Read Maasai Bible – Biblia Sinyati 1 Timoteo 4 Bible Online

1 Timoteo 4 - Maasai Bible – Biblia Sinyati bible

1 Timoteo 4

¹Eibalunye Enkiyang'et Sinyati ajo nchere, ore too nkatitin e nkiting'oto, naa keing'uaa kulikae enkirukoto nerubare lelo tauja le lejare o nkiteng'enat oo loiriruani

²eimu esunkuroisho e lelo oolejisho ootokilote iltauja lenye,

³oomit eyamishoe, nemit einosi kulie daiki naaitayio Enkai, nemit eng'amuni te nashe lelo ooata enkirukoto ooyiolo isipat.

⁴Amu ore pooki toki naitayio Enkai naa eisidai, nemeetae hoo ae toki nabo naanyi te naa te nashe eng'amuni;

⁵amu keitisiny ororei le Nkai o enkomono.

⁶Ti ninguan esirit te kuna kiteng'enat niaaku olaisiaayiani supat le Kristo Yesu, oitubuluaki too rorei le nkirukoto o nkiteng'enare sidai naa ninye iyie itusuja.

⁷Tapaasha nena atinin e modai neme ne Nkai. Intamoo kewan orrekie le Nkai;

⁸amu te naa keeta enkitamooto o sesen enkiti retoto, enkitamooto oo mbaa e Nkai naata te pooki oitoi, amu keeta enkisiligata tena kishui o te nkishui nalotu.

⁹Ororei osipa ele neishiaakino neng'amari katukul.

¹⁰Te nkaraki kuna pee kintanyamal ate nikinyok, amu Enkai naishu kitipika osiligi lang naa ninye Olaitajeunoni le pooki tung'ani neisulaki lelo ooiruk.

¹¹Intanapisho ninteng'enishore kuna baa.

¹²Mincho oltung'ani hoo obo kimenu te nkaraki kitisho ino, kake intoduaa ilairukok enkitanyaanyukoto tiatua enkiroroto o to lkuaak, tiatua enyorrata, tiatua enkirukoto o tiatua esinyatisho.

¹³Tasheikinoyu enkisumata oo lkigerot te dukuya iltung'ana o elikioroto o enkiteng'enare o metaba anaa nalotu.

¹⁴Mintololoiki ina kishooroto niaata, nikinchooki apa too nkirorot e naibon apa peyie kinteleiki ilpayiani inkaik.

¹⁵Intamoo kewan kuna siaaitin tasheikinore ninche, pee edol pooki ng'ae eninkunari te nyuaata.

¹⁶Tagolie kewan o nena kiteng'enat inono, imbung'a, amu te niaas ina nintajeu kewan o lelo likinining.