Read Maasai Bible – Biblia Sinyati 1 Timoteo 3 Bible Online

1 Timoteo 3 - Maasai Bible – Biblia Sinyati bible

1 Timoteo 3

¹Enkiroroto nasipa ena inchere, te neyieu oltung'ani neaku olarikoni le sirit, naa eyieunoto sidai.

²Keishiaakino olarikoni le sirit, nemeeta eleyiata, olee le nkitok nabo loo nkiririkinot, naa ng'en, pirisut, naa aminin, neyiolo aiteng'enisho,

³nememera, nemearisho, kake oltung'ani supat, neme olaishankarrani, nemenyor impisai.

⁴Neitasheiki olmarei lenye aitobiraki, neikok inkera enyena, pee eyanyitisho too nkoitoi pooki.

⁵Amaa te nemeyiolo oltung'ani aitasheiki enkaji enye, kaji eiko te neing'or esirit e Nkai?

⁶Keishiaa neme ilo otajewuo det pee merup kewan to Iwuasa nebatatakino enkiguana e Sheitani.

⁷Neme ina ake, keishiaakino neeta errepet te lelo leme ilairukok pee medoiki ake atua esulare o rreshet le Sheitani.

⁸Neijia ake sii etiu ilaisiaayiak, inchoo emut nabo nemeitoki aaing'ashing'ash too nkirorot, neme ilooitabaitie enaisho, nemeeta olorok le dupoto,

⁹inchoo eibung enkirukoto to ltau owang.

¹⁰Nchoo sii eng'asi aatem ninche, ore ake peyie eitisipi nchere meeta ileyiat, nchoo easisho anaa ilaisiaayiak.

¹¹Neijia ake sii eishiaa neikununo inkituaak enye; nchoo emut nabo, neme inaakurrisho kake inoo nkiririkinot, neisiligayu too mbaa pooki.

¹²Inchoo ilaisiaayiak eaku ilpayiani loo nkituaak maa naabo, neitasheiki sii ninche inkera enye o nkajijik enye aaitobiraki.

¹³Amu ore lelo ooasisho aaitobiraki anaa ilaisiaayiak naa ketum errepet sidai maate, netum enkitieunoto kitok tiatua enkirukoto natii atua Kristo Yesu.

¹⁴Kaisilig ajo kalotu enitii asieku, kake kasiraki intae kuna kiteng'enat peyie,

¹⁵te naimutie niyiolouu enaishiaakino neas oltung'ani tiatua enkaji e Nkai. Naa ninye esirit e Nkai naishu, ninye eng'ape o olkitamanyunoto loo sipat.

¹⁶Kitejo iyiook tukul inchere, eikitok oleng enkisudoroto e nkirukoto ang: Eibalunyeki ninye to sesen, neitadedeyieki ninye te Nkiyang'et nedol ilmalaika, nelikiori too loreren, neiruk enkop, neyae ninye keper te nkitoo.