Read Maasai Bible – Biblia Sinyati Yoshua 2 Bible Online

Yoshua 2 - Maasai Bible – Biblia Sinyati bible

Yoshua 2

¹Neirriwaa Yoshua olayioni le Nuni te nkisudoroto iltung'ana oaare te Shitumu metaa ilaikitalak, nejoki ninche, Enchom, eng'ura enkop, neisulaki Yeriko. Nepuo ninche, nepuonu enkaji e mulayoi apa naji enkarna enye Rahab, neirrag ninche ine.

²Netolikioki apa olaiguanani le Yeriko aajoki, Ng'ura, etii kulikae tung'ana le Israel ooetuo ene duoo kewarie pee ejur enkop.

³Neirriwaa ilo aiguanani le Yeriko iltung'ana enkaji e Rahab, ejo, Intayu lelo tung'ana ooetuo enkaji ino, lelo ootijing'a enkaji ino; amu enkop pooki eetuo ninche aajur.

⁴Kake ewa apa ina kitok lelo tung'ana pokira oaare aisudoo; nejo ninye, “Kesipa eetuo iltung'ana enatii nanu, kake mayiolo nanu ajo kaji eing'uaa ninche;

⁵ore ake pee eaku keikeni kishomi, etomisimiso, neipang lelo tung'ana aapuo, ore eneshomo lelo tung'ana mayiolo nanu; entasioki entusujai ninche amu inepupu.

⁶Kake eyaua apa ninye ninche enchumata e nkaji, neisudoo ninche too ndupa apa naa ninche naaitobirare enchumata e nkaji.”

⁷Neaku etusujaitie iltung'ana ninche te nkoitoi nalo Yordan, o metabaiki ilang'at; nerisio ake eipang'a iltung'ana aapuo neikeni kishomi.

⁸Ore eton eitu eirura ninche, neilepu ninye alotu enetii ninche te nchumata e nkaji,

⁹nejoki ninche, “Kayiolo nanu inchere eishoo Olaitoriani intae ena kop, naa ore euriata nikiure intae etijing'a iyiook, naa ore iloomanya ena kop pooki nelepori te dukuya intae.

¹⁰Amu kitoning'oitie iyiook ina naitoyio Olaitoriani inkariak e Naiposha Nanyokie te dukuya intae ina kata pee impang'ung'u aapuku te Misiri, o ina nintaasa lelo aiguanak loo Lamori apa ootii lido kekun le Yordan, o Sihon o Oog, apa lindaikie ninche katukul.

¹¹Ore ake pee kining ina, nikilepori, nemeetae empijan natelekua te likae lee hoo obo, te nkaraki intae; amu Olaitoriani Enkai inyi ninye ilo ora Enkai te shumata o ti abori te nkop.

¹²Ore naa taata, enosakaki olmumai to Laitoriani inchere ore anaa enaitaasa nanu intae te supatisho, naa eikintaasiasa sii intae te supatisho o enkaji e papa nikinchosho nanu olmonekie osipa,

¹³nintajeuu pee meye papa o yieyio, o lalashera laainei o nkanashera, o lelo pooki oora ilkulenye, nikordudu enkishui ang aaitung'uaa keeya”.

¹⁴Nejoki lelo tung'ana ninye, Enkishui ang te rishata e nkishui inyi, te neaku eitu ilikio kuna baa ang, nikitum taa aaitaasa iyie te supatisho o te nkisiligata te neisho iyiook Olaitoriani ena kop.

¹⁵Neitadoyio ninye ninche te nkeene aimie elusie, amu ore apa enkaji enye naa esuntai e nkanasa apa eshetakino.

¹⁶Nejoki ninye ninche, “Enchom ildoinyo, meinepu ake intae lelo oosujita intae; nisudoriri teine inkolong'i uni o metaba anaa neshukunye lelo oosujita intae, nitumutumu taa aashom aaima enkoitoi inyi”.

¹⁷Nejoki lelo tung'ana ninye, “Mikiyieu iyiook nikiaata eleyiata tialo ele mumai linosie iyiook.

¹⁸Ti nikipuonu kenya aarasaki ena kop, teeniki enkarasha nanyokie ele dirisha liimie iyiook; nisot tiatua enkaji ino papaai lino o ng'utunyi, o lalashera linono o lelo pooki le nkaji e papaai lino.

¹⁹Te neipang oltung'ani boo aim kutuk aji e nkaji ino nelo enkoitoi, ore osarge lenye neaku shumata endukuya enye etii, nimikintoki iyiook aata eleyiata; kake te neiteleikini enkaina aar oltung'ani ake ninye otii te nebo iyie tiatua aji, neaku osarge lenye shumata lukuny ang etii.

²⁰Kake ti nilikio kuna baa ang, nimikintoki iyiook aata eleyiata tialo ele mumai linosie iyie iyiook.”

²¹Nejo ninye, “Ore anaa enitejo intae, inchoo etiu neijia.” Neisho ninche meshomo, nepuo ninche, neeniki ninye enkarasha nanyokie oldirisha.

²²Nepuo ninche aajing ildoinyo, netoni teine inkolong'i uni, o metaba anaa neshukunye lelo apa oosujita ninche; amu eing'orutua apa lelo oosujita ninche; to nkoitoi pooki neitu etum toki.

²³Neitoki lelo tung'ana pokira oaare aadou too ldoinyo, nelang olkeju, nepuo enetii Yoshua olayioni le Nuni; neliki ninye nena pooki naatupukokitio ninche.

²⁴Nejoki ninche Yoshua, “Kesipa eishorua Olaitoriani enkop pooki apik inkaik ang; netalepori sii lelo pooki oomanya ina kop te nkaraki iyiook.”