Read Maasai Bible – Biblia Sinyati 2 Timoteo 1 Bible Online

2 Timoteo 1 - Maasai Bible – Biblia Sinyati bible

2 Timoteo 1

¹Paulo, olkipaaret le Yesu Kristo te yieunoto e Nkai te risioroto e nkisiligata e mpuaan natii atua Kristo Yesu.

²Timoteo enkerai ai nanyor aigeroki: Metaa te nebo iyie empiris o lng'ur o eseriani eing'uaa Enkai Papa o Kristo Yesu Olaitoriani lang.

³Te naadamu oshi te nkomono dama o kewarie naisho Enkai enashe, ina naisiaaita to oltoilo lo ltau owang, anaa apa iloo papa.

⁴Ore te nadamu ilkiyio linono ina kata apa inchirita, naayieu naadol dama o kewarie, peyie aaboreyu eng'ida.

⁵Kadamu sii ina kirukoto ino nasipa, enkirukoto apa naitera amany kokoo ino Lois, o ng'utunyi Oinike, nayiolo taata aitisip nchere etamanya atua iyie.

⁶Te nkaraki ina peyie aaitadamu nchere nyaaki ntopiu enkishooroto e Nkai natii atua iyie ninoto apa te nkiteleikinoto oo nkaik aainei.

⁷Amu eitu eisho iyiook Enkai oltau le nkuretisho kake oltau le ngolon o le nyorrata o le nkibooroto e maate.

⁸Mikurru naa te nintayu shakenisho o Laitoriani lang aashu te nanu oloena lenye, kake tonyorrai erishata ino o sina litum te nkaraki ororei supat te ngolon e Nkai,

⁹naitajewuo iyiook neipot iyiook teina kipototo nasinya, neme te nkaraki esupatisho oo nkiaasin ang, kake te nkaraki esupatisho e yieunoto enye makewan o te mpiris naishoo ninye iyiook tiatua Kristo Yesu apa moitie.

¹⁰Neibalunyeki taata te lotunoto o Laitajeunoni lang Kristo Yesu, oiwuang'ie keeya neyau puaan o enkishui nemetii keeya.

¹¹Te nkaraki ele rorei pee aategeluaki mataa olalikioroni o Lkipaaret o laiteng'enani,

¹²naa te nkaraki ena pee aata ele sina. Kake madol enkurruna amu kayiolo ilo lairuko natisipua nchere keidim ninye atorripo ina naaisiligieki nanu o metabau ina olong.

¹³Tusuja ilo rrekie loo rorei ooata puaan apa litoning'uo te nanu, te nkirukoto o te nyorrata natii atua Kristo Yesu.

¹⁴Torripo ina sipata nikinchooki iyie te Nkiyang'et Sinyati natamanya atua iyiook.

¹⁵Iyiolo ajo ore lelo pooki ootii Asia neibelekenyate, naaing'uaa nanu, ore te lelo netii Figelo o Ermogene.

¹⁶Meishoo Olaitoriani olng'ur enkaji e Onesiforo amu aaitagolo ninye oshoke katitin kumok, eitu edol isura too lpisia le enata ai,

¹⁷kake ore pee ebau Roma naing'oru omaanoto.

¹⁸Meidimie Olaitoriani menoto olng'ur te ina olong kenya o Laitoriani, niyiolo sii eneba esiaai nataasa Onesifero te Efeso.