Read Maasai Bible – Biblia Sinyati Yoshua 21 Bible Online

Yoshua 21 - Maasai Bible – Biblia Sinyati bible

Yoshua 21

¹Neitoki aapuonu ilukuny oo nkajijik oo le Lawi enetii Eliesa ilo apolosani o enetii Yoshua olayioni le Nuni o enetii ilukuny oo nkajijik oo loshon loo ltung'ana le Israel.

²Nejoki ninche te Shilo tiatua enkop e Kanaan, “Eitanapishe apa Olaitoriani aimunye Musa nchere pee eishori iyiook inkanas nikimany te nebo ineeirritishoreki te nkaraki inkishu ang.”

³Neaku ore te nkaraki enkitanapata o Laitoriani, neisho iltung'ana le Israel lelo le Lawi kuna anas o neeirritishoreki metaa enjung'ore enye.

⁴Netum enkukuo e dukuya ilmareita loo Lkohat. Neaku ore lelo le Lawi apa oora ile ishoi e Aron olapolosani neng'amu te oshoto e nkukuo too loshon le Yuda o Simeon o Benchamen, inkanas tomon o okuni.

⁵Ore lelo kulikae loo Lkohat neng'amu te oshoto e nkukuo too lmareita lo losho le Efraim o to losho le Dan o to lpisiai lo losho le Manase inkanas tomon.

⁶Neng'amu ile Gershon te oshoto e nkukuo too lmareita to losho le Isaakar o to losho le Asheri, o to losho le Naftali o to lpisiai lo losho le Manase inkanas tomon o okuni.

⁷Ore ile Merari te risioroto oo lmareita lenye neng'amu to losho le Ruben o to losho le Gad o to losho le Sebulon, inkanas tomon o are.

⁸Kuna anas apa o neeirritishoreki eishoo iltung'ana le Israel te oshoto enkukuo ile Lawi, anaa apa enaitanapishe Olaitoriani aimunye Musa.

⁹Ore tialo olosho le Yuda o losho le Simeon neishooyo ninche kuna anas naaipoto too nkarn,

¹⁰apa naataa ine lelo le ishoi e Aron, obo loo lmareita loo le Kohat apa loo le Lawi; amu ninche etadoikio enkukuo asioki.

¹¹Neisho ninche Kiriat-arba (aa Arba taa menye le Anak) aa Hebron taa ina, tiatua ina kop oo ldoinyo e Yuda, te nebo nene wuejitin neeirritishoreki neemanita.

¹²Kake ore nkurman e nkanasa o nkang'itie enyena kutiti neishori Kaleb olayioni le Yefune metaa nenyena.

¹³Ore te lelo le ishoi e Aron ilo apolosani neishori Hebron, ina anasa nasaru olotasesekuanishe, te nebo iwuejitin enyena neeirritishoreki,

¹⁴Yatir te nebo iwuejitin enyena neeirritishoreki, Eshtemoa te nebo iwuejitin enyena neeirritishoreki,

¹⁵Holon te nebo iwuejitin enyena neeirritishoreki, Debir te nebo iwuejitin enyena neeirritishoreki,

¹⁶Ain te nebo iwuejitin enyena neeirritishoreki, Yuta te nebo iwuejitin enyena neeirritishoreki, Bet-shemesh te nebo iwuejitin enyena neeirritishoreki - inkanas naaudo naaing'uaa kulo oshon pokira oaare;

¹⁷nepuku sii to losho le Benchamen Gibeon te nebo iwuejitin enyena neeirritishoreki, Geba te nebo iwuejitin enyena neeirritishoreki,

¹⁸Anatot te nebo iwuejitin enyena neeirritishoreki o Almon te nebo iwuejitin enyena neeirritishoreki - inkanas naaudo.

¹⁹Ore apa inkanas e lelo le ishoi e Aron naa inkanas tomon o okuni te nebo iwuejitin enye neeirritishoreki.

²⁰Ore lelo kulikae loo Lkohat oora iloo lmareita loo Lkohat loo Lawi, ore apa inkanas naatoorikiaki ninche naa olosho le Efraim eing'uaa.

²¹Ninche apa eishooki Shekem, ina anasa nasaru olotasesekuanishe, te nebo iwuejitin enyena neeirritishoreki teina kop oo ldoinyo e Efraim, Geser te nebo iwuejitin enyena neeirritishoreki,

²²Kibsa-im te nebo iwuejitin enyena neeirritishoreki, Bet-horon te nebo iwuejitin enyena neeirritishoreki - inkanas ong'uan.

