Read Maasai Bible – Biblia Sinyati 1 Timoteo 6 Bible Online

1 Timoteo 6 - Maasai Bible – Biblia Sinyati bible

1 Timoteo 6

¹Nchoo lelo pooki ootii abori enchata e rrindikisho eikenaa ilkituaak lenye aajo keiririkino enkanyit pooki, peyie mesukenyi ake enkarna e Nkai aashu nkiteng'enat ang.

²Ore lelo ooata ilkituaak airukok nemeishiaa neituraa enkanyit enye amu kejo lelo ilalashera, kake peyie easisho oleng amu ore lelo oodupore ena siaai enye naa ile tipat, amu lairukok oonyor. Inteng'ena nintudup ninche kuna siaaitin.

³Te neiteng'enisho oltung'ani ae kiteng'enare napaashaa neany eibung irorei supati lo Laitoriani lang Yesu Kristo o enkiteng'enare naishiaakino orrekie le Nkai,

⁴nerup kewan te modai nemeyiolo toki. Keeta ninye enkure e nchankar o empong'o, naa ine epukunye olom o lolepilepi o emorore o nkiteenikinot torrok,

⁵o enchankar tiatua iltung'ana lemelulung'a lukuny enye, nemeeta esipata, oojo ore orrekie le Nkai naa enkoitoi naduporeki.

⁶Ketii dupoto sapuk orrekie le Nkai te nebo enkidipakinoto.

⁷Amu eitu apa kiyau ae toki atua enkop, nimikindim aawaita hoo toki aaitung'uai enkop.

⁸Kake ti nikiaata endaa o nkilani, ore kiaata kuna, neidip iyiook nena.

⁹Kake ore lelo ooyieu neaku karsisi naa kedoiki ntemat nedoiki atua orreshet, nedoiki atua mbaa kumok e modai, naaitameisho neitadoiki iltung'ana atua enkitarruorroto o enkidaaroto.

¹⁰Amu ore enyorrata oo mpisai ninye entonai oo ntorrok pooki naa te nkaraki ena pee etapaashari ilkulikae aaing'uaa enkirukoto nerem iltauja lenye too nkitamiot kumok.

¹¹Kake ore iyie, lo tung'ani le Nkai, ilanya kuna pooki, ing'oru esupatisho o rrekie le Nkai o enkirukoto o enyorrata o enkitashoto o emborron.

¹²Taarisho te ilo arrabal sidai le nkirukoto; imbung'a ina kishui nemeiting, nikimpotokoki apa pee imbalie te dukuya ilchakenini kumok.

¹³Ore te dukuya Enkai naa ninye naishoo empuaan pooki toki; o te dukuya Kristo Yesu laa ore shakenisho enye te dukuya Pontio Pilato neibalunye enkirukoto enye,

¹⁴aaitanap inchere, imbung'a inkitanapat miata olduruk nimiaata enikimpotokini o metabau eliooto o Laitoriani lang Yesu Kristo.

¹⁵Naa keibalunyeki ena te nkata naishiaakino, ilo omayiana naa ninye ake Olaitoriani loo laitoriak;

¹⁶laa ninye ake le meye, obik te wang'an nemeing'urayu. Nemeetae aekata oltung'ani otoduaa ninye nemeeta oloidim atoduaa. Metaa enenye enkanyit o enkitoria intarasi. Eesai.

¹⁷Ore lelo karsisi le na kop inkoo pee mepik osiligi atua enkarsisisho enye nemebikoo, kake peyie eisilig Enkai naiputaki iyiook nena pooki pee kishipakino.

¹⁸Nchoo ninche eaku supati, nekarsisu too iasat sidain, neretisho neleng'u sii,

¹⁹amu te nena eitobiraki ate olkitamanyunoto sidai too nkolong'i naapuonu, peyie eyooki aang'amu ina kishui naa ninye nara katukul.

²⁰Oo Timoteo, torripo ina toki apa nikisiligieki. Talama nena kirorot neme no rrekie le Nkai, o mpaashat e nena naaitaae eng'eno te lejare.

²¹Amu ena eibung'a kulikae nepong'ori neitu etil enkirukoto. Metaa empiris e Nkai te nebo intae.