Read Maasai Bible – Biblia Sinyati Yoshua 9 Bible Online

Yoshua 9 - Maasai Bible – Biblia Sinyati bible

Yoshua 9

¹Ore ake pee ening ilaiguanak pooki apa ootii lido kekun le Yordan ina kop oo ldoinyo o ina kop nagum ilo omanaa pooki le naiposha kitok te nkalo e Lebanon o Lhiti o Lamori o Lkanaani o Lperisi,

²neiturrurro ninche te nebo pee earare Yoshua o Israel.

³Kake ore ake pee ening lelo apa oomanya Gibeon ina apa naitaasa Yoshua Yeriko o Ai,

⁴ore ninche te nkalo enye neas enkeleekisho neitobir ninche indaiki, neyau ilkuniyiani ootopolosate nepik inkoriong'i oo sirkon lenye o lbenia le naisho, oopolosa nepololo neitokini aarip,

⁵o namuka naatumutate too nkejek enye, o nkilani naapolosa; ore endaa enye pooki netoyio nebaa.

⁶Nepuo ninche enetii Yoshua too lng'oborri te Gilgal, nejoki ninye o ltung'ana le Israel, “Kietuo iyiook king'ua enkop nalakua; neaku intobira taata iyie olning'o o yiook.”

⁷Kake etiakita iltung'ana le Israel lelo Hafi, “Ebaiki naa atua iyiook intae itii; kaji naa kinko iyiook ti nikintobir olning'o o ntae?”

⁸Nejoki ninche Yoshua, “Eikira iyiook isinkan linono.” Nejoki Yoshua ninche, Eirara intae akua? Naa kaji intae ing'uaa?

⁹Nejoki ninche ninye, “Enkop nalakua eing'uaa isinkan linono te nkaraki enkarna o Laitoriani Enkai ino; amu kitoning'o iyiook ilomon lenyena, o nena pooki naataasa ninye te Misiri,

¹⁰o nena pooki naaitaasa ninye ilaiguanak loo Lamori apa otii lido kekun le Yordan, Sihon ilo aiguanani le Heshbon o Oog olaiguanani le Bashan ilo apa omanya Ashtarot.

¹¹Ore ilpayiani lang o lelo pooki oomanya enkop ang netiakita iyiook, ‘Ewaita endaa too nkaik inyi te lototo, nipuopuo aanang'are ninche, nijokiki ninche, Aikira iyiook isinkan linyi; wootu naa taata, entobira olning'o te nebo o yiook.’

¹²Nena emukate ang; eton apa eirowua ina kata pee kintayu too nkajijik ang aaitaa endaa te nkoitoi ina olong apa nikitudumunye aapuonu enitii intae; kake ore taata, etoyio netabee,

¹³ore kulo benia le naisho naa aing'ejuko apa pee kimput iyiook ninche kake ore taata netadanyate; ore kulo kilani o namuka ang netumutate tena lototo naado.”

¹⁴Neaku etang'amutua apa nena daiki enye, neitu eikilikuanu eutaroto to Laitoriani.

¹⁵Neitayu Yoshua eseriani te nebo ninche, neitayu olning'o te nebo ninche, pee eisho ninche epok; ore lelo kituaak apa lo lturrur neinosaki ninche olmumai.

¹⁶Ore te siadi inkolong'i uni eidipa ninche aaitobira olning'o te nebo ninche, nening ninche inchere ile latia enye ninche, naa atua ninche oshi ake etii.

¹⁷Nedumunye iltung'ana le Israel aapuo nebaya inkanas enye te nkolong e uni. Ore apa inkanas enye naa Gibeon, Chefira, Be-erot o Kiriat-yearim.

¹⁸Kake eitu ear iltung'ana le Israel ninche metuata, amu ore apa ilkituaak lo lturrur neinosa olmumai to Laitoriani, Enkai e Israel. Neing'unyung'uny olturrur pooki te nkaraki lelo arikok.

¹⁹Kake etiaakita lelo arikok pooki olturrur, “Kinosakita iyiook ninche olmumai to Laitoriani, Enkai e Israel, ore taata mikindim iyiook aaiseyie ninche.

²⁰Ena iyiook maitaasa ninche, nikincho ninche epok, mejing ake engoro shumata iyiook, te nkaraki ilo mumai apa likinosakita ninche.

²¹Nejoki lelo kituaak ninche, Enchoo ninche epok. Neaku ninche ilaiperrak loo lkeek neoku enkare te nkaraki olturrur pooki, anaa enatiaakitaa lelo kituaak ninche.”

²²Neipotu Yoshua ninche, nejoki ninye ninche, “Kainyoo intae pee iteleja iyiook, aajo, ‘Eikilakuaniki iyiook intae oleng;’ aa atua iyiook ake itii?

²³Ore naa taata iakuku intae iloodiaa, ore ilkulikae te ntae naa keaku irrindiki anaake, ilaiperrak loo lkeek o laokunok le nkare te nkaraki enkaji e Nkai ai.”

²⁴Newaliki ninche Yoshua aajo, “Ore te nkaraki natolikioki apa isinkan linono aaitisipaki inchere eitanapa Olaitoriani Enkai ino osinka lenye Musa pee eisho intae ena kop pooki, pee indaikiekie lelo pooki oomanya ena kop aaiwuang'ie te dukuya intae; neaku kitureishote iyiook oleng te nkaraki enkishui ang te dukuya intae; nikiaas ena bae.

²⁵Naa ore taata, kitii iyiook atua enkaina ino: taasa anaa enidol ajo aisidai neishaakino too nkonyek inono ti nintaas iyiook.”

²⁶Neaku eitajewuo Yoshua ninche aitayu tiatua enkaina oo ltung'ana le Israel; neitu ninche ear ninche metuata.

²⁷Kake eitaa apa Yoshua ninche ina olong ilaiperrak o laokunok le nkare te nkaraki ilo turrur o te nkaraki olperere lo lasar lo Laitoriani, pee emooki ninche aas ina o metabaiki ena olong, teine wueji netegelua ninye.