²³Ore inaaing'uaa olosho le Dan naa El-teke te nebo iwuejitin enyena neeirritishoreki, Gibeton te nebo iwuejitin enyena neeirritishoreki,

²⁴Aijalon te nebo iwuejitin enyena neeirritishoreki - inkanas ong'uan;

²⁵ore inaaing'uaa olpisiai lo losho le Manase, naa Taanak te nebo iwuejitin enyena neeirritishoreki o Gat-rimon te nebo iwuejitin enyena neeirritishoreki - inkanas are.

²⁶Ore apa inkanas e lelo kulikae tung'ana loo Lkohat naa tomon pooki te nebo iwuejitin enye neeirritishoreki.

²⁷Ore te lelo le Gershon, lo olmarei obo loo lmareita le Lawi, neishori olpisiai le nkop e Manase, Golan te Bashan te nebo iwuejitin enyena neeirritishoreki - inkanas are;

²⁸ore to losho le Isaakar neishori Kishion te nebo iwuejitin enyena neeirritishoreki, Daberat te nebo iwuejitin enyena neeirritishoreki,

²⁹Yarmut te nebo iwuejitin enyena neeirritishoreki, En-ganim te nebo iwuejitin enyena neeirritishoreki - inkanas ong'uan;

³⁰naa ore to losho le Asheri, neishori Mishal te nebo iwuejitin enyena neeirritishoreki, Abdon te nebo iwuejitin enyena neeirritishoreki,

³¹Helkat te nebo iwuejitin enyena neeirritishoreki o Rehob te nebo iwuejitin enyena neeirritishoreki - inkanas ong'uan;

³²naa ore to losho le Naftali, neishori Kedesh te Galilaya te nebo iwuejitin enyena neeirritishoreki, ina anasa e sarunoto te ilo otasesekuanishe, Hamot-dori te nebo iwuejitin enyena neeirritishoreki o Kartan te nebo iwuejitin enyena neeirritishoreki inkanas uni.

³³Ore apa inkanas oo lmareita loo le Gershon naa tomon o okuni pooki te nebo iwuejitin enye neeirritishoreki.

³⁴Ore lelo kulikae loo Lawi, lelo mareita loo Lmerari neishori ninche to losho le Sebulon, Yokne-am te nebo iwuejitin enyena neeirritishoreki, Karta te nebo iwuejitin enyena neeirritishoreki,

³⁵Dimna te nebo iwuejitin enyena neeirritishoreki, Nahalal te nebo iwuejitin enyena neeirritishoreki - inkanas ong'uan.

³⁶Ore to losho le Ruben neishori Beser te nebo iwuejitin enyena neeirritishoreki, Yahas te nebo iwuejitin enyena neeirritishoreki,

³⁷Kedemot te nebo iwuejitin enyena neeirritishoreki, o Mefaat te nebo iwuejitin enyena neeirritishoreki - inkanas ong'uan.

³⁸Ore to losho le Gad, neishori Ramot te Gilead te nebo iwuejitin enyena neeirritishoreki, ina anasa e sarunoto te ilo otasesekuanishe, Mahanaim te nebo iwuejitin enyena neeirritishoreki,

³⁹Heshbon te nebo iwuejitin enyena neeirritishoreki, Yasar te nebo iwuejitin enyena neeirritishoreki - inkanas ong'uan te umata.

⁴⁰Ore tialo inkanas oo lmareita loo Lmerari, aa taa lelo ootelekutua too lmareita le Lawi, nena apa naatoorikiaki ninche, naa inkanas tomon o are pooki.

⁴¹Ore apa inkanas oo le Lawi tiatua ina kop oo ltung'ana le Israel naa inkanas artam o isiet pooki te nebo iwuejitin enye neeirritishoreki.

⁴²Ore kuna anas neeta ake pooki anasa ewueji enye neirritishoreki namanita ninye; neijia apa etiu te kuna anas pooki.

⁴³Neaku eishoo Olaitoriani Israel ina kop pooki apa nainosie ninye olmumai nchere keisho loo menye; ore ake pee eibung ina kop, nemany ninche ine.

⁴⁴Neisho ninche Olaitoriani enkiyeng'iyeng te pooki shoto anaa apa enainosa ninye olmumai too loo menye; meetae hoo ninye obo loo lmang'ati lenye oidima aitasheikinore ninche, amu eishooyie apa Olaitoriani ilmang'ati lenye pooki apik atua inkaik enye.

⁴⁵Meetae hoo enkisiligata nabo e nena kisiligat apa sidain naaisiligie Olaitoriani enkaji e Israel neitu ebaya; etabaitie pooki.