Read Maasai Bible – Biblia Sinyati Yoshua 7 Bible Online

Yoshua 7 - Maasai Bible – Biblia Sinyati bible

Yoshua 7

¹Kake etigila apa iltung'ana le Israel enkirukoto tialo nena tokitin apa naaiteng'elaki; amu ore Akan olayioni le Karmi, olayioni le Sabdi, olayioni le Sera lo losho le Yuda newa embata e nena tokitin apa naaiteng'elaki; neyupuyup engoro o Laitoriani te nkaraki iltung'ana le Israel.

²Neirriwaa Yoshua iltung'ana te Yeriko meshomo enkang e Ai, apa nataaniki Bet-afen, enkalo e nkilepunoto e nkolong e Betel, nejoki ninche, Elepa enchom enkitalana enkop. Neilep iltung'ana aapuo aaikitalan Ai.

³Neshukunye ninche enetii Yoshua, nejoki ninye, Mincho iltung'ana pooki eilep aapuo, kake nchoo iltung'ana oobaya inkalifuni are aashu inkalifuni uni eilep aapuo, aaibung Ai; “mincho iltung'ana pooki epuo aanauru teine amu aikuti ninche.”

⁴Neaku iltung'ana oobaya inkalifuni uni ake ooilepa aapuo tiatua iltung'ana le Israel; nepuo aaisik te dukuya iltung'ana le Ai,

⁵nesesekuan iltung'ana le Ai iltung'ana oobaya tomoni uni o ile lenye, nemiraa ninche te kishomi o meitabaiki Shebarim, nesesekuan ninche to loshong'ishong'i nelepori iltauja loo ltung'ana netiu anaa enkare.

⁶Nepolos Yoshua inkilani enyena nebatatakino enkop te nkomom enye te dukuya ilo sanduku lo Laitoriani ometaba anaa neaku teipa, ninye te nebo ilpayiani le Israel; nepik enterit ilukuny enye.

⁷Nejo Yoshua, “Ee, Olaitoriani Enkai, kainyoo apa pee intasima aitalang'u kulo tung'ana Yordan, pee ilotu aishooyo iyiook apik atua inkaik oo Lamori, pee eidaikie iyiook? Enaikash apa ti nikitobiko te lido kekun le Yordan!

⁸Olaitoriani, kaa nanu eton ajo eibelekenyate Israel aaisho inkoriong'i ilmang'ati lenye!

⁹Amu ore Ilkanaani o lelo pooki oomanya ena kop naa keyooki aaning ena, nemuat iyiook aaman nedung'oo enkarna ang aaiwuang'ie te nkop; naa kaa iyie ias te nkaraki enkarna ino kitok?”

¹⁰Nejoki Olaitoriani Yoshua, “Tudumunye, kainyoo iyie pee itabatate aiko nji te nkomom ino?

¹¹Etaasa Israel eng'oki; etigila ninche olning'o lai apa laitanapa nanu ninche, ewaita ninche embata oo ntokitin apa naaiteng'elaki, etupurrishote ninche nelejisho, nepik ninche atua imasaa enye.

¹²Neaku meidim iltung'ana le Israel aaitasheiki ilmang'ati lenye, eibelekenyate ninche aaisho inkoriong'i ilmang'ati lenye, te nkaraki nataa ninche entoki e nkidaata. Maitoki aikata nanu aaku te nebo iyie, aashu ake ti nindaikie nena tokitin apa naaiteng'elaki aitung'uaa atua intae.

¹³Tudumunye, intisinya iltung'ana, nijoki, Entisinya ate te nkaraki taaisere, amu nji ejo Olaitoriani, Enkai e Israel, Intokitin apa naaiteng'elaki kuna naatii atua intae, Israel; mindim iyie aitasho te dukuya ilmang'ati, linono o metaba anaa nintayu nena tokitin apa naaiteng'elaki aiwuang'ie tiatua iyie.”

¹⁴Ore naa tadekenya keyauni intae aaitinyiku anaa too loshon linyi; ore ilo osho oya Olaitoriani nelotu anyiku anaa too lmareita; ore ilo marei oya Olaitoriani neyauni aaitinyiku anaa too nkajijik; ore ina aji naya Olaitoriani nelotu anyiku oltung'ani obo nesuju likae.

¹⁵“Naa ore ilo otumi eeta nena tokitin apa naaiteng'elaki nepejori te nkima, ninye o ntokitin pooki naata ninye, te nkaraki natigila ninye olning'o lo Laitoriani, o te nkaraki nataasa ninye embae e sulare tiatua Israel.”

¹⁶Neaku etudumunye apa Yoshua tadekenya enasirie, neyau Israel aitinyiku olosho o losho, neyae olosho le Yuda;

¹⁷neyau ninye aitinyiku ilmareita le Yuda, neyae olmarei loo Lsera; neyau ninye aitinyiku to lmarei loo Lsera oltung'ani o ltung'ani; neyae Sabdi;

¹⁸neyau ninye aitinyiku enkaji enye oltung'ani ake oltung'ani, neyae Akan, olayioni le Karmi, olayioni le Sabdi, olayioni le Sera lo losho le Yuda.

¹⁹Neitoki Yoshua ajoki Akan, Enkerai ai, inchoo enkitoo Olaitoriani Enkai e Israel, nincho ninye enkisisa; naa tolikioki taata nanu enitaasa iyie; mikisudoriyie nanu.

²⁰Newaliki Akan Yoshua ajoki, Kesipa ataasa nanu eng'oki to Laitoriani Enkai e Israel, naa ena nanu ataasa:

²¹Ore ake pee adol tiatua nena naatarayioki olkila sidai oing'uaa Shinari o shekeli iip are e nkosholai o lbelati le saabu oata shekeli onom te nkiroishi, nang'uar nanu ninche, naya ninche; naa ng'ura, enukaro ninche tiatua enkop tiatua olng'obor lai, etii enkosholai ti abori.

²²Neirriwaa Yoshua iltung'ana, neipirri ninche aapuo olng'obor; naa keturoro apa tiatua olng'obor lenye etii enkosholai abori.

²³Neitayu ninche tiatua olng'obor neyau ninche enetii Yoshua o ltung'ana pooki le Israel; neirragie ninche te dukuya Olaitoriani.

²⁴Ore Yoshua o Siraeli pooki ootii te nebo ninye neya Akan olayioni le Sera o enkosholai o lkila o ilo belati le saabu o layiok lenyena o ntoyie enyena o lmong'i lenyena o sirkon lenyena o nkerra o lng'obor lenye o pooki toki apa naata ninye; neyauni ninche oerata le Akori.

²⁵Nejoki Yoshua, Kainyoo iyie pee iyaka iyiook enyamali? Eikiyaki iyie Olaitoriani enyamali taata. Nenang Israel pooki Akan too soito, neitoki aanang olmarei lenye nepejoo pooki te nkima.

²⁶Nesot ninche te shumata ninye enkurare kitok too soito leton etii o metabaiki ena olong neborru taa Olaitoriani teina goro enye nayupuyup. Neaku ore ebaiki ena olong ore enkarna e ine wueji naa keji oerata le Akori.