Read Maasai Bible – Biblia Sinyati Yoshua 22 Bible Online

Yoshua 22 - Maasai Bible – Biblia Sinyati bible

Yoshua 22

¹Neitoki Yoshua aipotu ile Ruben o le Gad o lpisiai lo losho le Manase,

²nejoki ninche, “Embung'a intae nena pooki apa naaitanapa intae Musa osinka lo Laitoriani, nitoning'o intae oltoilo lai te nena pooki naitanapa nanu intae.

³Eitu intae ipuopuo aaing'uaa ilalashera linyi te kuna olong'i pooki o metabaiki ena olong, kake itorripote intae pee imbung'ubung'u enkitanapata o Laitoriani Enkai inyi.

⁴Ore taata neishoo intae Olaitoriani Enkai inyi enkiyeng'iyeng too lalashera linyi, anaa apa enaitanapa ninche; ore naa embelekenyata enchom inkang'itie inyi tiatua ina kop inyi, apa naa ninye eishoo intae Musa osinka lo Laitoriani te lido kekun le Yordan.

⁵Entonyok embung'a ina kitanapata naishoo intae Musa osinka lo Laitoriani, pee inyorrurru Olaitoriani Enkai inyi, nipuopuo too nkoitoi enyena, nimbung'arere ninye nisiaayiayia ninye to ltau linyi pooki o te nkishui inyi pooki.”

⁶Neaku etamayiana apa Yoshua ninche neisho ninche meshomo, nepuo ninche inkang'itie enye.

⁷Ore apa olpisiai obo lo losho le Manase neishoo Musa enkop te Bashan; kake ore olikae pisiai eishoo ninche Yoshua enkop te mbata oo lalashera lenye te nkop natii o loo ntoluo le Yordan. Ore ake pee eisho Yoshua ninche meshomo inkang'itie enye nemayian ninche, nejoki,

⁸“Entushukoto enchom inkang'itie inyi te karsisisho sapuk o te nebo inkishu kumok oleng o enkosholai o saabu o suyai o esekenkei o te nebo inkilani kumok; entooriki nena nitaarutua ilalashera linyi.”

⁹Neaku etushukote apa lelo le Ruben o le Gad o ilo pisiai lo losho le Manase aapuo inkang'itie, aaorore iltung'ana le Israel te Shilo, aa ninye apa natii enkop e Kanaan, aapuo enkop e Gilead, enkop enye maate apa naibung'a maate te nkitanapata o Laitoriani naimua Musa.

¹⁰Ore ake pee epuonu ninche enkop natii embata e Yordan ti atua enkop e Kanaan neshet ile Ruben o le Gad o lpisiai le Manase olperere lo lasar teine te mbata e Yordan, olperere lo lasar kitok oleng.

¹¹Nening iltung'ana le Israel eji, “Etesheta ile Ruben ole Gad o ilo pisiai lo losho le Manase olperere lo lasar te dukuya enkop e Kanaan, tiatua ina kop nataaniki Yordan, teina shoto apa nara enoo ltung'ana le Israel.”

¹²Ore ake pee ening iltung'ana le Israel ina, neiturrurro olturrur pooki loo ltung'ana le Israel te Shilo, pee earare ninche.

¹³Neirriwaki iltung'ana le Israel olkilikuai iltung'ana le Ruben o le Gad o ilo pisiai lo losho le Manase te nkop e Gilead, Finehas olayioni le Eliasa olapolosani,

¹⁴netii te nebo ninye ilaiguanak tomon, obo ake loo loshon loo lmareita le Israel.

¹⁵Nepuonu ninche enetii ile Ruben o le Gad o ilo pisiai le Manase te nkop e Gilead, nejoki ninche,

¹⁶“Inji ejo olturrur lo Laitoriani, ‘Kaa taboi ena nitaasa intae tialo Enkai e Israel aaibelekenya ena olong aaing'uaa esujata o Laitoriani, teina niteshetakita ate ena olong olperere lo lasar te ngolong'akinoto o Laitoriani?

¹⁷Keitu iyiook kiaas eng'oki sapuk te Peor neton eitu o tene kintisiny ate, naa te nkaraki ninye pee eewuo olmeitai shumata olturrur lo Laitoriani,

¹⁸eji pee imbelekenyanya ena olong aaing'uaa Olaitoriani? Naa ti nigolong'akiki ena olong Olaitoriani naa kegorokino ninye olturrur pooki le Israel taisere.

