Read Maasai Bible – Biblia Sinyati Ilbrania 13 Bible Online

Ilbrania 13 - Maasai Bible – Biblia Sinyati bible

Ilbrania 13

¹Entonyorrata anaa lalashera o nkanashera tiatua Kristo.

²Emintololoiki enkitoomono oo lomon amu teina eitoomono apa kulikae ilmalaika meyiolo.

³Entadamu lelo ootii jila, anaa itii jila te nebo ninche, o lelo ooinyali, amu itii sii intae atua ilo sesen.

⁴Enchoo eyanyiti enkiyama tiatua iltung'ana pooki naa emincho ina rruat e nkiyama eisarkionieki; amu Enkai naiguanare lelo ooibor onyek o loo lololoito.

⁵Entorrip enkishui inyi tialo enyorrata oo mpisai ninchosho ebaiki intae entoki niaatata; amu etejo Enkai, “Maapal maadamu nemaaing'uaa.”

⁶Neaku eikintieu aatejo, “Olaitoriani olaretoni lai, nemaureishoyu. Kaa aaidim oltung'ani aitaasa?”

⁷Entadamu ilarikok linyi, lelo ooinosakita apa intae ele rorei le Nkai, entoduaai inkiasin enye, naa enturubare enkirukoto enye.

⁸Ore Yesu Kristo ninye ake olang'ole taata o ntarasi.

⁹Emincho eitapong'ori intae too nkiteng'enat naapaashaa; amu keishiaakino naa empiris naitagol oltau, neme indaiki, neitu eret lelo ooitudupita.

¹⁰Eikiaata iyiook olperere lo lasar lemeng'arie iyiook lelo ooisiaaisho teilo ng'obor.

¹¹Amu ore nkiri e nena kishu naayau olapolosani ine wueji sinyati aitaa olasar loo ng'ok naa ti auluo enkang oo lng'oborri epejori.

¹²Neaku ore sii ninye Yesu naa ti auluo kishomi einosieki osina pee etum aitisinya iltung'ana lenyena to sarge lenye makewan.

¹³Ore te nkaraki ina emainyoito aapuo auluo enkang oo lng'oborri, nikinapaki nena morot.

¹⁴Amu mikiaata iyiook enkanasa nikibikie tene, kake ae anasa king'oru nalotu.

¹⁵Tiatua ninye naa maitaiki Enkai anaa ake olasar le nkisisa, aa inchere, ilng'anayio loo nkutukie naalimu enkarna enye.

¹⁶Emintololoiki easata oo supati, o eng'arata oo ntokitin niaatata, amu ore ilasarri laaijo lelo naa keitiship Enkai.

¹⁷Entoning ilarikok linyi niyanyititi, amu iltauja linyi eirrita, anaa iltung'ana ooyookini aikilikuan, enchoo naa eiko ninche neijia te ng'ida, neme to sina, amu meeta ina dupoto te intae.

¹⁸Entoomonoki iyiook, amu king'idare ena nchere mikiaata nkibirribirrat torrok tiatua iltauja lang, eikiyieu nikiaasisho to rrekie sidai too mbaa pooki.

¹⁹Atukunyaki intae naleng enkuna neijia pee aasiokini aarrinyoki intae.

²⁰Ore naa taata Enkai e seriani nanyaaka ashuku Olaitoriani Yesu aitung'uaa ilootuata, ilo shekut kitok loo nkerra, te ilo sarge lo sotua loo ntarasi,

²¹meishopoki intae pooki toki sidai pee itumutumu aataas ina nayieu ninye, neas ina naitiship ninye tiatua intae; tiatua Yesu Kristo, olaa enenye enkitoo ntarasi o ntarasi. Eesai.

²²Asai intae ilalashera o nkanashera, emisi tele rorei lai le nkikoo, amu too ndorropu atisiraka intae.

²³Entayiolo inchere etalakuaki olalashe lang Timoteo, naa kayooki adol intae te nebo ninye te netasiekuo.

²⁴Eroroki ilarikok linyi pooki o lelo sinyat pooki. Eiroroki intae ilooing'uaa Italia.

²⁵Metaa empiris e Nkai te nebo intae pooki. Eesai.