Read Maasai Bible – Biblia Sinyati Ilkolosai 3 Bible Online

Ilkolosai 3 - Maasai Bible – Biblia Sinyati bible

Ilkolosai 3

¹Tenaa keitopiwuoki intae te nebo Kristo, eng'oru nena baa naatii shumata, ewueji netii Kristo, etonita te nkaina e tatene e Nkai.

²Empirie indamunot inyi nena baa naatii shumata, mme nena naatii enkop.

³Amu indipa aatuata, neisudoyioki enkishui inyi te nebo Kristo tiatua Enkai.

⁴Ore pee eliooyu Kristo laa ninye enkishui ang, niliooyuyu sii intae te nebo ninye tiatua enkisisa.

⁵Entaar naa metuata tiatua intae, nena naara ine nkop; aa enkiborra oo nkonyek, iloirerioni, olorok, ng'uarrat torrok, olodo ong'u, eomonoto oo nkitanyaanyukot naaitaae inkaitin.

⁶Te kuna baa elotu engoro e Nkai.

⁷Kuna apa ipuoyieyie eton itii atua ninche.

⁸Kake ore taata, ewuang'ie nena pooki: aa ewuapa, engoro, enkiba, esukeny, o lderrat torrok ooing'uaa inkutukie inyi.

⁹Milej olikae olikae, te nkaraki ituburukushutua enkewan musana o rrekiei lenyena,

¹⁰ninchopo enkewan ng'ejuk, naitang'ejuki te ng'eno metanyaanyukie ilo oitayio ninye.

¹¹Ore naa, meetae Olgiriki o Lyahudi o loomurata o lememurata, olmeeki, Osikite[1], orrindik, ololakuno, kake Kristo pooki toki, netii ninye atua pooki.

¹²Irara ntae ilgelunot le Enkai, oosinya nenyorri, enchopo enanai e nkoshoke o lng'ur o emoolisho o emborron o eng'iriata.

¹³Enting'iriakinoto olikae o likae, naa teneeta ake oltung'ani enkigunyung'uny to likae, nepalaki olikae anaa pee kitapalaka sii iyie Olaitoriani, neaku keishiaakino sii iyie pee ipalaki.

¹⁴Ore enaituruk te kuna pooki, enoto enyorrata, te naboisho nabaya.

¹⁵Naa enchoo eseriani e Kristo eitore iltauja linyi, amu ina eipotokoki intae tiatua ilo sesen obo, naa enoto enashe.

¹⁶Enchoo ororei le Kristo emany atua intae te nkarsisisho, inteng'enana niutaroro olikae o likae te ng'eno pooki, iranyiranya Olkerempe le Nkai o sinkolioitin le nkishui inchosho Enkai enashe tiatua iltauja linyi.

¹⁷Ore embae ake pooki niaasiasa, to rorei aashu too nkiaasin, entaas pooki toki te nkarna o Laitoriani Yesu inchosho Enkai Papa enashe eimu ninye.

¹⁸Na kituaak, entoning ilpayiani linyi, anaa enaishiaakino to Laitoriani.

¹⁹Lo payiani, entonyor inkituaak inyi, emisomit.

²⁰Nakera, entoning intoiwuo inyi too mbaa pooki, amu ena naitiship Olaitoriani.

²¹Ore intae iloo menye, emintagor inkera inyi, pee miariara iltauja.

²²Lo rrindiki, entoning te pooki bae lelo oora ilkituaak linyi te nkop, neme te nkisiaayiare oo nkonyek anaa ilooitiship iltung'ana, kake to ltau obo, iurere Olaitoriani.

²³Ore esiaai inyi pooki niasiasa, entaas too ltauja linyi pooki, anaa Olaitoriani iasakiki neme iltung'ana,

²⁴iyiololo aajo to Laitoriani itumutumu enjung'ore anaa olekoisiaayio linyi; Olaitoriani Kristo isiaaitata.

²⁵Amu keyookini aaitalak oloas intorrok nena torrok naataasa, nemeetae enyorrakinoto.