¹⁹Kake ore taata, te nemesinya enkop inyi, entogiru wootu atua enkop o Laitoriani ine netii olng'obor lo Laitoriani, nimbung'akiki ate enkop tiatua iyiook; emigolong'akiki ake duoo intae Olaitoriani, aashu intaa iyiook iloogolong'u te nchetakinoto nishetakiki ate olperere lo lasar leme ilo perere lo lasar lo Laitoriani Enkai ang.

²⁰Keitu apa eiturraa Akan olayioni le Sera enkirukoto tialo nena baa naaiteng'elaki, nedoiki engoro olturrur pooki le Israel? Neme ninye ake oidaayie te nkitarruoroto enye.’ ”

²¹Neitoki lelo le Ruben, o le Gad o lpisiai le Manase aajo te walakinoto e nena lukuny oo lmareita le Israel,

²²Olmagilani, Enkai, Olaitoriani! Olmagilani, Enkai, Olaitoriani! Eyiolo ninye; naa nchoo sii Israel eyiolou makewan! Tenaa ei te ngolong'akinoto, anaa te anyata e nkirukoto tialo Olaitoriani, mileku iyiook taata

²³te nkaraki enchetata o lperere lo lasar pee kitum aaibelekenyata aatung'uai esujata o Laitoriani; aashu tenaa eikitaasa iyiook ina pee kitum aaishoru ilasarri oopejori aashu ilasarri le nkurma aashu ilasarri le seriani te nchumata enye, metaa Olaitoriani makewan oitalak iyiook.

²⁴A'a, kake kitaasa iyiook te nkuretisho nchere ore te nkata nalotu neidim inkera inyi aatiaki inkera ang, Kaa intae iporokiki Olaitoriani, Enkai e Israel?

²⁵Amu eitaa Olaitoriani Yordan olpolosie lang o intae, ore intae ile Ruben o le Gad; miatata intae erubata tiatua Olaitoriani. Neaku keidim inkera inyi aaitapong'oi inkera ang eseremata o Laitoriani.

²⁶Neaku kitejo apa, Mateshetu iyiook olperere lo lasar, neme olopejorieki inkishorunot, neme ino lasar.

²⁷Kake pee eaku shakeni te iyiook o te intae o ishoritin te siadi iyiook, nchere eikintayu iyiook olasar lo Laitoriani te dukuya ninye too nkishoorot ang naapejori o lasarri o nkishoorot e seriani; pee meyooki ake inkera inyi aajoki inkera ang te nkata nalotu, Miatata intae erubata tiatua Olaitoriani.

²⁸Nikijo apa iyiook, te nelo nejokini iyiook ena aashu eishoi ang te nkata nalotu, nikindim iyiook aatejo, Eng'ura, enkitanyaanyukoto o lperere lo lasar lo Laitoriani, apa naitobira iloo papa, neme too nkishoroot naapejori, neme too lasarri, kake pee eaku shakenisho te iyiook o te intae.

²⁹Kilome! Mikigolong'aki iyiook Olaitoriani aaibelekenya ena olong aaing'uaa esujata o Laitoriani te nchetata o lperere lo lasar te nkaraki inkishoorot naapejori o nkishoorot e nkurma aashu olasar. Mikishet iyiook likae perere lo lasar meteleku ake ilo perere lo lasar lo Laitoriani Enkai ang oitashe te dukuya olng'obor lenye!

³⁰Ore ake pee ening Finehas ilo apolosani o lelo kituaak lo lturrur o nena lukuny oo lmareita le Israel apa naatii te nebo ninye, lelo rorei ootejo ile Ruben o le Gad o le Manase, neitiship ninche oleng.

³¹Nejoki Finehas ilo apolosani ayioni le Eliesa ile Ruben o le Gad o le Manase, Akiyiolo iyiook, ena olong aajo ketii Olaitoriani atua iyiook, amu eitu intae iasiasa ena kitarruoroto to Laitoriani; ore taata intajeutuo intae iltung'ana le Israel te nkaina o Laitoriani.

³²Neitoki Finehas olayioni le Eliesa ilo apolosani o lkituaak aashuko too le Ruben o le Gad te nkop e Gilead aapuo enkop e Kanaan, enetii iltung'ana le Israel neyaki ilomon.

³³Neitiship lelo omon lelo tung'ana le Israel, neisis iltung'ana le Israel Enkai, neitu eigil aaimaki olarrabal tialo ninche, pee eidaikie ina kop apa natamanya ile Ruben o le Gad.

³⁴Nejo apa ile Ruben o le Gad, “enkarna e ilo perere lo lasar Shakeni; amu etejo ninche, shakeni ninye te iyiook nchere Olaitoriani ninye Enkai.”