijik kake etabolokoki taata isinyat lenyena.

²⁷Ninche etegelua Enkai aitayiolo eneba tiatua iloreren enkarsisisho e nkitoo ena kisudoroto, naa Kristo tiatua intae olora osiligi le nkitoo.

²⁸Ninye kilikioo, kinkok pooki tung'ani, nikinteng'en pooki tung'ani te ng'eno pooki, peyie kitum aaitarasai pooki tung'ani otaa bayaroti tiatua Kristo.

²⁹Te nkaraki ena pee anyokita; nanyamaliki te ngolon pooki te nkidimata e ilo Kristo oisiaaisho tiatua nanu.