Read Maasai Bible – Biblia Sinyati 2 Timoteo 2 Bible Online

2 Timoteo 2 - Maasai Bible – Biblia Sinyati bible

2 Timoteo 2

¹Ore naa iyie, enkerai ai, tagolo te mpiris natii atua Kristo.

²Ore ina nitoning'o te nanu te dukuya lchakenini kumok, intarasaki lelo tung'ana ooisiligayu ooidim sii ninche aaiteng'ena ilkulikae.

³Tonyorrai tang'arieki osina anaa osikari odupa le Kristo Yesu.

⁴Meetae osikari otii enjore oisho metarruesha mbaa neme ne njore, amu ore enayieu ninye naa pee eitiship ilo oigero.

⁵Meishori olokuet enkopiyia e nkitoo mme keshomo te risioroto oo nkitanapat.

⁶Ore olaturoni le nkurma onyok keiririkino netum ilng'anayio le dukuya.

⁷Tadamu kuna najo amu eikincho Olaitoriani ening'unoto te pooki toki.

⁸Tadamu Yesu Kristo, otopiwuo aing'uaa ilootuata, le ntalipa e Daudi, anaa enainosuaki te ilo rorei supat lalikioo.

⁹Lelo omon supati laa te ninye aainosieki osina o maateeni too lpisia anaa olarruoni. Kake ore ororei le Nkai nemeena.

¹⁰Neaku kang'iri pooki toki te nkaraki lelo gelunot, pee etum sii ninche aanoto ina jeunoto tiatua Kristo Yesu, te nebo enkitoo oo ntarasi.

¹¹Ororei osipa ele nchere: Ti nikituata te nebo ninye, naa eikiyiooki sii aaishu te nebo ninye.

¹²Ti niking'iri nikiyiooki sii aaitoreisho te nebo ninye; ti nikimiki ninye nemiki sii ninye iyiook;

¹³ti nimikisiligayu, neton ninye eisiligayu - amu meidim ninye atomiki kewan.

¹⁴Intadamu iltung'ana linono ena, nintanap te dukuya Olaitoriani, metapaashare enchankar oo rorei amu meretisho, kake keiminie ake lelo ooning.

¹⁵Tonyuaa intoduaai kewan te Nkai ajo inyorraro, nira olaisiaayiani lemeeta enaitukurru, oasishore te nkitoriokinoto ilo rorei osipa.

¹⁶Tapaasha nena kirorot e pesho nemetii euriata e Nkai, amu iltung'ana ake erikoo metalama euriata e Enkai oleng.

¹⁷Ore inkirorot enye nedaari anaa enkeeya nayieng'i, ore te lelo netii Hermenayo o Fileto;

¹⁸ootapong'o enkoitoi nasipa, eji kejo eidipa empiunoto oo lootuata atulusoi, neibelekeny enkirukoto e kulikae.

¹⁹Kake etuuno Enkai olkitamanyunoto le nkirukoto, nepik ele mishire ojo, “Keyiolo Olaitoriani lelo oora ilenyena,” neitoki ajo, “Ore pooki ng'ae oipot enkarna o Laitoriani nchoo eing'uaa entorroni.”

²⁰Ore atua enkaji sapuk neme ntokitin e saabu o ne nkosholai ake natii, kake ketii sii noo nkeek o ne nkulukuoni, ore nkulie neasishoreki too mbaa e tipat ore nkulie neasishoreki too mbaa neme ine tipat.

²¹Te neituku oltung'ani kewan nepaash iloirerioni, neaku emasaai naasishoreki te nkanyit naitisinyaki pee easishore olopeny enkaji, neirragieki aaitaanyu nena siaaitin sidain.

²²Neaku ilanya naa ng'uarrat e lelero, ning'oru esupatisho o enkirukoto o enyorrata o eseriani, te nebo lelo ooipot enkarna o Laitoriani to ltau owang.

²³Tapaashare enchankar e modai nemeeta enajo, iyiolo iyie ajo ilarrabali ake eiu.

²⁴Meishiaakino osinka lo Laitoriani te neaku olo larrabal kake keishia paa oltung'ani oibor oshoke te pooki ng'ae, olaiteng'enani onyor aiteng'enisho, ong'iri,

²⁵nererioo te mborron lelo ookesh ninye, amu ebaiki neidim Enkai aishoo meirridu nepuonu aayiolou ina sipata.

²⁶Pee ebaiki neisik aaing'uaa oorreshet le Sheitani, otang'asa apa aibung metaasa enayieu ninye.