Read Maasai Bible – Biblia Sinyati Ilkolosai 2 Bible Online

Ilkolosai 2 - Maasai Bible – Biblia Sinyati bible

Ilkolosai 2

¹Kayieu niyiolouu eneba enyamali nanyamaliki intae o lelo ootii Laodikea o lelo pooki leitu aekata aadol enkomom,

²pee aitagol iltauja lenye neitaae nabo tiatua enyorrata. Kaas ena pee etum pooki dupoto te ning'unoto nasipa e ng'eno o enkisudoroto e Nkai laa Kristo,

³olaa tiatua ninye eisudoro imasaa pooki sidain e yiolounoto o eng'eno.

⁴Najo kuna, pee melej intae likae too rorei le lejare.

⁵Amu ore hoo nematii ine to sesen, kake katii te nkiyang'et naa kang'ida te nadol orrekie linyi sidai o enkitashoto e nkirukoto inyi tiatua Kristo.

⁶Ore anaa apa enitang'amutua Olaitoriani Kristo Yesu, enchoo eaku ninye inchuyieyie,

⁷niunokinono neshetuni intae, niponaa inchosho ninye enashe.

⁸Entodol ate mewuapaa intae likae te ng'eno oo losekin o elejare e pesho nasuj inkoon e tung'ani anaa inaajo nkiyang'eta o loing'ang'e, neme anaa naajo Kristo.

⁹Amu atua Kristo emanya elulung'ata pooki e Nkai to sesen,

¹⁰neewuo alulung'ayu enkishui inyi tiatua ninye, olaa ninye elukunya e nkitoria o enkidimata.

¹¹Tiatua ninye etumurataki intae te murata neme enoo nkaik, eitayioki aaoru intae ina kewan o sesen tiatua emurata e Kristo.

¹²Netunukayioki intae te nebo Kristo tiatua enkibatisa, naa te ninye enyaakaki aaitopiu intae te nkirukoto tiatua enkiaas e Nkai, naitopiwuo ninye aitung'uaa ilootuata.

¹³Naa intae, ilootuata apa too nkitarruorrot o too seseni linyi lememurata eitopiwuo intae Enkai te nebo ninye, netapalaka iyiook inkitarruorrot ang pooki,

¹⁴netujuto enkiguana ang; ninye oiwuang'ie kuna, neshe to salaba.

¹⁵Ninye otuuruo nkitoriat o loogol pooki o masaa o larrabal neitoduaaya te neibala, nerik aitaa iyarunot etimira ninche.

¹⁶Emincho naa edung'oki likae intae enkiguana too mbaa e ndaa anaa te naoki aashu te masho, aashu te nkiborra o lapa aashu te nkolong e nkiyeng'iyeng'ata.

¹⁷Oloip ake kuna le kulie naapuonu; kake ore enkewan naa Kristo.

¹⁸Emincho hoo eoruni intae nchuneti lelo ooserem ilmalaika eji neunore kulikae induaat, neipopong'a meeta esipata too ndamunot enye e tung'anisho,

¹⁹nemeenikino ilo ora Elukunya, olaa ninye etumie osesen pooki dupoto neruburuba too morlooishi o sinigi lenyena, nebulu te mbulunoto naa Enkai eing'uaa.

²⁰Te naa ituata te nebo Kristo te nkalo e nena kiyang'eta e nkop, kainyoo eton ake ipuopuo anaa ileton era ile nkop? Oo pee inchosho eitore intae irrekiei leeiking'a:

²¹Eji, “Mimbung, minchamisham, nimiseyie?”

²²(Keimaki ninche intokitin naapurda easishoreki), aasuj inkoon oo ltung'ana o enkiteng'enare enye?

²³Kedoli doi kuna etiu anaa ine ng'eno etukunyaki iltung'ana esujata enye neitadou ate neitupukoo iseseni lenye kake, meeta hoo eneret te nkibooroto oo ng'uarrat o sesen.