Read Maasai Bible – Biblia Sinyati Yoshua 18 Bible Online

Yoshua 18 - Maasai Bible – Biblia Sinyati bible

Yoshua 18

¹Neitoki olturrur pooki loo ltung'ana le Israel auma te Shilo nepik olng'obor le ntumo ine; neirrag apa ina kop naibung'aki te dukuya ninche.

²Netelekutua apa tiatua iltung'ana le Israel iloshon oopishana leton eitu eorikini enjung'ore enye.

³Nejoki Yoshua iltung'ana le Israel, “Intashaluoluo kenya o anu mijing'ijing'i atua aapuo aaibung ena kop, apa naishoo intae Olaitoriani, Enkai oo loo papaai linyi?

⁴Enchoru iltung'ana okuni ake to losho, pee airriwaa nanu ninche meshomo aailep nedou teina kop, nasirakino ninche anaa injung'oreitin enye, neitoki ninche aapuonu enatii nanu.

⁵Nepuo ninche aaor ina kop aaitaa irubat naapishana, nebik Yuda te nkop enye te nkalo e moikuape, nebik enkaji e Yosef te nkop enye te nkalo e kopikop.

⁶Naa entisir intae ina kop too orot naapishana niyauu lelo sirat ene natii nanu; amu kaosh nanu enkukuo te nkaraki intae tene te dukuya Olaitoriani Enkai ang.

⁷Meeta lelo le Lawi erubata tiatua intae, amu empolosare o Laitoriani ninye enjung'ore enye; ore Gad o Ruben o lpisiai lo losho le Manase netang'amutua enjung'ore enye te lido kekun le Yordan te nkalo o loo saen, apa naishoo ninche Musa osinka lo Laitoriani.”

⁸Nedumunye apa lelo tung'ana aaiteru elototo enye; neitanap Yoshua lelo apa ooshomo aasir eoroto e nkop, ajoki, “Enchom elepa nidouu nisirisiri eoroto e nkop, nintokiki aashukunye aapuonu enatii; amu kaosh nanu enkukuo te nkaraki intae tene te dukuya Olaitoriani te Shilo.”

⁹Neaku eshomo apa lelo tung'ana neilep nedou tiatua ina kop nepik atua embuku eoroto enye anaa too nkang'itie tiatua iorot naapishana; neitoki ninche aapuonu enetii Yoshua too lng'oborri te Shilo,

¹⁰neosh Yoshua enkukuo te nkaraki ninche te Shilo te dukuya Olaitoriani; neoriki Yoshua enkop teine iltung'ana le Israel, olosho ake erubata enye.

¹¹Neooshi enkukuo te nkaraki erubata o losho le Benchamen te risioroto oo lmareita lenye, ore ina kop naishooki ninye nejing erishata o losho le Yuda o losho le Yosef.

¹²Ore te nkalo e moikuape neiteru olpolosie lenye te Yordan, neilep ilo polosie alo enkilepakinoto e Yeriko te nkalo e moikuape, neitoki ailep aim ina kop oo ldoinyo te nkalo o loo ntoluo; nelo aiting to lpurkel le Bet-hafen.

¹³Nedumunye olpolosie teine aim enkalo e kopikop aipir Lusi, o metabaiki enkilepakinoto e Lusi (aa ninye Betel), neitoki ilo polosie adoyio alo Atarot-adar, te nchumata e ilo doinyo otii enkalo e kopikop tiabori Bet-horon.

¹⁴Neitoki ilo polosie alo aim enkae shoto, aibelekenya te nkalo o loo ntoluo aing'or moikuape te ilo doinyo otii enkalo e moikuape, eipirakinore Bet-horon, nelo aiting te Kiriat-baal (Kiriat-Yearim taa ena), enkanasa nara eno losho le Yuda. Ena naitayu enkalo o loo ntoluo.

¹⁵Ore te nkalo e kopikop neiteru too mbat e Kiriat-yearim; nelo olpolosie teine o metabaiki Efron o meshomo inkonyek oo nkariak e Neftoa;

¹⁶neitoki ilo polosie adoyio o meshomo olpolosie lo ldoinyo otalita oerata lo layioni le Hinom, otii enkalo e moikuape eneiting'ie oerata le Refaim; neitoki adoiki oerata le Hinom, enkalo e kopikop enkilepakinoto oo Lyebusi, nedoyio alo En-rogel;

¹⁷neitoki alo Gelilot, ina naipirakinore enkilepakinoto e Adumim; neitoki adoyio o meshomo osoit le Bohan olayioni le Ruben;

¹⁸negiroo alo o meshomo osegel le Bet-araba nedoyio o meshomo Araba;

¹⁹neitoki ilo polosie agiroo alo o meshomo moikuape o segel le Bet-hogla; nelo ilo polosie aiting te moikuape to lomanaa le Enaiposha e Munyan, te kopikop e Yordan; ele ninye olpolosie le kopikop.

²⁰Neitayu Yordan olpolosie lenye te nkalo o loo saen. Ena ninye enjung'ore o losho le Benchamen, te risioroto oo lmareita lenyena, olpolosie ake o lpolosie emanaa.

²¹Ore apa inkanas o losho le Benchamen te risioroto oo lmareita lenye naa Yeriko o Bet-hogla o Emekesis,

²²Bet-araba o Semaraim o Betel,

²³Afiim o Para o Ofra,

²⁴Kefarmoni o Ofni o Geba - inkanas tomon o are te nebo inkang'itie enyena kutiti:

²⁵Gibeon o Rama o Beerot,

²⁶o Mispe o Kefira o Mosa,

²⁷Rekem o Irpeel o Tarala,

²⁸o Sela o Ha-elef o Yebus (aa taa Yerusalem), o Gibea o Kiriat-yearim - inkanas tomon o ong'uan te nebo inkang'itie enye kutiti. Ena ninye enjung'ore o losho le Benchamen te risioroto oo lmareita lenyena.