Read Maasai Bible – Biblia Sinyati Yoshua 4 Bible Online

Yoshua 4 - Maasai Bible – Biblia Sinyati bible

Yoshua 4

¹Ore ake pee eidip olosho pooki atalang'a olkeju le Yordan, nejoki Olaitoriani Yoshua,

²“Intayu iltung'ana tomon oaare tiatua iltung'ana, tiatua ake olosho oltung'ani obo,

³nintanap ninche ajoki, ‘Entayu isoito tomon oaare tene te mpolos olkeju le Yordan, teine wueji neitasheyie inkejek oo lapolosak, ninapinapa aaya te nebo intae, nirragiegie ninche te wueji ade nirragirraga kewarie.’ ”

⁴Neitoki Yoshua aipotu iltung'ana tomon oaare tiatua iltung'ana le Israel, laa ninche etegelua, oltung'ani ake to losho;

⁵nejoki Yoshua ninche, Entogiroi osanduku lo Laitoriani Enkai inyi enchom empolos e Yordan, nidumu ake oltung'ani osoit anap to loililai lino, te risioroto e siana oo loshon le Israel,

⁶pee etum ena ataa olmonekie tiatua intae, ore kenya te neikilikuan intae inkera inyi te nkata nalotu aajoki, Kainyoo tipat e kulo soito te intae?

⁷Nitumutumu taa aatiaki ninche inchere etudung'ote apa inkariak e Yordan te dukuya o sanduku lo sotua lo Laitoriani; ore apa pee elang'u Yordan, nedung'o inkariak e Yordan. Neaku keaku kulo soito too ltung'ana le Israel enkitadamunoto intarasi.

⁸Neas iltung'ana le Israel anaa enaitanapa Yoshua, nedumu isoito tomon o are te mpolos e Yordan, te risioroto e siana oo loshon loo ltung'ana le Israel, anaa enatiaaka Olaitoriani Yoshua; nenap ninche aaya ine wueji apa neshomo aairrag, neirragie ninche teine.

⁹Neirragie Yoshua isoito tomon oaare aitobiraki te mpolos e Yordan, teine wueji apa neitasheyie inkejek e lelo apolosak oonapita osanduku lo sotua; netii ninche ine ebaiki ena olong.

¹⁰Amu ore apa lelo apolosak oonapita osanduku neitasheito te mpolos e Yordan, o metaba anaa neidipayu pooki toki apa naitanapa Olaitoriani Yoshua metiaaki iltung'ana, te risioroto e nena apa pooki naaitanapa Musa Yoshua. Nelang iltung'ana ilo keju te nkisarrisar;

¹¹ore ake pee eidip iltung'ana pooki aatalang, nelang ilo sanduku lo Laitoriani o lapolosak te dukuya lelo tung'ana.

¹²Ore ilayiok le Ruben o layiok le Gad o lpisiai lo losho le Manase nelang etanapate te dukuya iltung'ana le Israel, anaa apa enatiaka Musa ninche.

¹³Iltung'ana oobaya inkalifuni artam ooterretenate te nkaraki olarrabal ootalang'a te dukuya Olaitoriani aapuo olarrabal, aapuo inkisiashat e Yeriko.

¹⁴Ore apa ina olong neilepie Olaitoriani Yoshua too nkonyek e Israel pooki; neyanyitu ninche ninye anaa apa enayanyit Musa, inkolong'i e nkishui enye pooki.

¹⁵Nejoki Olaitoriani Yoshua,

¹⁶Intanapa lelo apolosak oonapita osanduku ilo sanduku le shakenisho meilepu aapuku te Yordan.

¹⁷Neitanap taa Yoshua lelo apolosak ajoki, “Elepu entupuku te Yordan.”

¹⁸Ore ake pee eilepu lelo apolosak apa oonapita osanduku lo Laitoriani tiatua empolos e Yordan, neroro inkejek e lelo apolosak enkop natoyio, nerrinyokino inkariak e Yordan erishata enye nenang'ari aaim ingilat o lkeju, anaa apake.

¹⁹Neilepu iltung'ana aapuku tiatua Yordan te nkolong e tomon o lapa le dukuya, neitayu ilng'oborri te Gilgal to lpolosie le nkalo e nkilepunoto e nkolong e Yeriko.

²⁰Ore lelo soito tomon o are apa ooitayutuo ninche tiatua Yordan, neirragie Yoshua apik Gilgal.

²¹Nejoki ninye iltung'ana le Israel, Te neikilikuan kenya inkera inyi iloo papaai lenye te nkata nalotu aajoki, Kainyoo tipat e kulo soito?

²²Nitumokiki taa aaitayiolo inkera inyi inchere, Etalang'a apa Israel ele keju le Yordan aaim enkop natoyio.

²³Amu eitoyio Olaitoriani Enkai inyi inkariak e Yordan te nkaraki intae o metaba anaa nilang'ilang'a, anaa apa enaikuna Olaitoriani Enkai inyi Enaiposha Nanyokie, apa naitoyio te nkaraki iyiook o metaba anaa nikilang,

²⁴pee etum iloreren pooki le nkop aatayiolo inchere ore enkaina o Laitoriani naa aimagilani; pee itumutumu aatureita Olaitoriani ntarasi.