Read Maasai Bible – Biblia Sinyati Yoshua 13 Bible Online

Yoshua 13 - Maasai Bible – Biblia Sinyati bible

Yoshua 13

¹Netamorua apa Yoshua neaku oloo larin kumok; nejoki Olaitoriani ninye, “Itamorua iyie nitaa oloo larin kumok, neton ake etii enkop sapuk oleng naji pee eyae.

²Ena kop ina neton eng'or: inkuapi pooki oo Filistia, o nekua pooki oo Lgerushi

³(ebaiki Shihor te nkalo e nkilepunoto e nkolong e Misiri, moikuape te nkalo o lpolosie le Ekron, neyioloi ninye aajo enoo Lkanaani; netii ilaitoriak imiet loo Lfilisti, lekua le Gasa o Ashdod o Ashkelon, Gati o Ekron) o lekua le Afiim,

⁴ore te nkalo e kopikop, naa enkop pooki oo Lkanaani o Meara nara ninye enoo Lsidoni o metabaiki Afek o metabaiki olpolosie loo Lamori,

⁵o enkop oo Lgibali o Lebanon pooki, te nkalo e nkilepunoto e nkolong, ebaiki Baalgad ti abori oldoinyo le Harmon o metabaiki enejing'ieki Hamat,

⁶ore lelo pooki oomanya ina kop oo ldoinyo ebaiki Lebanon o metabaiki Misrefot-maim, o metabaiki doi ninye Isidoni pooki. Kamiraa nanu makewan aipang'ie te dukuya iltung'ana le Israel; kake tooriki ake duoo iyie ina kop iltung'ana le Israel metaa enjung'ore enye, anaa apa enaaitanapa nanu iyie.

⁷Ore naa taata tooro ena kop metaa enjung'ore too loshon oopishana o lpisiai lo losho le Manase.”

⁸Ore olikae pisiai lo losho le Manase o le Ruben o le Gad neng'amu enjung'ore enye, apa naishoo ninche Musa, te lido kekun le Yordan te nkalo o loosaen, anaa enaishoo ninche Musa osinka lo Laitoriani:

⁹ebaiki Aroer aa ninye apa natii olomanaa lo erata le Arnon o ina anasa natii empolos o erata o ina kop naluaa e Medeba o metabaiki Dibon;

¹⁰o nkanas pooki e Sihon olaiguanani loo Lamori, apa laa ninye oitoreisho te Heshbon o metabaiki olpolosie loo Lamoni;

¹¹o Gilead o nkuapi oo Lgeshuri o Lmaakati o ldoinyo le Harmon pooki o Bashan pooki o metabaiki Saleka;

¹²enkitoria pooki e Oog te Bashan, laa ninye apa oitoreisho tiatua Ashtarot etii atua Edrei (ninye apake etelekuaki to lpisiai le Refaim); kulo apa etimira Musa nearaa aipang'ie.

¹³Ore eyia eitu apa earaa iltung'ana le Israel Ilgeshuri aashu Ilmaakati; kake etobiko apa Ilgeshuri o Lmaakati te mpolos e Israel o metabaiki ena olong.

¹⁴Olosho le Lawi ake eitu eisho Musa enjung'ore; kake ore anaa enatiaaka Enkai Musa, inkishoorot o lasar opejori te nkima eishoo Olaitoriani Enkai e Israel ninche meitaa ninche enjung'ore enye.

¹⁵Neishoo apa Musa enjung'ore olosho loo Le Ruben te risioroto oo lmareita lenye.

¹⁶Neaku ore apa enkop enye naa ebaiki Aroer, aa ninye apa olomanaa lo erata le Arnon, o ina anasa natii empolos oerata, o ina kop pooki naluaa te mbata e Medeba;

¹⁷te nebo Heshbon o nena anas pooki naatii atua ina kop naluaa; Dibon o Bamot-baal, o Bet-baa-meon,

¹⁸o Yahas o Kedemot o Mefaat,

¹⁹o Kiriataim o Sibma o Seret-shahar te nchumata o ldoinyo le ilo erata,

²⁰o Betpeor o kishong'ishong'at e Pisga o Betyeshimot,

²¹aa taa inkanas pooki e ina kop naluaa o enkitoria pooki e Sihon olaiguanani loo Lamori, apa laa ninye oitoreisho te Heshbon, laa ninye apa etimira Musa te nebo ilarikok le Midian, Efi o Rekem o Sur o Huri o Reba ilkituaak le Sihon, laa ninye apa omanya ina kop.

²²Ore sii Balaam, olayioni le Beor, ilo asakutoni, near iltung'ana le Israel ninye metua to lalem te nebo lelo apa lenye ootasesekuanaki.

²³Ore apa olpolosie loo ltung'ana le Ruben naa Yordan orish. Ena apa enjung'ore oo le Ruben, te risioroto oo lmareita lenye o nkanas o nkang'itie kutiti.

²⁴Neitoki sii Musa aisho enjung'ore olosho le Gad, te risioroto oo lmareita lenye.

²⁵Ore apa enkop enye naa Yaser o nkanas pooki e Gilead o lpisiai le nkop oo Lamori, o metabaiki Aroer, ina natii enkalo o loo saen le Raba,

²⁶o ebaiki Heshbon o metabaiki Ramat-mispe o Betonim, o ebaiki Mahanaim o metabaiki enkop e Debir,

²⁷o atua oerata le Bet-haram, o Bet-nimra o Sukot o Safon o ina ae kitoria pooki e Sihon olaiguanani le Heshbon, aitaa Yordan olpolosie o metabaiki enkalo e abori enaiposha e Kineret te enkalo o loo saen te lido kekun le Yordan.

²⁸Ena ninye enjung'ore oo le Gad te risioroto oo lmareita lenye, o nkanas enye o nkang'itie enye kutiti.

²⁹Neitoki Musa aisho enjung'ore olpisiai lo losho le Manase; etoorikiaki apa olpisiai lo losho le Manase te risioroto oo lmareita lenye.

³⁰Nelo apa enkop enye abaiki Mahanaim, neim Bashan pooki, o atua enkitoria pooki e Oog, olaiguanani le Bashan o nkang'itie pooki e Yair, nena naatii atua Bashan, inkanas intomoni ile,

³¹o lpisiai le Gilead o Ashtarot o Edrei, nena anas e nkitoria e Oog tiatua Bashan. Etoorikiaki apa kuna iltung'ana le Makir olayioni le Manase aaisho olpisiai loo le Makir te risioroto oo lmareita lenye.

³²Kuna apa injung'oreitin naaishooyie Musa too nkisiashat e Moab, te lido kekun le Yordan te enkalo o loo saen te Yeriko.

³³Kake ore tialo olosho le Lawi eitu eisho Musa enjung'ore; Olaitoriani Enkai e Israel ninye enjung'ore enye, anaa apa enatiaka ninye ninche.